Zekaliya 1
1
Mwami Leza mbwaakaita bantu bakwe kuti bapilukile kulinguwe
1Mumwezi walusele mumwaka wabili wakulela kwa Daliyasi, majwi aa Mwami Leza akasikila Zekaliya musinsimi mwanaa Belekiya mwana wa Ido. Akati, 2“Mwami Leza wakanyemenede basikale banu. 3Nkaako ambila bantu bokwanu kuti, ‘Mboobu mbwaamba Mwami Leza Singuzuzyoonse, amupilukile kulindime ambebo ndapilukila kulindinywe.’ Mbwaamba Mwami Leza Singuzuzyoonse. 4Mutabi mbuli basikale banu, aabo basinsimi bakasaanguna mbubakali kwaambila kuti, ‘Mboobu mbwaamba Mwami Leza Singuzuzyoonse ulati, amuleke nzila zyanu zibi amilimo yanu mibi. Pele tiibakaswiilila nokuba kuteya matwi aabo kulindime,’ mbwaamba Mwami Leza. 5Ino sunu bali kuli basikale banu? Sena basinsimi balapona kwalyoonse alyoonse? 6Sena majwi aangu amalailile aangu ngindakalailila babelesi bangu basinsimi taakacita kuti basikale banu bapenge? Lino nibakeempa bakati, ‘Mwami Leza Singuzuzyoonse watucita bweelede nzila amilimo yesu, kweendelana amakanze aakwe.’”
Cilengaano camusinsimi camabbiza
7Mubuzuba bwamakumi obilo aane bwamwezi wa Syebati, mumwaka wabili wakulela kwa Daliyasi, majwi aa Mwami Leza akasikila Zekaliya musinsimi mwanaa Belekiya mwana wa Ido.
8Masiku ndakabona cilengaano, kumbele lyangu ndakabona mwaalumi katantide abbiza lisalala! Wakaimvwi akati kamikoka mukalonga. Kusule lyakwe kwakali mabbiza aasalala pyu, asalaluka aatuba bu!
9Aawo ndakabuzya kuti, “Ino nzinzi eezi simalelo wangu?” Mungelo ooyo ngundakali kwaambaula aawe wakandiingula kuti, “Ndilakutondezya naa nzinzi.” 10Lino muntu ooyo wakaimvwi akati kamikoka wakaamba kuti, “Eezi nzenzizyo Mwami Leza nzyaakatuma munyika yoonse kuti zyeendeende.”
11Lino zyakalungulwida mungelo wa Mwami Leza wakaimvwi akati kumukoka kati “Twaluunkide munyika yoonse ono twajana kuti nyika yoonse ilibateme muluumuno.”
12Mpawo mungelo ooyo wa Mwami Leza wakati, “O Mwami Leza Singuzuzyoonse ino uyooleka lili kuteengelela munzi wa Jelusalemu aminzi ya Juda eeyo njonyemenede kwamyaka iili makumi aali ciloba?” 13Nkaako Mwami Leza wakaamba majwi mabotu aaluzyalo aakuumbulizya kumungelo ngundakali kukanana aawe.
14Mpawo mungelo ooyo ngundakali kukanana aawe wakati, “Ambilizya majwi aaya kuti, mboobu mbwaamba Mwami Leza Singuzuzyoonse ulati, ‘Munzi wa Jelusalemu uuli ngo Ziyoni nduuyandisya.’ 15Pele ndinyemede kapati misyobo eeyo iiliibide. Ndakanyemede aasyoonto, pele balo baliyungizizya mapenzi.
16“Nkaako mboobu mbwaamba Mwami Leza ulati, munzi wa Jelusalemu njooweengelela, ŋanda yangu iili mumo iyooyakululwa. Lutambo lwakupimya luyoolandabulwa amunzi wa Jelusalemu, mbwaamba Mwami Leza.”
17Kwaambilizya alimwi kuti, mboobu mbwaamba Mwami Leza Singuzuzyoonse ulati, “Minzi yangu iyoozula lubono alimwi Mwami Leza uyooumbulizya Ziyoni uyoosala munzi wa Jelusalemu alimwi.”
Cilengaano cameja
18Mpoonya ndakalanga, lino kumbele lyangu kwakali meja one! 19Ndakabuzya mungelo ooyo ngundakali kukanana aawe kuti, “Ino ninzi eezi?”
Wakandiingula kuti, “Aaya ngameja aakamwaya Juda, Isilayeli a Jelusalemu.”
20Mpawo Mwami Leza wakanditondezya bafuzi bone. 21Ndakabuzya kuti, “Ino abalo baboolela kuzoocita nzi?”
Wakandiingula kuti, “Aaya ngameja aakamwaya Juda kutegwa kutabi muntu naba omwe uukola, pele bafuzi aaba baboolela kuzoobayoosya akuzoosowa meja aaya kumisyobo yakalwana nyika ya Juda kuti bantu bayo bamwaikizyanye.”
Currently Selected:
Zekaliya 1: Tonga96
Highlight
Share
Compare
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
