Intembauzyo 34
34
Lwa Devedi ciindi naakalicengeezya kuti wasondoka kuli Abimeleki. Wakamutanda, nkabela wakazwa
1Ciindi coonse ndinootembaula Mwami Leza,
ndinoomulumbaizya lyoonse amilomo yangu.
2Mu Mwami Leza mwelikankaizizya,
bapenzegwa abaswiilile batangale.
3Antoomwe andime amumulemeke Mwami Leza,
atulumbaizye zina lyakwe toonse.
4Wakandivuwa Mwami Leza nindakamukomba,
kuyoowa koonse nkundakajisi kwakamana.
5Balatangala aabo balanga kulinguwe lyoonse,
taakwe nobaumbaalilwa pe.
6Mwami Leza wakavuwa uupengede naakamwiita,
wakamuvuwa wamugwisya mumapenzi aakwe oonse.
7Mungelo wa Mwami Leza ulindilila baabo balemeka Leza,
ulabalindilila kuti abavune.
8Mwamusola mulabona kuti Mwami Leza mmubotu,
ooyo uuyubila mulinguwe ulilelekedwe.
9Nywebo nobasalali bakwe amulemeke Mwami Leza,
aabo bamulemeka kunyina ncobabula.
10Basyuumbwa balawizuka akufwa nzala,
pele kunyina ncobabula pe aabo bayandaula ziyanda Mwami Leza.
11Nobana bangu amuboole mundiswiilile.
Mwiisye bulemekwa Mwami Leza.
12Ooyo uuyanda buumi, uuyanda koongola,
13alesye mulaka wakwe kububi,
awalo mulomo wakwe utaambi zyakubeja pe.
14Cita zibotu uleke zibi, ulangaule luumuno akuluccilila.
15Ulangisisya baabo bacita ziluleme Mwami Leza,
kulilauka kwabo ulakuswiilila.
16Mwami Leza usulaikide baabo bacita zibi,
munyika tabakayeeyegwi limbi.
17Mwami Leza ulabavuna balulami nobamulilila kuti abagwasye,
kuzwa mumapenzi aabo oonse ulabavuna.
18Mwami Leza ulaafwiifwi abaabo bawizukide,
aabo bazingidwe mumyoyo ulabafutula.
19Mululami mapenzi manji naamusikila buti,
Mwami Leza ulamuvuna kuzwa kuli ngawo.
20Mwami Leza ulamukwabilila kabotu,
nkaako mafuwa aakwe taakalebauki.
21Bubi bujaya uubucita, bayoopegwa cisubulo aabo balwana baluleme.
22Ulabanununa babelesi bakwe Mwami Leza,
tabayoosubulwi aabo bayubila muli nguwe.
Currently Selected:
Intembauzyo 34: Tonga96
Highlight
Share
Compare
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
