Intembauzyo 145
145
Lwiimbo lwa Devedi lwakutanta
1Njookutembaula, O Leza, Mwami wangu, zina lyako njoolitembaula mane kukabe kutamani.
2Buzuba abuzuba nootembaula nduwe, noolumbaizya zina lyako mane kukabe kutamani.
3Mwami Leza mmupati, alikke buyo nguuelede kutembaulwa, taakwe uukonzya kuziba bupati bwakwe.
4Zyalani limwi liyookanana zyamilimo yakwe mipati kuli limwi, bayookanana zyamilimo yako yanguzu.
5Bayookanana zyabulemu bwako bwabwami, mebo njootelaika zyamilimo yako iigambya.
6Bayookanana zyamilimo yako yanguzu iiyoosya, mebo njooambilizya zyamilimo yako mipati.
7Mpuwo mpati yabubotu bwako njobayoolumbaizya, cakutangala bayooimba zyabululami bwako.
8Mwami Leza ngusiluse uleengelela, tafwambi kunyema ngusiluyando.
9Mwami Leza mmubotu kuli boonse, uleengelela zilenge zyakwe.
10Zyoonse nzyookalenga zilakutembaula, O Mwami Leza,
basalali bako balakulumbaizya.
11Bakanana bulemu bwabulelo bwako, bakanana zyanguzu zyako.
12Bacita boobo kuti bantu boonse bazibe zyamilimo yanguzu,
zyabulemu bwabulelo bwako.
13Bulelo bwako mmbulelo butamani, bweendelezi bwako mbwamazyalani oonse.
Mwami Leza ulasyomeka akubamba zisyomezyo zyakwe zyoonse, zyoonse
nzyaakalenga ulaziyanda.
14Mwami Leza nguujatilila baabo bawa, nguubusya boonse aabo bawizuka.
15Boonse balangilila kuli nduwe, nkaambo nduwe oobapa zilyo zyabo muciindi ceelede.
16Ovungulula janza lyako ulakutya zilenge zyako zyoonse kabotu.
17Mwami Leza uliluleme munzila zyakwe zyoonse, zyoonse nzyaakalenga ulaziyanda.
18Mwami Leza ulaafwiifwi kuli baabo bamwiita, munsi aabaabo bamwiita mukasimpe.
19Aabo bamulemeka ulabapa nzyobasukamina, nguumvwa kulila kwabo, nguubavuna.
20Boonse aabo bamuyanda, Mwami Leza ulababamba, pele basizibi boonse ulabanyonyoona.
21Njootembaula Mwami Leza, azyalo zilenge zyoonse azitembaule,
kazitembaula zina lyakwe lisalala kukabe kutamani.
Currently Selected:
Intembauzyo 145: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
