Intembauzyo 144
144
Lwiimbo lwa Devedi
1Aalumbwe Mwami Leza mwaala wangu ooyo uuiisya janza lyangu,
nguuiisya janza lyangu zyankondo, ulaiisya minwe yangu zyalumamba.
2Ngo Leza wangu uundiyanda, uundikwabilila, ngamayubilo aangu,
mayubilo aangu aanguzu, ngomufutuli wangu, nentobo yangu.
Muli Leza mwenjubide, nguundizundya bantu boonse.
3O Mwami Leza, ino muntu nguni kuti komubamba, muntunsi nguni kuti komuyeeya?
4Muntu uli mbuli kuyoya buyo, mazuba aakwe ali mbuli cinziinzimwa cizimaana.
5O Mwami Leza, zapula julu lyako useluke, zyaampe zilundu kuti zisuke busi.
6Nkoo tuma ndabo zibamwaye bandilwana, fusa mivwi yako ubalobye.
7Tandabika janza lyako kuzwa kujulu undifutule, ndivune kuzwa kumaanzi manji, kuzwa kuli bamasi.
8Mbambabaabo baamba zyakubeja, mbambabo bakonkezya zyabuyo.
9Njookwiimbila lwiimbo lupya, O Leza, njookulumbaizya nkeuma kankobela kalaaminjeya iili kkumi.
10Njooimbila uuzundya bami,
uuvuna Devedi mubelesi wakwe, ulamuvuna kuzwa kumapanga aalufu.
11Kondifutula, ndivune kuzwa kuli bamasi,
aabo baamba buyo zyakubeja, aabo bakonkezya zyabuyo.
12Bana besu mubukubusi bwabo bayookomena, bayookomena mbuli tusyango tubikkidwe bufumba.
bana besu basimbi bayooba mbuli zicinda, mbuli zicinda zibezedwe, zibotya ŋanda yabwami.
13Matala eesu aazule zilyo zyamisyobo-misyobo, mbelele zyesu zivule
zibe zyuulu-zyuulu, zibe zyuulu zili makumi-makumi mumacelelo eesu.
14Ŋombe zyesu zizyalisye, kutabi zisowa naa zifwa ntumbukila, kweema kutamvwigwi mumunzi.
15Bantu basikilwa coolwe cili boobu balilelekedwe,
bantu bali Mwami Leza, ngo Leza wabo balilelekedwe.
Currently Selected:
Intembauzyo 144: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
