दानिय्येल 9
9
लोका रिया तँईं दानिय्येलो री प्रार्थना
1ये बेबीलोनो रे राजा दारा रे राजो रा पईला साल था। से मादी जातिया रे क्षयर्षो रा पाऊ था। 2तेसरे राजो रे पईले सालो दे, मैं दानिय्येले भविष्यबक्तेया रे लिखे दे शास्त्रा रे जरीये तिना साला री गिणती समजी ली जो यहोवे यिर्मयाह नबीए खे बोले थे, मतलब यरूशलेमो री उजड़ी दी दशा रे खत्म ऊणे दे सत्तर साल ऊणे चाईयो। 3तेबे आऊँ आपणा मूँ परमेशर यहोवे रिया तरफा खे करी की गिड़गिड़ाई की प्रार्थना करने लगेया ओर बअरत करी की, ओर टाट पईनी की, स्वाई पाँदे बैठी गा। 4मैं आपणे परमेशर यहोवे ते ईंयाँ प्रार्थना कित्ती ओर पाप माने, “ओ परमेशर यहोवा, तूँ महान ओर डरो जोगा परमेशर ऐ, जो आपणे प्यार राखणे ओर आज्ञा मानणे वाल़ेया साथे आपणी वाचा खे पूरी करोआ ओर करूणा करदा रओआ। 5पर आसे लोके तो पाप, बुरे काम, दुष्टता ओर बगावत कित्ती ओर तेरी आज्ञा ओर नियम तोड़ी ते। 6तेरे जो दास नबी लोक, म्हारे राजा, परदाना, बुजुर्ग ओर सारे आम माणूंआ साथे तेरे नाओं ते प्रार्थना करो थे, आसे तिना री नि सुणी।#9:6 नहे. 9:34 7ओ परमेशर, तूँ तर्मी ए, पर आसा लोका खे आजके दिने शर्मिंदा ऊणा पड़ोआ, मतलब यरूशलेमो रे रणे वाल़े सब यहूदी, क्या नेड़े, क्या दूरो रे सारे इस्राएली लोक जो तैं तेस विश्वासघातो रिया बजा ते, जो तिने तां साथे कित्तेया, देश-देशो रे तित्तर-बित्तर करीते, तिना सबी खे शर्मिंदा ऊणा पड़ोआ। 8ओ राज करने वाल़े परमेशर आसे लोके आपणे राजा, परदान ओर बुजुर्गा समेत तेरे खलाफ पाप करी राखेया, इजी बजा ते आसा खे शर्मिंदा ऊणा पड़ोआ। 9पर, तेबे बी आसे आपणे परमेशर यहोवे ते फिरी गे, तेबे बी दया रा समुद्र ओर माफिया री खान ए। 10आसे तो आपणे परमेशर यहोवे री शिक्षा सुणने ते बाद बी तेती पाँदे नि चले जो तिने आपणे दास नबिया ते आसा खे सुणाई।#9:10 2 राज. 18:12 11बल्कि सब इस्राएलिये तेरे बिधानो रा उल्लंघन कित्तेया ओर एड़े अटी गे कि तेरी नि सुणी। इजी बजा ते जेस श्रापो री चर्चा परमेशरो रे दास मूसे रे बिधानो दे लिखी राखी, से स्राप आसा पाँदे बीती गा, कऊँकि आसे तेसरे खलाफ पाप करी राखेया। 12तेबे परमेशरे म्हारे ओर न्यायिया रे बारे दे जो वचन बोले थे, सेयो आसा पाँदे बड़ी मुसीबत ल्याई की पूरे करी राखे, एथो तक कि जेड़ी मुसीबत यरूशलेमो पाँदे पड़ी री, तेड़ी पूरी तरतिया पाँदे केसी बी शईरो दे नि पड़ी। 13जेड़ा मूसे रे बिधानो दे लिखी राखेया, तेड़ी सारी मुसीबत आसा पाँदे पड़ी री, तेबे बी आसे आपणे परमेशर यहोवे खे मानणे खे ना तो आपणे पापो रे कामो ते फिरे ओर ना तेरी सच्ची गल्ला पाँदे त्यान दित्तेया। 14इजी बजा ते परमेशरे सोची-समजी की आसा पाँदे मुसीबत पायी, कऊँकि म्हारा परमेशर यहोवा जितणे काम करोआ तिना सबी रे तर्मी ठईरोआ, पर आसे तेसरी नि सुणी। 15एबे, ओ म्हारे यहोवा परमेशर, ओ परमेशर यहोवा, तैं आपणी प्रजा मिस्र देशो ते, सामर्थी आथो रे जरीये निकयाल़ी की आपणा इतणा बड़ा नाओं कित्तेया, जो आजो तक प्रसिद्ध ए, पर आसे पाप कित्तेया ओर दुष्टता ई करी राखी। 16ओ परमेशर, आसा ते नराज नि ऊणा। आपणे पवित्र पाह्ड़ो खे सजा देणा बन्द करी दे। म्हारे पाप ओर म्हारे बुजुर्गा रे बुरे कामो रिया बजा ते दूजे लोक म्हारी बेज्जती करोए। आसा रे नेड़े-तेड़े दे रणे वाल़े सारे लोक यरूशलेम शईर ओर तेरे लोका पाँदे आसोए। इजी री खातर सेई कर जो ठीक ए, जेड़ा तुसे करोए। 