Ciyubunuzyo 21

Zyajulu lipya anyika mpya

1Lino ndakabona julu lipya anyika mpya. Nkaambo julu lyakusaanguna anyika yakusaanguna zyakamana, alwizi lwakazimaana. 2Eelyo ndakabona munzi uusalala, Jelusalemu mupya, kuboola ansi kuzwa kuli Leza kujulu. Wakalibambidwe mbuli nabwiinga mbwalibambilila mulumi wakwe. 3Mpawo ndakamvwa jwi pati lyakazwa kucuuno cabwami lyakati, “Lino munzi wa Leza wakkala akati kabantu! Leza uyookkala ambabo, abalo bayooba bantu bakwe. Iiyi, Leza lwakwe uyookkala ambabo, alimwi uyooba Leza wabo. 4Nkabela uyoosansamuna misozi yabo. Takukooyooba limbi lufu, kuusa kulila, nikuba kuciswa. Zintu zyakale zyoonse zyamana.”

5Mpawo ooyo uukkede acuuno cabwami wakati, “Amubone, zintu zyoonse ndazibambulula zyaba zipya!” Alimwi wakandaambila kuti, “Kocilemba eeci, nkaambo majwi aaya ngakasimpe alimwi aleelede kusyomwa.” 6Alimwi wakandaambila kuti, “Lino kwamana! Ndime mutaanzi amusyaalizi, matalikilo amamanino. Kufumbwa ooyo uufwide nyota, njoomuzumizya kunywa buyo kukasensa kamaanzi aapa buumi. 7Ooyo uuzunda uyookona zintu eezi. Njooba Leza wakwe, awalo uyooba mwanaangu. 8Pele bakandu abatasyomi, bayanda zisesemya abajayi, basibwaamu abalozi, bakomba mituni ababeji, busena bwabo boonse aaba ndibbibi lyamulilo amabwe aapisya aasalufa, lwalo luli ndolufu lwabili.”

Jelusalemu mpya

9Lino umwi wabangelo bali ciloba bajisi mitiba iili ciloba iizwide mapenzi aali ciloba aamamanino, wakaboola kulindime, wati, “Boola, nkutondezye nabwiinga, mukaintu wa Mwanaa mbelele.” 10Munguzu zya Muuya Uusalala, mungelo uulya wakanditola kucilundu cipati alimwi cilamfu, eelyo wakanditondezya munzi uusalala wa Jelusalemu, kuuboola ansi kuzwa kuli Leza kujulu. 11Wakali kumweka abulemu bwa Leza, nkabela wakali kweebeka mbuli bbwe libalangalisya. 12Munzi ooyu wakalijisi bwaanda bupati alimwi bulamfu. Bwaanda oobu bwakajisi milyango iili kkumi aibili, alimwi kwakali bangelo bali kkumi ababili bakali kwiilindila. Mumilyango eeyi kwakalembedwe mazina aamisyobo ya Isilayeli iili kkumi aibili. 13Kulubazu lomwe-lomwe kwakali milyango yotatwe, yotatwe yakali kujwe, yotatwe yakali kunyika, yotatwe yakali kumusanza, aimwi yotatwe yakali kumbo. 14Bwaanda bwamunzi ooyu bwakali aantalisyo zyamabwe aali kkumi aabili, aawo akalembedwe mazina aabatumwa bali kkumi ababili ba Mwanaa mbelele. 15Mungelo ooyo wakali kwaambaula kuli ndime, wakajisi musako wakupimya wangolida, wakapima munzi amilyango alimwi abwaanda bwawo. 16Munzi ulijisi zyooko zyone, zyoonse zileelene, bulamfu abwaamba bwakaleelene. Mpawo wakapima munzi amusako, wakajana kuti ulampa zimpanga zili cuulu amyaanda yosanwe, bulamfu abwaamba abwiime zyoonse zyakaleelene. 17Lino mungelo wakapima bwaanda bwawo, wakajana kuti buli tukokola tuli myaanda yobilo akkumi acisambomwe, kweendelana akupima kwakwe. 18Bwaanda bwakayakidwe abbwe libalangalisya, pele munzi wini wakayakidwe angolida iini-ini yakali kubalangala mbuli cimboni-mboni. 19Lwiimbi lwabwaanda lwakabotezegwa amabwe meebesi aamisyobo-misyobo. Bbwe lyakusaanguna lyalwiimbi oolu lyakali kubalangalisya, lyabili lyakali bbwe lyacijulu-julu, lyatatu lyakali bbwe lyamakwalala aazingulukide, lyane lyakali bbwe lyamweemvwe, 20lyasanu lyakali lyamakwalala aacibize, lyacisambomwe lyakali bbwe lisalala pyu, lyaciloba lyakali bbwe lyacituntulwa, lyalusele lyakali bbwe lyanyanzabili, lyafuka lyakali bbwe lyacisuku, lyakkumi lyakali bbwe lili mbuli mululwe, lyakkumi alimwi lyakali bbwe lyacikambwe, lyakkumi aabili lyakali bbwe lyacisombo. 21Alimwi milyango iili kkumi aibili njangale zili kkumi azibili. Mulyango omwe-omwe wakajisi ngale yomwe, awalo mugwagwa wamunzi wakali wangolida, ulasalala alimwi ulabalangala ngwa.

22Lino mumunzi ooyu tiindakabona ŋanda ya Leza pe, nkaambo Mwami Leza Singuzuzyoonse a Mwanaa mbelele njeŋanda yawo. 23Mumunzi ooyu tamuyandiki zuba nuuba mwezi, nkaambo bulemu bwa Leza mbobubala, alimwi Mwanaa mbelele ndelambe lyawo. 24Nkabela bantu bamisyobo yoonse bayooenda mumumuni wawo, abalo bami baansi bayooleta bulemu bwabo mulinguwo. 25Milyango yawo tiikajalwi buzuba boonse, nkaambo ooko kunoonyina masiku pe. 26Alimwi bayooleta kulinguwo bulemu alubono lwamasi oonse. 27Pele mumunzi oomo tamukanjili cintu nociba comwe citasalali nobaba bantu bacita zisesemya naa babeja. Bantu bayoonjila mumunzi ooyo mbaabo bajisi mazina aalembedwe mubbuku lyabuumi lya Mwanaa mbelele.

Currently Selected:

Ciyubunuzyo 21: Tonga96

Highlight

Copy

Compare