Lute 3
3
Lute mbwaakajana Mwaalumi
1Buzuba bumwi Naomi banyinazyala Lute wakati, “Mwanaangu ino mbuti kuti ndakujanina ŋanda, kuti zintu zikweendele kabotu? 2Swiilila! Uulya Bowazi, uuli ababelesi mbookali aabo, ngusimukowa. Bona! Sunu masiku unoopupulula maila acuumino cakwe. 3Samba, unane tufuta, usame kabotu, uunke kucuumino, pele atazibi kuti nkoli mane kusikila akamanizye kulya akunywa. 4Lino aona ubone mpalede, eelyo uvumbule kumaulu aakwe ulale, uyookwaambila ncotikacite.” 5Lute wakaingula kuti, “Coonse ncomwandilailila njoocicita.”
6Eelyo Lute wakainka kucuumino, wacita mbubonya mbuli banyinazyala mbubakamulailila. 7Ciindi Bowazi naakamana kulya akunywa, alimwi kaboteledwe, wakaakulala kumamanino aacilwi camaila. Kalede Lute wakasika cabuumuzi wavumbula maulu aakwe walala. 8Lino akati kamasiku Bowazi wakatilimuka, wasanduka, wajana kuti kuli mukaintu uulede kumaulu aakwe. 9Wakamubuzya kuti, “Nduweni?”
Lute wakamwiingula kuti, “Ndime Lute mubelesi wako. Tee kayi nduwe ooelede kundilela mukuti uli wamukowa.”
10Mpawo Bowazi wakati, “Leza akuleleke, mwanaangu, nkaambo ooku kusyomeka kwako kuli ndime nkupati kwiinda nkookajisi kuli banyokozyala, kayi tookayanda balombe bacete nibaba bavubide. 11Lino utayoowi mwanaangu. Coonse cili buti ncooamba, nzoocicita, nkaambo basimunzima boonse balizi kuti ulizyedwe.
12“Lino ndime simukowanyoko kasimpe, pele nkwali simukowa umwi wini-wini. 13Ona masiku aano, lino bwaca buyo, kuti naa ooyo muntu ulazumina kukulela, ncibotu, pele kuti katayandi kucita oobo, Mwami Leza mbwali muumi, nzookulela. Lala, mane buce.”
14Aboobo Lute wakalala kumaulu aakwe, mane bwaca, pele wakabuka kakucili kooko. Eelyo Bowazi wakati, “Batazibi kuti kwasikide mukaintu okuno kucuumino.” 15Alimwi wakati, “Leta mulembo ngosamide uujate.” Lino wakamweelekela maila manji, wamupa, aboobo Lute wakapiluka kumunzi. 16Naakasika kuli banyinazyala, bakamubuzya kuti, “Ino weenda buti, mwanaangu?”
Mpawo Lute wakabaambila zyoonse Bowazi nzyaakamucitila. 17Wakati, “Wandipa aaya maila wati, ‘Toelede kupiluka acinkwamaanza kuli banyokozyala pe.’”
18Lino Naomi wakati, “Kkala, mwanaangu, mane ukazibe naa makani alaba buti. Nkaambo ooyo mwaalumi takoolyookezya pe, ulaamana makani sunu.”
Currently Selected:
Lute 3: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.