17ओ म्हारे परमेशर, मेरी प्रार्थना ओर बिनती सुण। आपणे पवित्र मन्दरो खे जो नाश ऊईगा दा ए, फेर ठीक कर; ताकि सारे लोक जाणी लो कि तूँ ई परमेशर ए। 18ओ मेरे परमेशर, मेरी प्रार्थना सुण, आखी खोली की म्हारी ऊजड़ी री दशा ओर तेस यरूशलेम शईरो खे बी देख जो उजड़ी चूकी रा ए, कऊँकि आसे जो तां सामणे गिड़गिड़ाई की प्रार्थना करूँए, तो आपणे तर्मो रे कामो पाँदे नि, बल्कि तेरी बड़ी दया रे कामो पाँदे परोसा राखी की करूँए। 19ओ परमेशर, म्हारी प्रार्थना सुणी लो, ओ परमेशर, पाप माफ कर, ओ परमेशर, त्यान देई की जो करना से कर, देरी नि कर; ओ मेरे परमेशर, तेरा शईर ओर तेरी प्रजा खे तेरा ई बोलोए, इजी री खातर आपणे नाओं रे मुताबिक एड़ा ई कर।”
जिब्राएलो रा भविष्यबाणी समजणा
20आऊँ ईंयाँ प्रार्थना करदा ओर आपणे ओर आपणी इस्राएली जाति पाईया रे पाप मानदा ऊआ, आपणे परमेशर यहोवे सामणे तेसरे पवित्र पाह्ड़ो#9:20 पवित्र पाह्ड़ो यरूशलेम खे गिड़गिड़ाई की प्रार्थना करुँ था। 21तेबे से मर्द जिब्राएल जो मैं तेस बखते देखेया जेबे माखे पईले दर्शण ऊआ था, तिने तेज उडने री आज्ञा लई ई साँजके नज्जो री बलिया रे बखते आऊँ छूँआ ओर माखे समजयाई की मां साथे गल्ला करने लगेया।#9:21 लूक. 1:19 22तिने माखे बोलेया, “ओ दानिय्येल, आऊँ ताखे अक्ल ओर ज्ञान देणे खे यबु ई निकल़ी की आई रा। 23जेबे तूँ गिड़गिड़ाई की बिनती करने लगेया, तेबेई इजी री आज्ञा निकल़ी, इजी री खातर आऊँ ताखे बताणे आई रा, कऊँकि तूँ बऊत प्यारो जोगा ठईरी रा, इजी री खातर एबे तेस विषय खे समजी लो ओर दर्शणो री गल्ला रा मतलब बूजी लो। 24परमेशरे आपणे लोका खे ओर आपणे पवित्र शईर यरूशलेमो खे सत्तर अफ़्ते ठराई राखे। तेस बखते परमेशरो रे बिधानो रे खलाफ काम बन्द ऊई जाणे। पाप खत्म ऊई जाणा। ओर लोका खे तिना रे जरीये कित्ते रे बुरे कामा री सजा मिलणी। तेबे सबी हमेशा सेई करना जो ठीक ए। दर्शणा ओर भविष्यबाणिया दे बोली दी गल्ल सच्च ऊणी। ओर मन्दरो दे सबी ते पवित्र मन्दरो रा अभिषेक कित्तेया। 25आऊँ चाऊँआ कि तूँ, दानिय्येल, इजी खे ठीक टंगो दे समजी लो। यरूशलेमो खे फेर बसाणे री आज्ञा देई जाणी। फेर सात अफ़्ते#9:25 सात अफ़्ते 49 साल बीती जाणे, ओर बाठ अफ़्ते बी बीती जाणे। तेते ते बाद, परमेशरो रे जरीये चूणेया दा एक राजा आऊणा। लोका यरूशलेम शईर फेर बनाणा। एते दे चौड़िया बाटा ऊणिया ओर इजी रे चऊँ कनारे एक मजबूत दवाल ऊणी। पर तेस बखते बऊत सारिया परेशानिया ऊणिया। 26जेबे सेयो बाठ अफ़्ते बीती जाणे तेबे से अभिषिक्त राजा काई देणा। तेसरे पग्ता से छाडी देणा। ओर तेसगे जो कुछ बी ऊणा, से तेसते छडवाई देणा। आऊणे वाल़े राजे री सेने शईर ओर मन्दर नाश करी देणे। अंत बाढ़ा जेड़ा आई जाणा। लड़ाई अंतो तक लगी दी रणी। परमेशरे आज्ञा देई राखी कि कई जगा खे नाश करी देयो। 27तेस राजे कई लोका साथे समजौता करना। ये समजौता एकी अफ़्ते#9:27 एकी अफ़्ते सात साल तक रणा। तेस अफ़्ते बीचे, तेस मन्दरो दे बलिदान ओर चढ़ावा चढ़ाणा बन्द करी देणा। इजी रे बदले तेस तेती एक घृणित चीज राखणी जो परेशानिया री बजा बणनी। ये तदुए तक तेती रणी जदुए तक कि परमेशरे से राजा नाश नि करी लणा जो विनाश करोआ। तेसरा अंत तेस बखते ऊणा जो परमेशरे ठराई राखेया।”
Currently Selected:
दानिय्येल 9: BGH
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
