Ciyubunuzyo 9

1Mungelo wasanu wakasiba mweembo wakwe. Eelyo ndakabona nyenyezi iilya yakawida ansi kiipegwa kkii wamulindi uutagoli. 2Nyenyezi yakajula mulindi uutagoli ooyu, nkabela kwakasunta busi. Busi oobu bwakali mbuli kuti buzwa mubbibi lyamulilo. Lino mumuni wazuba aluuwo zyakasizigwa abusi bwakali kuzwa mumulindi uutagoli. 3Lino kuzwa mubusi oobo kwakazwa cikwikwi cakaza ansi. Calo cakapegwa nguzu zyeelene azyatubanze. 4Cakaambilwa kuti citanyonyooni bwizu noziba zisamu nikaba kasyango kali buti, pele kuti cipenzye buyo bantu aabo batagantidwe acidinto ca Leza ankumo zyabo. 5Tiicakazumizigwa kubajaya pe, pele cakazumizigwa buyo kubapenzya kwamyezi yosanwe. Kucisa kwakupenzya kwaco kwakali mbuli kwamuntu naalumwa kabanze. 6Lino mumyezi yosanwe eeyo bantu bayooyandaula lufu, pele tabakooyoolujana. Bayooyanda kufwa, pele lufu luyoobatija.

7Cikwikwi eeco cakali mbuli mabbiza aalibambililide nkondo. Aamitwe yaco kwakali zintu zilangika mbuli misini yangolida, alimwi cakali abusyu mbuli bwabantu. 8Masusu aaco akali malamfu mbuli aabakaintu. Meno aaco akali mbuli meno aabasyuumbwa. 9Zyamba zyaco zyakali kwabilidwe antobo zyakali kulangika mbuli zikwabilizyo zyakapangwa kuzwa kulubulo. Muzumo wamababa aaco wakali mbuli muzumo wankalaki zinji zikwelwa mabbiza aazuzila kunkondo. 10Cikwikwi eeco cakalijisi micila iiluma mbuli kabanze. Mumicila eeyo mumwakali nguzu zyaco zyakupenzya bantu kwamyezi yosanwe. 11Cilijisi mwami uucilela, walo ooyu uuli ngomungelo uulanga mulindi uutagoli. Zina lyakwe mu Cihibulu ngu Abbadoni, mu Cigiliki ngu Apoliyoni, (nkokwaamba kuti, “Sikunyonyoona”).

12Penzi lyakusaanguna lyamana, kwasyaala aabili.

13Mpoonya mungelo wacisambomwe wakasiba mweembo, mpawo ndakamvwa jwi lizwa kuziswi zyone zyacipaililo cangolida cili kumbele lya Leza. 14Jwi eeli lyakaambila mungelo wacisambomwe wakajisi mweembo kuti, “Angununa bangelo bone baangilidwe kumulonga mupati wa Yufuletisi!” 15Eelyo wakaangununa bangelo bone bakalibambilide, ciindi, buzuba, mwezi, alimwi amwaka kuti bajaye cipaanzi catatu cabantu. 16Nkabela ndakaambilwa kuti mweelwe wabasilumamba uli zyuulu-zyuulu. 17Mucilengaano eeci ndakabona mabbiza abaabo bakatantide ali ngawo. Bakalijisi ntobo zyakali kusalala pyu mbuli mulilo, alimwi kazilangika mbuli bbwe lyacijulu-julu, ambuli mabwe aasalufa. Mitwe yamabbiza aaya yakali kuboneka mbuli yabasyuumbwa, nkabela kumilomo yawo kwakali kuzwa mulilo, busi, amabwe aasalufa. 18Cipaanzi catatu cabantu aaba cakajaigwa amapenzi aaya otatwe, mulilo, busi, alimwi amabwe aasalufa aakali kuzwa mumilomo yamabbiza. 19Nguzu zyamabbiza aaya zili mumilomo amumicila yawo. Micila yawo iboneka mbuli nzoka, ilijisi mitwe, aboobo alabelesya micila kucisa bantu.

20Lino kwakasyaala bantu bamwi aabo batakajaigwa amapenzi aaya, nikuba boobo taakwe nibakeempa kuti basiye zeezyo nzibakalipangila. Tiibakaleka kukomba myuuya mibi, zibumbwa zyangolida, zyansiliva, zyamukuba, zyamabwe, zyazisamu, zitaboni, aziteendi naa kumvwa. 21Alimwi taakwe nibakaleka bujayi, bulozi, bumambe, abubbi bwabo.

Currently Selected:

Ciyubunuzyo 9: Tonga96

Highlight

Copy

Compare