Ciyubunuzyo 22
22
1Amane mungelo wakanditondezya alimwi mulonga wamaanzi aapa buumi aabalangala ngwa. Mulonga ooyu wakali kukunka kuzwa kucuuno ca Leza aca Mwanaa mbelele. 2Wakali kukunkila mukati kamugwagwa wamunzi. Kulubazu lomwe-lomwe lwamulonga kwakali musamu uupa buumi omwe. Musamu ooyu uzyala micelo mwezi amwezi mumwaka omwe, matu aawo ngakusilisya bantu bamisyobo yoonse. 3Mumunzi ooyu taakwe cintu nociba comwe cisingayizidwe a Leza ciyoojanwa pe.
Cuuno ca Leza aca Mwanaa mbelele zinooli mumunzi ooyu, nkabela babelesi bakwe bayoomukomba. 4Bayoobona busyu bwakwe, alimwi zina lyakwe linoolembedwe ankumo zyabo. 5Takuciyoobi limbi masiku pe. Bantu tabakayandi limbi mumuni walambe nouba wazuba, nkaambo Leza lwakwe mwini uyooba ngomumuni wabo, nkabela balo bayoolela oomo mane kukabe kutamani.
Zyakuboola kwa Jesu
6Lino mungelo wakandaambila kuti, “Majwi aaya ngakasimpe alimwi aleelede kusyomwa. Mwami Leza uupa Muuya kubasinsimi, watuma mungelo wakwe kuti atondezye babelesi bakwe eezyo zyeelede kucitika lino-lino.”
7Jesu ulati, “Amubone, ndafwambaana kuboola! Ulilelekedwe ooyo uuswiilila majwi aabusinsimi aali mubbuku eeli!” 8Ndime Joni, nindakamvwa akubona zintu eezi. Lino nindakazimvwa akuzibona, ndakali waala ansi kumaulu aamungelo wakanditondezya nzizyo kuti ndimukombe. 9Pele walo wakandaambila kuti, “Utaciti boobu pe, nkaambo mebo ndimubelesinyoko, ndiumwi wabana bokwanu basinsimi, alimwi ndiumwi wabaabo baswiililisya majwi aabusinsimi aali mubbuku eeli! Komba Leza!” 10Mpawo wakandaambila kuti, “Utasisi majwi aabusinsimi aali mubbuku eeli nkaambo ciindi cangawo cili aafwiifwi. 11Ooyo uucita zibi kaciya bucita, awalo ooyo uucita zisesemya ataleki kucita zisesemya, ooyo uululeme acite ziluleme, awalo ooyo uusalala kacisalala.”
12Jesu ulati, “Amubone! Ndafwambaana kuboola, ndaboola ndaletelela abulumbu bwangu bwakulumbula muntu omwe-omwe kweendelana anzyaakacita. 13Ndime Alufa a Omega, mutaanzi amusyaalizi, matalikilo amananino.”
14Balilelekedwe aabo basanzya majansi aabo, kuti bazumizigwe kulya micelo yamusamu uupa buumi akunjila mumilyango yamunzi. 15Pele anze lyamunzi mpaali babwa abalozi, basibwaamu abajayi, bakomba mituni boonse abayanda kubeja akucita milimo yabubeji.
16“Ndime Jesu nindatuma mungelo wangu kuti azooambilizye zintu eezi kulindinywe nomuli mumbungano. Mebo ndiwalunyungu lwa Devedi, ndime ntanda iimwekesya.”
17Muuya Uusalala anabwiinga balati, “Boola!”
Ayooyo uumvwa makani aaya aambe kuti, “Boola!”
Kufumbwa ooyo uufwide nyota aboole apegwa cabuyo maanzi aapa buumi.
Zyamamanino
18Mebo nde Joni, njanda kucenjezya muntu umwi aumwi uuswiilila majwi aabusinsimi bwamubbuku eeli kuti, kufumbwa muntu uuyungizya cintu kumakani aaya, Leza uyoomuyungizizya mapenzi aalembedwe mubbuku eeli. 19Awalo ooyo uugwisya cintu kumajwi aabbuku lyabusinsimi eeli, Leza uyoogwisya caabilo cakwe kumusamu uupa buumi, amumunzi uusalala, zyalo zili zilembedwe mubbuku eeli.
20Ooyo uulungulula makani aaya ulati, “Iiyi, ncobeni mbokubede! Ndafwambaana kuboola.”
Akube boobo! Koboola ncobeni, Mwami Jesu!
21Mwami Jesu amubede aaluse nyoonse. Akube boobo.
Currently Selected:
Ciyubunuzyo 22: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
