स्याणेया रा ज्ञान 3

हर काम करने रा एक बखत

1जो कुछ आसे एते दुनिया दे करूँए तिजी खे एक बखत ओआ।

2जम्मणे रा बखत, ओर मरने रा बी एक बखत ओआ,

बाणे रा बखत ओर बाए रे खे बाडणे रा बी एक बखत ओआ।

3युद्धो दे काणे रा ओर ठीक करने रा बी बखत ओआ,

ओर कुछ चीजा रा टाल़ने रा ओर बनाणे रा बी बखत ओआ।

4दु:खो दे रोणे रा ओर खुशिया दे आसणे रा बी एक बखत ओआ,

शोक करने रा ओर नाचणे रा बी एक बखत ओआ।

5पात्थर सेटणे रा ओर पात्थर कट्ठे करने रा बी बखत ओआ,

ओर गल़े लगाणे रा ओर गल़े लगाणे ते रूकणे रा बी एक बखत ओआ।

6टोल़ने रा ओर रचाणे रा बी एक बखत ओआ,

ओर बचाई की राखणे रा ओर सेटणे रा बखत ओआ;

7फाड़ने रा ओर सीऊँणे रा बी बखत ओआ,

चुप रणे रा ओर बोलणे रा बी एक बखत ओआ।

8प्यार करने रा ओर दुश्मणी करने रा बी बखत ओआ,

ओर लड़ाई करने रा ओर मिलणे रा बी एक बखत ओआ।

परमेशरो रे जरिये दित्तेया रा काम

9जो लोक मईणता रा काम करोए तिजी ते तिना खे कोई फाईदा नि मिलदा।

10मैं से दु:खो साथे परेया रा काम देखी राखेया, जो परमेशरे माणूंआ खे ठराई राखेया, ताकि सेयो तिदे लगे रे रओ। 11परमेशर सब कुछ सई बखतो पाँदे करोआ। फेर बी आसा बिचा ते कोई बी पुरिया तरआ ते तेसरे कामा खे समजी नि सकदा, ओर से आऊणे वाल़े बखतो रे बारे दे म्हारे मनो दे सवाल पाई देओआ। एड़ा बणाया जो आपणे-आपणे बखतो रे सुन्दर ओआ, तेबे तिने माणूंआ रे मनो रे शुरू ओर अन्तो रा ज्ञान परेया। पर परमेशरे जो कुछ बणाया, माणूं तिजी खे शुरूओ ते लई की अन्तो तक समजी नि सकदा।

12माखे पता लगी गा रा कि माणूंआ खे मजे करने ओर पूरी जिन्दगी पलाई करने ते सिवाए ओर कुछ बी ठीक नि ए। 13ओर आऊँ ये बी जाणूंआ कि हर केसी माणूंए खे खाणा-पीणा चाईयो, ओर तिना रे जरिये कित्ते जाणे वाल़े कामा रा मजा लणा चाईयो। से चीजा ए जो परमेशर आसा खे देओआ।

14माखे पता ए कि जो कुछ परमेशर करोआ, से सदा स्थिर रणा, ना तो तिदे कुछ बढ़ाई सकदे ओर ना ई कुछ कटाई सकदे, परमेशर एड़ा इजी खे करोआ, ताकि लोक तेसरा डर मानो। 15जो कुछ ऊआ से इजी ते पईले बी ऊई चूकी रा, जो ऊणे वाल़ा ए, से बी ऊई चूकी रा ओर परमेशर सेई काम बार-बार करोआ।

संसारो रे अन्याय

16फेर मैं तरतिया पाँदे न्याय ओर पलाईया रिया जगा पाँदे बुरे ई काम देखे,

17मैं आपणे मनो रे बोलेया, “परमेशरो बुरे माणूंए रा ओर तर्मी माणूंए रा न्याय करना, कऊँकि तेसरे कअरे हर एक गल्ला रा ओर हर एक कामो रा बखत ओआ।”

18मैं आपणे आपू ते बोलेया, “परमेशर माणूंआ खे परखो कि माणूं देखी सको कि सेयो डांगरा ते बड़ी की नि ए। 19कऊँकि जेड़ी डांगरा री, तेड़ी ई माणूंआ री बी दशा ओई, जेड़ा एक मरोआ, तेड़ा ई दूजा बी मरोआ। सबी दे एक जेड़ा ई साआ ओआ ओर माणूं डांगरा जेड़ा ईए, सब कुछ बेकार ईए।” 20सब जिऊँदे जीब एक ई जगा रे जाओए माट्टिया दे, सारे माट्टिया ते ई बणी रे ओर सारे बादो ते माट्टिया रेई मिली जाओए। 21पक्का ये कोई नि जाणदा कि मरने ते बाद माणूंआ रा प्राण परमेशरो रिया तरफा खे जाओआ ओर डांगरा रा प्राण थालो खे मरेया रिया जगा खे जाओआ। 22माखे एड़ा लगोआ कि सबी ते खरी गल्ल माणूंआ खे एड़ी ए कि आसे आपणे कामा दे लगे दे रणे चाईयो, तिजी ते अलावा आसे कुछ पनि करी सकदे। इजी गल्ला रा पता केसी बी गल्ला ते नि लगाई सकदे कि मारे मरने ते बाद आगे क्या ऊणा।

Currently Selected:

स्याणेया रा ज्ञान 3: BGH

Highlight

Copy

Compare