Ciyubunuzyo 12

Zyamukaintu atosi

1Mpawo kwakaboneka cintu cipati cigambya kujulu. Kwakali mukaintu wakasamide zuba. Kunsi lyazituta zyakwe kwakali mwezi, nkabela amutwe kwakali musini wanyenyezi zili kkumi azibili. 2Mukaintu ooyu wakali aafwiifwi kuzyala, lino naakayanda kuzyala wakalila akaambo kakucisa kwansungo.

3Alimwi kwakalibonya acimwi cintu cigambya mujulu. Kwakalibonya tosi lisalala pyu, lijisi mitwe iili ciloba ameja aali kkumi. Nkabela aamutwe omwe-omwe kwakali musini. 4Mucila walyo wakavupula cipaanzi catatu canyenyezi akuziwisizya ansi. Lino tosi eelyo lyakalindilila munsi lyamukaintu wakali kuyanda kuzyala, mukuti azyala buyo lilye mwana. 5Mukaintu wakazyala mwana mulombe, ooyo uuyoolela masi oonse amusako walubulo, pele mwana ooyo wakatolwa kujulu kuli Leza kuli cuuno cakwe. 6Mukaintu wakatijila kunkanda nkwajisi busena mbwaakabambilwa a Leza, ooko nkwayoobambwa kabotu kwamazuba aali cuulu amyaanda yobilo amakumi aali cisambomwe.

7Mpoonya kwakaba nkondo kujulu. Mikayele abangelo bakwe bakalwana tosi liya. Alyalo tosi abangelo balyo bakalwana, 8pele bakazundwa, alimwi bakanyina busena kujulu. 9Nceciindi eeco tosi eelyo nilyakasowelwa ansi, njenzoka yakaindi, iitegwa Siluuni naa Saatani, njiicenga bantu boonse baansi. Yakasowelwa ansi aano antoomwe abangelo bayo boonse.

10Mpawo ndakamvwa jwi pati kuzwa kujulu lyakati, “Lino Leza watufutula! Watondezya nguzu zyakuti ngo Mwami. Awalo Munanike wakwe watondezya bulelo bwakwe! Nkaambo ooyo wakali kubejelezya bakwesu kuli Leza wesu sikati amasiku watandwa kujulu. 11Bakwesu bakamuzunda kwiindila mubulowa bwa Mwanaa mbelele amajwi aakasimpe aayo ngobakaambilizya. Aaba bakalilibambilide nikuba kwaaba buumi bwabo. 12Nkaambo kaako sekelela ojulu anywebo nomukkala muli ndilyo! Pele maawe kuli ndinywe nonyika alwizi! Nkaambo Siluuni wamuselukila abukali bupati, kayi ulizi kuti ciindi ncacijisi ncisyoonto kapati.”

13Lino tosi nilyakabona kuti lyasowelwa ansi, lyakatandaanya mukaintu wakazyala mwana mulombe. 14Pele mukaintu wakapegwa mababa obilo aali mbuli aasikwaze mupati kutegwa akonzye kuuluka asiye nzoka eeyi akuya munkanda, ooko nkwayoobambwa kabotu kwaciindi, aziindi, acisela kuyoowa kuti ilamubona. 15Lino kuzwa kumulomo wanzoka eeyi kwakazwa maanzi manji aakuti akavupule mukaintu ooyu kuti atolwe angawo. 16Pele nyika yakagwasya mukaintu ooyu, yakaanduka, yakamena maanzi aakapoomonwa a tosi. 17Eelyo tosi lyakaindilila kunyemena mukaintu, lyakainka kuyoolwana balunyungu lwamukaintu ooyu bakasyaala babamba milawo ya Leza, aabo baambilizya zya Jesu cakasimpe. 18Lyakaima ankomwe yalwizi.

Currently Selected:

Ciyubunuzyo 12: Tonga96

Highlight

Copy

Compare