दानिय्येल 10
10
गौरवशाली माणूंआ रा दर्शण
1फारस देशो रे राजा कुस्रू रे राज रे तीजे सालो दे, मां दानिय्येलो खे, जेसखे बेलतशस्सर बी बोलोए, परमेशरो रिया तरफा ते एक ओर दर्शण मिलेया। सन्देश सच्चा था, पर माखे समजणे खे बऊत कठण था। पर बादो ते मैं जो दर्शण देखेया था, तेतेरिया बजा ते से मेरी समजा दे आईगा। 2तिना दिना दे आऊँ दानिय्येल तीऊँ अफ़्तेया तक शोग करदा रया। 3तिना तीन अफ़्ते पूरे ऊणे तक, मैं ना तो स्वाद रोटी खाई ओर ना मास ओर शराब आपणे मुंए दे राखेया ओर ना आपणे शरीरो दे कोई तेल लगाया। 4तेबे सालो रे पईले मीन्ने#10:4 पईले मीन्ने 15 मार्च ते 15 अप्रैलो तक रे चौबिये दिने जेबे आऊँ हिद्देकेल नाओं री नदिया रे कनारे पाँदे था, 5तेबे मैं देखेया कि रेशमो रे टाल्ले पईनी की ओर ऊफाज़ देशो रे सबी ते शुद्ध सूईने रा लको दे फैंटा था।#10:5 प्रका. 1:13 6तेसरा शरीर फिरोजे जेड़ा चमकणे लगी रा था, तेसरी शक्ल बिजल़िया जेड़ी चमकणे लगी री थी, आखी बल़ी रिया आगी री लूपिया जेड़िया, बाँयी ओर पैर पीतल़ी जेड़े चमकणे लगी रे थे। जेबे से बोलो था, तो तेसरी आवाज बऊत ऊच्ची थी, जेड़े कई लोक कट्ठे बोलणे लगी रे ओ।#10:6 प्रका. 1:14 7से बस मैं दानिय्येले ई देखेया ओर मां साथले माणूंआ खे तेसरा कोई बी दर्शण नि ऊआ, पर सेयो अचाणक बऊत डरीगे ओर लूकणे खे नठीगे। 8ईंयाँ आऊँ एस महान दर्शणो खे देखणे खे कल्ला ई रईगा। मेरी शक्ति खत्म ऊईगी, मेरा रंग पिऊँल़ा पड़ीगा, ओर मांदे कोई बी तागत नि रयी। 9तेबे बी मैं तेस मर्दो रे बोलणे री आवाज सुणी ओर जेबे से माखे सुणेया, तेबे आऊँ मुंए रे पारे थाले पड़ीगा ओर गईरी नींजा दे जमीना दे त्वाणा पड़ेया दा रया।
फारस ओर यूनानो रे बारे रे भविष्यबाणी
10केसी रे आथे आऊँ छूँएया। तिने आऊँ आपणे आथा ओर जानूआ रे पारे ऊबे खींजी ला। आऊँ डरो रे मारे कांबणे लगेया। 11तेबे स्वर्गदूते माखे बोलेया, “ओ पाई दानिय्येल, ओर परमेशरो रे बऊत प्यारे मर्द, जो वचन आऊँ ताए बोलूँआ तिजी खे समजी लो ओर सीदा खड़ा ओ, कऊँकि आऊँ यबु तांगे पेजी राखेया।” जेबे तिने माखे ये बोलेया तेबे आऊँ खड़ा तो ऊईगा, पर कांबदा रया। 12तेबे तिने माखे बोलेया, “ओ दानिय्येल, डर नि, कऊँकि पईले ई दिने जेबे तैं समजणे-बूजणे खे मन लगाया ओर आपणे परमेशरो सामणे आपू खे दीन कित्तेया, तेस ई दिने तेरी बिनती सुणी ली ओर आऊँ तेरिया ई प्रार्थना रिया बजा ते आई रा।#10:12 दानि. 12:1 13फारसो रे राज्य री रक्षा करने वाल़े दूते इक्की दिन तक मेरा सामणा कित्तेया, पर मीकाएल जो परमेशरो रे परदान स्वर्गदूता बीचा ते ए, से मेरी मताद करने आया, इजी री खातर आऊँ फारसो रे राजेया गे रया। 14ओर एबे आऊँ ताखे समजयाणे आई रा कि अन्तो रे दिना रे तेरे लोका री क्या दशा ऊणी, कऊँकि जो दर्शण तैं देखी राखेया, से कुछ दिन बाद पूरा ऊणा।” 15जेबे से मां साथे इना गल्ला करी चुकेया, तेबे मैं आपणा मूँ थाले कित्तेया ओर चुप रया। 16अचाणक तिने स्वर्गदूते, जो एकी माणूं जेड़ा दिशो था, मेरे ओठ छूँएं। तेबे आऊँ बोलणे जोगा ऊईगा, ओर मैं तेसखे बोलेया, “ओ स्वामी, मैं एक दर्शण देखेया, इजी री बजा ते आऊँ बऊत कमजोर ऊईगा, ओर आऊँ कांबणा बन्द नि करी सकदा।#10:16 यिर्म. 1:9 17इजी री खातर आऊँ आपणे मालको रे सामणे खड़े दे एकी दासो जेड़ा ए, आऊँ तां साथे किंयाँ गल्ला करी सकुँ आ? मेरी तागत खत्म ऊईगी री ए। सई दे, आऊँ बड़ी मुश्किला ते साआ लणे लगी रा।” 18एक स्वर्गदूत जो माणूंए जेड़ा दिशणे लगी रा था, तिने आऊँ फेर छूँएया। तिने माखे तागत दित्ती, 19तिने बोलेया, “डर नि, परमेशर ताखे बऊत प्यार करोआ। ताखे शान्ति मिलदी रओ! तूँ मजबूत बण। मजबूत बण।” जेबे तिने मां साथे गल्ल कित्ती, तो तेबे आऊँ मजबूत बणी गा। मैं बोलेया, “बोल, मेरे स्वामी! तैं माखे तागत देई राखी ए।”#10:19 यशा. 41:10 20तेबे तिने बोलेया, “क्या तूँ जाणेया कि आऊँ किजी बजा ते तांगे आई रा? एबे मां फारसो रे राजे#10:20 फारसो रे राजे रक्षा करने वाल़े स्वर्गदूत साथे लड़ने खे वापस ऊणा ओर जेबे आऊँ निकल़ोगा, तेबे यूनानो रा परदान#10:20 यूनानो रा परदान रक्षा करने वाल़ा स्वर्गदूत आऊणा।” 21तिने बोलेया, “क्या तूँ जाणेया कि मैं आऊँ तांगे कऊँ आई रा? आऊँ तांगे सच्चाईया री कताबा दे लिखी रिया गल्ला बताणे आई रा। पर एबे माखे फारसो रे राज्य पाँदे शासन करने वाल़ी दुष्ट आत्मा रे खलाफ लड़ने खे वापस जाणा पड़ना। जेबे मां से अराणा तेते ते बाद यूनानो री रक्षा करने वाल़ा दुष्ट स्वर्गदूत प्रकट ऊणा ओर माखे से अराणा पड़ना। मीकाएल, जो तूँ इस्राएलो री रक्षा करने वाल़ा स्वर्गदूत ए, मेरी मताद करनी, पर मेरी मताद करने वाल़ा कोई ओर नि आ।”
Currently Selected:
दानिय्येल 10: BGH
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
