Lute 4
4
Bowazi mbwaakakwata Lute
1Lino Bowazi wakaya kumulyango mupati wamunzi, wakkala ooko. Nkabela kwakainda ooyo simukowa Bowazi ngwaakali kwaamba. Mpawo Bowazi wakati, “Musa, leela waano.” Lino wakaleya, wakkala. 2Bowazi wakasala baalumi bali kkumi akati kabapati bamunzi, wabaambila kuti, “Anywebo amukkalile waawa.” Lino bakakkala. 3Bowazi wakaambila simukowa ooyo kuti, “Naomi wakaboola kuzwa kunyika ya Mowabu, lino uyanda kuulisya caabilo canyika cakali ca Elimeleki mukwesu. 4Nkaambo kaako ndayeeya kuti ndeelede kukwaambila makani aaya aakuti ucuule caabilo eeci kumbele lyabantu aaba bakkede waawa bapati babantu bangu. Kuti naa ulayanda kucuula, ucuule. Pele kuti naa toyandi kucuula undaambile, kuti ndizibe, nkaambo taakwe muntu uumbi weelede kucuula ccita nduwe, kwamana ndime.”
Mpawo wakati, “Ndacuula.”
5Lino Bowazi wakati, “Mubuzuba oobo mbubonya nozooula muunda kuzwa kuli Naomi, uleelede kuzootolelezya Lute mukamufu Mumowabu, kuti ubusye zina lyamufu mucaabilo cakwe.”
6Simukowanyina ooyo wakati, “Nsikonzyi kucuula inga njoobisya caabilo cangu ndemwini. Cuule, nkaambo mebo nsikonzyi kucuula pe.”
7Lino kale-kale mucisi ca Isilayeli kwakali ciyanza cili boobu. Muntu ayanda kulya zina naa kuula lubono, wakali kusamununa ndyasyo yakwe, wapa mweenzinyina. Mbombuboobu mbubakali kusinizya makani mu Isilayeli.
8Aboobo ooyo simukowanyina naakaambila Bowazi kuti, “Koula omwini, wakasamununa ndyasyo yakwe.” 9Nkabela Bowazi wakaambila bapati abantu boonse kuti, “Ndinywe bakamboni. Mwabona kuti buzuba buno ndaula mbono zyoonse zya Elimeleki azyoonse zya Kiliyoni azya Maloni kuzwa kuli Naomi. 10Awalo Lute Mumowabu muka Maloni waba mukaintu wangu, abusye zina lyamufu mucaabilo cakwe, kuti zina lyamufu litalobi akati kababunyina nimuba mumunzi wakwe. Ndinywe bakamboni bangu sunu.”
11Lino bapati abantu boonse bakakkede amulyango mupati wamunzi bakati, “Tuli bakamboni. Mwami Leza acite kuti mukaintu ooyu ngotilete muŋanda yako abe mbuli Lacelo a Leya, nkaambo aaba bobilo mbibakayaka mukwasyi wa Isilayeli. Uvube mu Efulata akuba simpuwo mu Betelehemu. 12Bana aabo Mwami Leza mbayookupa amukaintu ooyu, bazooyaka mukwasyi mbuli wa Pelezi, ooyo Tamaa ngwaakazyalila Juda.”
Lunyungu Lwa Devedi
13Mbombuboobu Bowazi mbwaakakwata Lute. Lute naakamita wakazyala mwana mulombe. 14Mpoonya bakaintu bakaambila Naomi kuti, “Alumbwe Mwami Leza, nkaambo sunu taakusiya kuti ubule simukowanyoko uukulela. Mwana ooyu abe aampuwo mucisi ca Isilayeli. 15Uyookubukulusya akukulela mubucembele bwako, nkaambo mukamwanaako uukuyandisya, uukubotela kwiinda bana balombe bali ciloba, nguwamuzyala.” 16Lino Naomi wakabweza mwana ooyo, wakamufukatila kabotu waba sikumulela.
17Nkabela bakaintu mbobakakkede limwi bakati, “Naomi wazyalilwa mwana mulombe.”
Bakamuulika kuti Obedi. Ooyu nguwakali wisi Jese, wakazyala Devedi.
18Mbaaba balunyungu lwa Pelezi: Pelezi wakazyala Heziloni, 19Heziloni wakazyala Lamu, Lamu wakazyala Aminadabu, 20Aminadabu wakazyala Nasyoni, Nasyoni wakazyala Salimoni, 21Salimoni wakazyala Bowazi, Bowazi wakazyala Obedi, 22Obedi wakazyala Jese, nkabela Jese wakazyala Devedi.
Currently Selected:
Lute 4: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.