Intembauzyo 89
89
Lwiimbo lwa Etani Muezula. Masikili
1Kukabe kutamani ndinooimba zyaluyando lwako lutazungaani,
O Mwami Leza, njoolungulula zyakusyomeka kwako kumazyalani oonse.
2Njooambilizya zyaluyando lwako lutazungaani,
lukkalilide mbuli julu.
3Wakaamba kuti, “Ndakapanga cizuminano amusale wangu,
ndakakonkezya kuli Devedi mubelesi wangu kuti,
4‘Lunyungu lwako njoolukkazika akutamani,
cuuno cako cabwami ciyookkala kwamazyalani oonse.’”
5Ijulu alitembaule zigambya zyako, O Mwami Leza,
alitembaule zyakusyomeka kwako mumbungano yabasalali.
6Nguni nimuba mujulu uukonzya kweelana a Mwami Leza?
Nguni akati kabakujulu uukonzya kuba mbuli Mwami Leza?
7Leza ulalemekwa kapati mumbungano zyabasalali,
ulayoowegwa kwiinda boonse bamweengelede.
8O Mwami Leza wamakamu, nguni ulaanguzu mbulinduwe?
O Mwami Leza, kusyomeka kwako kulikuzingulukide.
9Nduwe weendelezya lwizi lupati, nduwe oobatamika mayuwe naayuntaana.
10Okapwayaula Lahabu, cipangaliko camumaanzi,
caba mbuli kuti cilifwide kale.
Anguzu zyajanza lyako wakamwaya basinkondonyoko.
11Julu anyika nzizyako, nyika azyoonse zili mumo zyakalengwa anduwe.
12Mabazu aakunyika akumusanza nduwe wakaalenga oonse.
Zilundu zya Taboo a Hemani zilaimba cakutangala muzina lyako.
13Kuboko kwako kulaanguzu, janza lyako ndiyumu, janza lyako lyalulyo lilalumbaizigwa.
14Cuuno cako cabwami cisiminide abululami,
bululami bwakubeteka cakutasalulula,
luyando lutazungaani akusyomeka kwako zilaboneka muli zyoonse nzyocita.
15Balilelekedwe boonse aabo bakukomba anyimbo,
aabo beenda mumumuni wako, O Leza.
16Balatangala muzina lyako buzuba boonse,
balakulumbaizya nkaambo kabululami bwako.
17Bulemu anguzu zyabo nduwe, muluse lwako tulajana nguzu.
18Ncancobeni kuti, ntobo yesu izwa ku Mwami Leza,
mwami wesu uzwa kuli Uusalala wa Isilayeli.
19Kale-kale wakaambila bantu bako basyomeka mucilengaano kuti,
“Ndapa silumamba nguzu, ndasumpula mukubusi umwi akati kabantu.
20Ndajana Devedi mubelesi wangu, ndamunanika mafuta aangu aasalala.
21Janza lyangu linoomugwasya, masimpe, kuboko kwangu kunoomuyumya-yumya.
22Taakwe sinkondonyina uyoomuzunda pe, taakwe muntu sizibi uyoomudyaminina.
23Kalibwenene, njoopwayaula bamulwana, njoonyonyoona bamucimwa.
24Ndinoomuyanda, ndinoosyomeka kulinguwe, ndinoocita kuti kazunda muzina lyangu.
25Njookwakwabula bwami bwakwe kuzwa kulwizi lupati,
buyoosika kumulonga wa Yufuletisi.
26Uyoondaamba kuti, ‘Nduwe Taata, nduwe Leza wangu,
nduwe mwaala, mufutuli wangu.’
27Njoomucita kuti abe mwanaangu wakusaanguna,
njoomusumpula kwiinda bami baansi.
28Luyando lwangu lutazungaani lunooli aanguwe kukabe kutamani,
cizuminano cangu anguwe tacikamani.
29Lunyungu lwakwe lunookkede acuuno cakwe cabwami,
acuuno eeco lunookkede mane kukabe kutamani.
Bwami bwakwe buyookkalilila mbuli julu.
30Naa balunyungu lwakwe bakaleke kundiswiilila,
kabatatobeli mbeta zyangu,
31kabavoolozya malailile aangu, kabatabambi milawo yangu,
32njoobasubula muzinyonyoono zyabo amusako,
njoobakwabbaula azimboko akaambo kazibi zyabo.
33Pele nikuba boobo nsikooyooleka kuyanda Devedi,
ndikuyoosyomeka kulinguwe.
34Nsikooyootyola cizuminano cangu, sikasanduli makani ngindakaamba.
35Ndakonka mukusalala kwangu kuti, nolibalili nsikooyoobejela Devedi.
36Lunyungu lwakwe lunooliwo kwalyoonse,
cuuno cakwe cabwami ciyookkalilila,
ciyookkalilila kumbele lyangu mbubukkede zuba.
37Cuuno cakwe cabwami ciyookkalilila mbuli mwezi kukabe kutamani,
mwezi uuli ngokamboni wangu uusyomeka mujulu.”
38Teekayi lino wamutakata, wamukaka, wamunyemena munanike wako.
39Wakaka cizuminano ncookapanga kumubelesi wako,
musini wakwe wabulemu wuubbuntila ansi.
40Wamwaya bwaanda bwakwe boonse, wapwayaula zikwabilizyo zyakwe, zyaba tongo.
41Boonse bainda munzila basaala nguwe, basimunzinyina baide kumuseka.
42Maanza aalulyo aabaabo bamulwana waayumya, basinkondonyina boonse wabatangazya.
43Panga lyakwe lyaba cintu buyo, tomugwasyi munkondo pe.
44Bulemu bwakwe wabumanya, cuuno cakwe cabwami wacuunsizya ansi.
45Watwentanya mazuba aabukubusi bwakwe, wamujazya nsoni.
46Ino cilaba ciindi cilamfu cilibuti, O Mwami Leza,
sena unoolisiside lyoonse?
Bukali bwako bucinoopya kwaciindi cilamfu cilibuti?
47Koyeeya kuti mazuba aabuumi bwangu mace,
masimpe bantu boonse mbookalenga mbabuyo.
48Sena kuli muntu uukonzya kukkalilila katafwi?
Sena kuli muntu uukonzya kulivuna kunguzu zyalufu?
49O Mwami, lulikuli luyando lwako, luya lwakaindi lutazungaani?
Luya ndookakonkezya mukusyomeka kwako kuli Devedi?
50O Mwami, koyeeya mubelesi wako mbwaasampaulwa, mbwaayumina masampu aabamasi.
51O Mwami Leza, koyeeya kuti aabo bandisampaula mbaasinkondonyoko,
mbabasampaula munanike wako kufumbwa nkwaaya.
52Aalumbwe, Mwami Leza, kukabe kutamani. Akube boobo. Akube boobo.
Currently Selected:
Intembauzyo 89: Tonga96
Highlight
Share
Compare
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
