Intembauzyo 94
94
1Nduwe oosubula babi, O Mwami Leza, tondezya bukali bwako.
2Nyamuka omubetesi wanyika, basikulisumpula ubalumbule bweelede bubi bwabo.
3O Mwami Leza, ino nciindi cilamfu cilibuti,
cilaba ciindi cilamfu cilibuti cakuti basizibi kabasekelela?
4Balaamba majwi aakulisumpula, basikucita zibi boonse balibikka antu.
5Bapwayaula bantu bako, O Mwami Leza, badyaminina lukono lwako.
6Bajaya bamukabafu abazwa masi, balajailizya abamucaala.
7Baamba kuti, “Leza taboni, Leza wa Jakobo takwe makani.”
8Amumvwe nywebo noziyanga akati kabantu, nywebo nobafuba-fuba,
ino muyoopampuka lili?
9Ooyo wakabikka kutwi, sena tamvwi? Ooyo wakabikka liso, sena taboni?
10Sena ooyo uukalalila bamasi tasubuli? Sena ooyo wiisya bantu tajisi luzibo?
11Mwami Leza, nguuzi miyeeyo yabantu mbwiibede, ulizi kuti tiigwasyi.
12Muntu ooyo ngolaya, O Mwami Leza, ulilelekedwe,
ulilelekedwe muntu ooyo ngoiisya kuzwa mumulawo wako.
13Ngomuntu ngoumbulizya muciindi camapenzi, kusikila basizibi basidwe dindi.
14Mwami Leza tatitakate bantu bakwe, tatilekelezye lukono lwakwe.
15Bululami buyoojanwa alimwi munkuta, baluleme boonse bayoobutobela.
16Nguni uukonzya kundilwanina bantu babi?
Nguni uukonzya kundiiminina mukulwana basimucita zibi?
17Kuti Mwami Leza naatakandigwasya, nikwalikunga sunu ndakafwa kale, ndakalyuumuzya.
18Nindakati, “Njanda kutezemuka.”
Mwami Leza, okandikwabilila aluyando lwako lutazungaani.
19Nindakali kulibilika kapati, okanduumbulizya akundipa kukondwa mumoyo.
20Sena inga wayanzana abantu, bantu babikka milawo iizumizya zibi?
21Bantu aaba balamvwana kuti balwane baluleme, bape batakwe milandu cisubulo calufu.
22Pele cikwabilizyo cangu, ngu Mwami Leza, ngo Leza wangu, mulinguwe mwenjubila.
23Ulasubula babi, ulabanyonyoona akaambo kabubi bwabo.
Masimpe, Mwami Leza wasu, uyoobanyonyoona.
Currently Selected:
Intembauzyo 94: Tonga96
Highlight
Share
Compare
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
