Intembauzyo 106
106
1Amutembaule Mwami Leza, amumulumbe Mwami Leza,
nkaambo mmubotu nkaambo luyanda lwakwe ndwalyoonse alyoonse.
2Nguni uukonzya kwaambilizya, zyanguzu zya Mwami Leza?
Nguni uukonzya kumutembaula bweelede?
3Balilelekedwe aabo bacita ziluleme, aabo bacita ziluzi lyoonse.
4Kondiyeeya O Mwami Leza, kweengelela bantu bako.
Ovuna bantu bako ambebo undigwasye,
kuti mmbone zibotu nzyoticitile bantu bako.
5Ndendilyo netikasekelele mukukondwa kwabantu bako,
iinkabe akati kalukono lwako nekutembaula.
6Twakubisizya mbubonya bwakacita basikale besu, twabisya twacita cibyaabi.
7Basikale besu nibakali Muijipiti tiibakatelaika zyamaleele aako,
tiibakatelaika zyaluzyalo lwako lutazungaani, bakakuzangila kulwizi, kulwizi lusalala.
8Nikuba boobo wakabafutula akaambo kazina lyako, kuti ubazibye zyanguzu zyako mpati.
9Wakatapatila lwizi lusalala lwakayuminina,
nkaako bakainda akati kamaanzi manji aakalundene ooku a kooku,
bainda mbulikuti mpaankanda buyo.
10Wakabavuna kuzwa kuli baabo babalwana, wakabanununa kuzwa kuli basinkondonyina.
11Maanzi akavumba basinkondonyina, taakwe naba omwe wakasyaala.
12Eelyo bakasyoma nzyookasyomezya, bakaimba cakutembaula.
13Nikuba boobo bakafwaambaana kuluba zyeezyo Leza wabo nzyaakacita,
tiibakalindila malailile aakwe.
14Nibakasika munkanda bakafwa nkosya, kabali mucimpayuma bakatepaula Leza.
15Walo wakabapa ncibakakumbila, wakabatumina bulwazi bubi.
16Kabali muzivuka bakafwida Mozesi bbivwe, bakafwidilizya bbivwe a
Aloni uusalala wa Mwami Leza.
17Nyika yakaanduka akumena Datani, yakavumba nkamu ya Abilamu.
18Mulilo wakavutuka akati kabamuccilila, mulilo uuvwilima wakatenta basizibi.
19Bakabumba moombe ku Holebu, bakomba mutuni walubulo.
20Bakasiya Leza wabulemu, bakomba cibumbe ca poho uulya bwizu.
21Bakaluba Leza ooyo wakabavuna, ooyo wakacita milimo mipati Muijipiti.
22Wakacita maleele munyika ya Hamu, wakacita milimo iiyoosya ku Lwizi Lusalala.
23Ooko wakakanza kuti abanyonyoone, naatakali Mozesi musale wakwe,
ooyo wakabaiminina kuti atabalobyi mubukali bwakwe, nibakamana cilongomuzyolelwa.
24Kumane bakasampaula nyika mbotu, taakwe nibakasyoma zyeezyo Leza nzyaakabasyomezya.
25Bakali kutongooka mumaanda aabo, tiibakaswiilila Mwami Leza.
26Mpawo wakakonka akutambika kujulu, wakati uyoobanyonyweeda munkanda.
27Uyoomanya balunyungu lwabo mumasi aambi, bayoofwida nkukonya ooko.
28Ku Peyo bakatalika kukomba Baali, balya zipaizyo zyakapaizilwa baleza babuyo aaba.
29Bakanyemya Mwami Leza akaambo kamilimo mibi njibakacita,
nkaako Leza wakabaletela cuumo.
30Ciindi Finehasi naakasubula bantu bakabisya aabo, cuumo eeco cakamana.
31Nkaako Finehasi wakaambilizigwa kuti mmululami kwamazyalani,
mazyalani oonse, mane kukabe kutamani.
32Kumaanzi aku Meliba bakakalazya Mwami Leza,
nkaako Mozesi wakanjila mumapenzi akaambo kabo.
33Balo bakazangila Muuya wa Leza, awalo Mozesi wakakanana cakutajata moyo.
34Tiibakanyonyoona bamasi, mbuli mbwaakalailide Mwami Leza.
35Bakasangana buyo abamasi, baccilila ziyanza zyabo.
36Bakakomba mituni yabamasi, eeyo yakababeda kakole.
37Bakapaizya bana babo balombe, bapaizya abana basimbi kumyuuya mibi.
38Bakatila bulowa bwabatakwe mulandu, bulowa bwabana babo basimbi abalombe.
Bakabapaizya kumituni yaku Kenani, nyika yakasofwaala akaambo kabulowa bwabo.
39Bakalisofwaazya beni akaambo kazeezyo nzibakacita,
tiibakasyomeka kuli Leza mukucita zili boobu.
40Nkaako Mwami Leza wakanyemena bantu bakwe,
bantu balukono lwakwe wabasesemwa.
41Wakabaaba kuli bamasi, aabo bakabalwana akubalela.
42Basinkondonyina bakabadyaminina, bakabazunda akubalela.
43Wakabafutula kwaziindi zinji,
pele bakacili kuzumanana muzinyonyoono zyabo.
44Nikuba boobo wakabaceba mukupenga kwabo,
wakabaceba naakamvwa kulilauka kwabo.
45Akaambo kambabo wakayeeya cizuminano cakwe,
wakatontobala akaambo kaluyando lwakwe lutazungaani.
46Wakacita kuti aabo bakabatola,
bakabatola mubwaange babafwide luzyalo.
47Kotufutula O Mwami Leza wesu, tuyobolole kuzwa mumasi.
Tuzoolumbaizye zina lyako lisalala, tulisumpule notukutembaula.
48Aatembaulwe Mwami Leza wa Isilayeli, amumutembaule lyoonse alyoonse,
bantu boonse abaambe kuti, “Akube boobo.” Aamutembaule Mwami Leza.
Currently Selected:
Intembauzyo 106: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
