Baloma 9
9
Leza abantu bakwe
1Ndaamba cakusinizya muli Kilisito, nsibeji pe. Awalo moyo wangu uusololelwa a Muuya Uusalala ulandizuminina 2kuti nsibeji nindaamba kuti ndiuside kapati. Iiyi, ndaciswa kapati lyoonse nkaambo ka Bajudama. 3Nicali kukonzeka nindazumina kusinganyizigwa a Leza nketali wa Kilisito mubusena bwabamusyobo wangu. 4Aaba mba Isilayeli aabo Leza mbaakasala kuti babe bana bakwe akupaba bulemu. Leza wakapanga cizuminano ambabo, eelyo wakapa Milawo yakwe. Wakabaiisya mbobeelede kumukomba, 5akupa basikale babo zisyomezyo alimwi Munanike wakasyomezegwa ngwamusyobo wabo kwaamba buntu bwakwe. Leza uulela zyoonse aalumbaizigwe lyoonse. Akube boobo!
6Lino takuli kuti Leza tabambi zisyomezyo zyakwe pe. Kayi tabali boonse bazyalwe mumusyobo wa Isilayeli kuti mba Isilayeli ncobeni. 7Nkokwaamba kuti takuli kuti boonse balunyungu lwa Abulahamu mbiba Leza. Kayi Leza wakasyomezya Abulahamu kuti, “Bana ba Izaka bayootegwa mbana ba Abulahamu.” 8Nkokwaamba kuti takuli kuti boonse bana ba Abulahamu mbana ba Leza pe. Balunyungu lwakwe beni-beni mbabaabo bakazyalwa kweendelana acisyomezyo ca Leza. 9Nkaambo majwi aa Leza acisyomezyo aamba boobu, “Ciindi eecino mwaka wazinguka, njoomuleleka Sala, nkabela uyooba amwana.”
10Kutali buyo boobo. Taata Izaka a Lebeka bakazyala bana bobilo. 11-12Pele bana aabo kabatanazyalwa, nkokuti kabatanacita cibotu naa cibyaabi, Leza wakaambila Lebeka kuti, “Mupati uyoobelekela muce wakwe.” Cakaba boobo mukuti kusalwa kwamuce kube mbuli Leza mbwaakacibamba. Kusalwa ooku tiikwakacitika akaambo kamilimo njibakacita pe, pele nkaambo Leza mbwaakasala oobo. 13Kayi Malembe alati, “Ndamuyanda Jakobo, pele Isau ndimusulide.”
14Ino twaambe buti amakani aaya? Sena Leza taluleme mukucita boobo? Peepe, takuli boobo. 15Nkaambo wakaambila Mozesi kuti, “Njooba aalweengelelo kuli yooyo ngweyanda kubeda aalweengelelo, alimwi njooba aankumbu kuli yooyo ngweyanda kubeda aankumbu.” 16Aboobo cipati tacili ceeco ciyanda muntu, naa eezyo nzyasola kucita, pele cipati ndweengelelo lwa Leza. 17Mbootubala mu Malembe, Leza wakaambila Falo kuti, “Ndakubikka abwami kuti ntondezye nguzu zyangu, akuti zina lyangu lidume mbiili nyika.” 18Aboobo twabona kuti Leza ulabeda aalweengelelo ooyo ngwayanda, alimwi ulacitya kuti umwi abe sicinguni.
Zyabukali azyalweengelelo lwa Leza.
19Wamvwa boobo inga yebo ulati, “Ino nkaambo nzi Leza ncacivuntauzya bubi bwabantu? Ani nguni uunga walesya Leza kucita ncaayanda?” 20We! omuntu buyo, nduweni kuti ukazyanye a Leza? Sena cibiya cilakonzya kwaambila mubumbi kuti, “Ino wandibumbila nzi boobu?” 21Sena mubumbi tajisi buuya bwakukonzya kubumba kuzwa kumulwi omwe zibiya zyobilo, cimwi cibotu cilangwa kabotu, cimwi cakusanga?
22Nzezizyo Leza nzyacita. Nikuba kuti wakali kuyanda kubasubula mubukali bwakwe akutondezya nguzu zyakwe, pele wakakkazika moyo. Leza wakabeengelela nikuba kuti bakeelede kunyonyoonwa. 23Alimwi mukucita boobo wakayanda kutondezya bulemu bwakwe bupati kulindiswe, swebo mbaakabeda aalweengelelo akutubambilila limwi bulemu. 24Ndiswe baabo Leza mbaakaita, kutali buyo kuzwida ku Bajuda balikke pe, pele akuzwida kuli bamasi. 25Mbubonya mbuli Leza mbwaamba muli Hosiya,
“Aabo batakali ‘bantu bangu’ njoobaita kuti mbantu bangu.
Ayooyo musyobo ngwindatakali kuyanda, njoouyanda.
26Nkabela ooko nkobakaambidwe kuti,
‘Tamuli bantu bangu,’
nkobayooambwa kuti, ‘Mbantu ba Leza uupa buumi.’”
27Awalo Izaya ulaambisya kuti, “Nikuba kuti bantu ba Isilayeli mbanji kapati mbuli musenga wamulwizi. Bayoofutulwa mbace buyo. 28Nkaambo lubeta lwa Leza kubantu baansi aano luyoocitika cakufwambaana kakunyina kudonaika.” 29Alimwi nguwenya Izaya wakasinsima kuti,
“Leza Mutalabala naatakatusiila bana,
aswebo nitwakaloba mbuli Sodomu, nitwakaloba mbuli Gomola.”
Baisilayeli mbubakayeeyela Makani Mabotu
30Ino twaambe buti? Bamasi tiibakali kubuyandaula bululami bwa Leza, pele Leza wakabaamba kuti mbalulami kwiindila mulusyomo lwabo. 31Pele Baisilayeli aabo bakali kusola kuba balulami mukubamba Mulawo, bakakacilwa. 32Nkaambo nzi? Nkaambo bakali kuyanda kuba balulami kutali mukusyoma, pele mukusola kucita milimo mibotu. Bakalebwa abbwe lileba, 33mbuli mbokulembedwe kuti,
“Amuswiilile, ndabikka mu Ziyoni bbwe lileba,
mwaala uufumpula.
Ooyo uusyoma mulinguwe,
takooyoofwa nsoni pe.”
Currently Selected:
Baloma 9: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
