Ciyubunuzyo 11

Zyabakamboni bobilo

1Mpawo ndakapegwa kasako kakupimya akwaambilwa kuti, “Nyamuka upime ŋanda ya Leza wamana upime acipaililo, alimwi ubale abantu aabo bakombela mumo. 2Pele lukwakwa lwaŋanda ya Leza utalupimi ulusiye, nkaambo lwapegwa kuli bakunze. Aabo bayoolyatauka munzi uusalala kwamyezi iili makumi one aibili. 3Kwamana ndiyootuma bakamboni bangu bobilo, banoosamide masaka kuti bakaambilizye mulumbe wa Leza kwamazuba aali cuulu amyaanda yobilo amakumi aali cisambomwe.”

4Bakamboni bobilo aaba, mmisamu yobilo yamaoliva amalambe obilo aayo aaimvwi kumbele lya Mwami wanyika. 5Kuti naa kwaba uuyanda kubacisa kulazwa mulilo kumilomo yabo iinyonyoona basinkondonyina. Kufumbwa uuyanda kubacisa uuyoonyonyoonwa munzila njiyonya eeyi. 6Bakamboni aaba balijisi nguzu zyakusinka julu kuti mvula itawi kwamazuba ngobaambilizya mulumbe wa Leza. Alimwi balijisi nguzu zyakusandula maanzi kuti abe bulowa. Balakonzya kuleta mwiika nuuba buti munyika kufumbwa ciindi ncibayanda.

7Bamanizya kwaambilizya mulumbe wabo, cinyama cizwa mumulindi uutagoli, ciyoobalwana. Cinyama eeci ciyoobazunda alimwi akubajaya. 8Nkabela mitumba yabo iyooalabana mumigwagwa yamunzi mupati, ooko Mwami wabo nkwaakakankamininwa. Zina lyakusempuzya lyamunzi ooyo ngu Sodomu naa Ijipiti. 9Lino bantu bazwa kuzisi zyoonse, kumisyobo yoonse, akumilaka yoonse, bayoobona mitumba yabo kwamazuba otatwe acisela, pele tabakooyoobazumizya kuti bazikkwe pe. 10Bantu baansi bayookondwa akaambo kalufu lwabasinsimi aabo bobilo. Bayoosekelela akupana zipego, nkaambo basinsimi bobilo aabo mbibakacita kuti bantu bapenge kapati. 11Eelyo naakainda mazuba otatwe acisela, muuya uupa buumi uuzwa kuli Leza wakanjila mulimbabo. Bakabuka baima, nkabela aabo bakababona bakayoowa kapati. 12Mpawo basinsimi bobilo baya bakamvwa jwi pati lyakazwa kujulu, lyakati kulimbabo, “Amuze kuno.” Lino basinkondonyina kabalangilide, bakatanta kujulu mukkumbi. 13Lino ciindi eeco nciconya, nyika yakazungaana kapati, eelyo cipaanzi cakkumi camunzi cakawa, nkabela bantu bakafwa mukuzungaana kwanyika ooku bakali zyuulu zili ciloba. Bantu bakasyaala bakayoowa kapati, eelyo bakalemeka Leza wakujulu.

14Penzi lyabili lyamana, pele penzi lyatatu lilaafwiifwi kuboola!

Zyamweembo waciloba

15Mungelo waciloba wakasiba mweembo wakwe, eelyo kwakaba kuyobeka kwamajwi kujulu kati, “Bwami bwanyika lino bwaba bwa Mwami wesu a Munanike wakwe, nkabela uyoolela mane kukabe kutamani!” 16Mpawo bapati baya bali makumi obilo abane bakkede azyuuno kumbele lya Leza, bakavuntama, bakomba Leza 17bati,

“Twakulumba O Mwami Leza Singuzuzyoonse, Uuliko, Wakaliko.

Twakulumba nkaambo lino watondezya nguzu zyako mpati akutalika kulela.

18Bantu batakuzi bakanyema,

lino ciindi casika cakutondezya bukali bwako,

aciindi cakubetekwa kwabafu.

Alimwi ciindi casika cakupa bulumbu kubabelesi bako,

basinsimi abasalali, abaabo balemeka zina lyako, baniini abapati.

Ciindi casika cakuti unyonyoone aabo banyonyoona nyika.”

19Mpoonya ŋanda ya Leza mujulu yakajaluka, nkabela muŋanda oomo mumonya kwakaboneka Bbokesi lya Cizuminano. Eelyo kwakatalika kulaba ndabo, mabbalu-bbalu, mizumo, kuzungaana kwanyika, acivulamabwe cipati.

Currently Selected:

Ciyubunuzyo 11: Tonga96

Highlight

Copy

Compare