Ciyubunuzyo 10
10
Zyamungelo akabbuku kaniini
1Lino ndakabona mungelo uumbi wanguzu kaseluka kuzwa kujulu. Wakalinjide mukkumbi, amutwe wakwe kwakali fulicoongo. Busyu bwakwe bwakali kubala mbuli zuba, maulu aakwe akali mbuli misumpuululu yamulilo. 2Wakajisi kabbuku kajulidwe mujanza. Lino kuulu kwakwe kwalulyo kwakalyata mulwizi, kwalumwensi kwakalyata anyika njumu. 3Eelyo wakapozomoka ajwi pati lili mbuli kuvuluma kwasyuumbwa. Naakamana kupozomoka boobo, mizumo iili ciloba yakandindima. 4Lino mizumo niyakamana kundindima, ndakatilembe. Pele ndakamvwa jwi lyakazwa kujulu lyakati, “Utaziyubununi eezyo myuuya iili ciloba nciyaamba. Utazilembi pe!”
5Mpoonya mungelo ngundakabona kaimvwi mulwizi aanyika wakatambika janza lyalulyo kujulu 6akukonka muzina lya Leza uupona mane kukabe kutamani, ooyo wakalenga julu anyika alwizi, azyoonse zili muli nzizyo. Mungelo ooyo wakati, “Ciindi ono camana! 7Mungelo waciloba asiba mweembo wakwe, Leza nacite mbuli bwaamba maseseke ngaakaamba kwiindila mubabelesi bakwe basinsimi.”
8Lino jwi ndilyonya ndindakamvwa lyakazwa kujulu lyakandaambila alimwi kuti, “Koya ukabweze kabbuku kajulidwe mujanza lyamungelo wiimvwi alwizi aanyika.”
9Nkaako ndakaswena munsi lyamungelo ooyo, ndakamwaambila kuti andipe kabbuku. Walo wakati, “Bweza, kalye, mwida kayoolula, pele mukanwa kanoolweela mbuli buci.”
10Lino ndakabweza kabbuku kakali mujanza lyamungelo. Nindakakalya, mukanwa kakali kulweela mbuli buci, pele nindakakamena mwida mwakalula lu. 11Mpoonya ndakaambilwa kuti, “Alimwi uleelede kuti waambilizye mulumbe wa Leza kumisyobo minji, kuzisi zinji, kumilaka minji, akubami banji.”
Currently Selected:
Ciyubunuzyo 10: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
