Intembauzyo 139
139
Kumweendelezi wanyimbo. Lwiimbo lwa Devedi
1O Mwami Leza, ulandilingula, aboobo ulindizi.
2Ulizi nekkala nikuba nebuka, kuzwa kooko kulaale uliibona mizeezo yangu.
3Ulalangilila bweende bwangu ambweona ulabona, nzila zyangu zyoonse ulizizi.
4Nketana akuyeeya ncetaambe, yebo inga ulizi kale, O mwami Leza.
5Ulindisinkilizye munsi akumbele koonse, ulindijisi ajanza lyako.
6Luzibo luliboobo lulandigambya, ndupati cakuti nsikonzyi kulumvwisya.
7Ino inga ndaya kuli kuti njube Muuya wako? Ncijile kuli kuti nzwe kulinduwe?
8Kuti naa ndatanta kujulu, akwalo ooko nkoli, akaka doono ndale mucuumbwe ulindibwene.
9Ambweni ngulukile kuzwida zuba, nje nkakkale kumagolelo aalwizi, mbubonya buyo koonse nkoli.
10Koonse ooko janza lyako lilandeenzya, janza lyako lyalulyo lilandijatilila.
11Naa ndati, “Mudima uundivumbe, mumuni uundizingulukide uube masiku.”
12Cce, mudima kulinduwe tuusiyi pe, masiku alabalangala mbuli sikati,
kulinduwe mudima amumuni ncintu comwe buyo.
13Wakalenga zyamukati kangu nduwe, wakandipanga mwida lyabaama nduwe.
14Ndakutembaula nkaambo okandilenga munzila iikankamanisya,
okandilenga munzila iigambya. Milimo yako ilagambya, eeci ndicizi kabotu-kabotu.
15Nsisisidwe ulindibwene boonse mbwebede,
nkecikumbwa mwida, nkekomena kakunyina uuzi, yebo wakalizi kale kuti nkweli.
16Wakandibona nketana akuba nsalalila, mazuba oonse ngookandipa munyika akalilembedwe mubbuku,
akalilembedwe kaatana akutalika mazuba aabuumi bwangu.
17Ilandibotela mizeezo yako, O Mwami Leza, mweelwe wayo mupati kapati.
18Naa ndiibala minji kwiinda musenga, Ngambe nsinsimuke ndicili aanduwe.
19O Leza, akaka ndalikulombozya kuti noobanyonyoona basizibi, Nywebo nobantu batila bulowa amuzwe.
20Bantu bakwaamba zintu zibi, basinkondonyoko balakusampaula.
21Tee kayi ndibasulide aabo bakusulaika,
O Mwami Leza. Ndabasesemwa aabo bakubukila.
22Taakwe bumbi mbwebayeeyela, mbaamba buyo kuti mbaasinkondoma.
23Kondilingula, O Mwami Leza, uzibe moyo wangu, ndisunke uzibe miyeeyo yangu.
24Bona naa muli nzila iilebya mulindime, kwamana undeenzye munzila iitamani.
Currently Selected:
Intembauzyo 139: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
