Intembauzyo 33
33
1Nywebo nobalulami amusekelele muli Leza,
nomululeme muleelede kumutembaula ncobeni.
2Amumutembaule Mwami Leza akalumbu,
aciimbyo caminjeya iili kkumi amumutembaule.
3Lwiimbo lupya amumwiimbile walo,
amuume kabotu akwiimba cakupozomoka.
4Aliluleme majwi aa Mwami Leza,
ulabeteka bweelele akusyomeka muli zyoonse nzyacita.
5Kubeteka bweelede aziluleme nzyayanda walo,
nyimbo iizwide luyando lwa Leza lutazungaani.
6Akalengwa ajwi lya Mwami Leza majulu,
zyakalengwa zyoonse zyakujulu naakakanana.
7Mbuli maanzi aali munongo, mbwabunganya maanzi aalwizi,
minyinza yakuti ataindilili nguwakiibikka.
8Iilemeke Leza nyika yoonse, bamukombe boonse bakkede ansi.
9Nkaambo mbwaakakananina cakacitika,
mbwaakalailila buyo cakaba mbubonya.
10Makanze aabamasi Leza ulaanyonganya, mizeezo yabo uliisinkila.
11Aliimvwi lyoonse makanze aa Mwami Leza,
kwamazyalani oonse kuyeeya kwamoyo wakwe kunooliko.
12Ooyo uuzumina mu Mwami Leza,
uumusyoma kuti ngu Leza wakwe ulilelekedwe,
mbabantu mbaakasala kuba lukono lwakwe.
13Kuzwa kujulu Leza ulalanga, bantu boonse ulababona.
14Boonse bakkede ansi ulabalingula kuzwa koko nkwakkede.
15Myoyo yabo boonse nguwakiibumba,
milimo yabo yoonse uliilangilila.
16Tafutuki mwami akaambo kakukomena kwampi yakwe pe,
sinkondo takonzyi kulivuna munguzu zyakwe zipati.
17Utasyomi mabbiza aankondo kuti uzunde,
anguzu zyawo mpati taakonzyi kukuvuna.
18Aabo bamulemeka Leza ulibabwene,
aabo basyoma muluyando lwakwe lutazungaani.
19Kuzwa kulufu ulabavuna, muciindi canzala ulababamba.
20Ilangila mu Mwami Leza myoyo yesu,
nentobo yesu nguutukwabilila.
21Mulinguwe mwiikondwa myoyo yesu,
muzina lyakwe lisalala motusyoma.
22Lutazungaani luyando lwako,
O Mwami Leza, alube kulindiswe lyoonse,
nkaambo mulinduwe motusyoma.
Currently Selected:
Intembauzyo 33: Tonga96
Highlight
Share
Compare
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
