Intembauzyo 105
105
(1 Makani 16.8-22)
Leza abantu bakwe
1Amulumbe Mwami Leza, amumukombe mukwiita zina lyakwe,
amulungulule zyamilimo yakwe akati kabantu boonse.
2Amumwiimbile cakumulumbaizya, amulungulule zyamilimo yakwe iikankamanisya.
3Amulikankaizizye muzina lyakwe lisalala,
myoyo yabaabo bayandaula Mwami Leza, iisekelele.
4Amuyandaule Mwami Leza, muyandaule nguzu zyakwe,
amube kulinguwe lyoonse.
5Amuyeeye zigambya nzyaakacita, amaleele aakwe, amube kulinguwe lyoonse.
6Nywebo nolunyungu lwa Abulahamu mubelesi wakwe, nobana ba Jakobo basale bakwe.
7Namakungwe ngo Mwami Leza wesu, nguubeteka munyika yoonse.
8Nguuyeeya cizuminano cakwe lyoonse,
majwi ngaakaambilizya kwamazyalani aali zyuulu-zyuulu.
9Cizuminano ncaakapangana a Abulahamu, cikonke ncaakakonkezya Isaka.
10Wakaciindulula kuli Jakobo kuti cibe mulawo,
kuli Isilayeli kuti cibe cizuminano citamani.
11Wakati, “Njookupa nyika ya Kenani, iyooba lukono lwako.”
12Naakaamba boobo bakacili bace, bace kuceela limwi,
alimwi kabali beenzu mulinjiyo.
13Bakali kutuntulika kuzwa munyika imwi kusika muli imwi,
kuzwa kubulelo bumwi kuyoosika kuli bumwi.
14Mwami Leza taakazumizya muntu nabani kuti abadyaminine,
mukubakwabilila wakatapatila bamami.
15Wakati, “Mutabagutaiki basale bangu, mutapenzyi basinsimi bangu.”
16Lino wakaleta nzala munyika, wakanyonyoona zilyo zyabo nzyoonse.
17Pele wakatuma umwi mwaalumi kuti abasaangunine,
ooyo wakali Josefa wakauzigwa mubuzike.
18Bakacuzaula maulu aakwe anketani, nsingo yakwe yakaangidwe aansimbi.
19Wakalaangidwe kusikila majwi ngaakaambide naakazuzukizigwa,
kusikila majwi aa Mwami Leza naakasinizya kuti taakabisya.
20Lino Mwami wakatumizya kuti aangununwe, muleli wacisi wakamuleka.
21Wakamubikka kuti abe mupati mubulelo bwakwe,
wakaba nguuendelezya lubono loonse ndwaakajisi.
22Wakali wakulaya balemenede bakwe buyandika,
kwiisya bapati zyabusongo.
23Mpawo Baisilayeli bakasika ku Ijipiti,
Jakobo wakakkala mbuli mweenzu munyika ya Hamu.
24Mwami Leza wakavuzya bantu bakwe, bakavula kapati kwiinda bakalikubalwana.
25Bakalikubalwana aabo mbaakacitide kuti basule bantu bakwe,
aabo mbaakacita kuti bakanze babelesi bakwe.
26Aawo wakatuma Mozesi mubelesi wakwe, wakamutuma a Aloni ooyo ngwaakasalide.
27Bakacita maleele akati kabo, bakacita zigambya munyika ya Hamu.
28Wakaleta mudima, munyika mwakasiyambi,
nikuba boobo bantu aaba tibakaswiilila majwi aa Leza.
29Maanzi aabo wakaasandula aba bulowa, wakacita kuti nswi zyabo zifwe.
30Nyika yabo yakanyawita bacula, bakanjila mumazyuli aabaleli babo.
31Naakakanana alimwi kwakaboola makata aanzinini, kwaboola abususuli mucisi coonse.
32Wakabawisizya civulamabwe, kwakali kudabauka candabo mucisi coonse.
33Wakanyonyoona misaansa amikuyu yabo, wakatyoloola masamu oonse mucisi cabo.
34Amane wakakanana eelyo kwakaboola cikwikwi, kwaboola mpaso zinji zitabaliki.
35Zyakalya kasyango katete kali koonse mucisi cabo,
zyakalya micelo yoonse yamunyika yabo.
36Amane wakauma bana boonse bakusaanguna mucisi cabo,
wakajaya bana boonse babulombe bwabo.
37Wakagwisya Baisilayeli kabalemedwe ca nsiliva angolida,
taakwe naba omwe akati kabo wakali muteteete.
38Baijipiti bakakondwa Baisilayeli nibakainka,
nkaambo bakali bayoowede.
39Wakadadabula kkumbi kuti cibe ncecakuvumbya,
awalo mulilo wakabamunikila masiku.
40Nibakakumbila cakulya wakabaletela bakancele,
bakakkuta acinkwa cakujulu.
41Wakasinkula ndomba, maanzi akapoomoka, kwakunka mulonga munkanda.
42Nkaako wakaibaluka cisyomezyo cakwe cisalala,
eeco ncaakaanga a Abulahamu mubelesi wakwe.
43Wakagwisya bantu bakwe kabasekelela, wagwisya basale bakwe kabatangede.
44Wakabapa nyika yabamasi, bakatola lubono lwakabelekelede bamwi.
45Wakacita kuti babambe mbeta zyakwe, bajatisye milawo yakwe.
Amutembaule Mwami Leza.
Currently Selected:
Intembauzyo 105: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
