Intembauzyo 104
104
1Kotembaula Leza omuuya wangu, O Mwami Leza wangu, ulimupati kapati,
usamide bwami abulemu.
2Ulivumba mumuni mbuli bulivumbwa cisani, undandamika julu mbuli tente.
3Usimpide ziyako zyaŋanda yako mumaanzi aakujulu,
makumbi nenkalaki yako, uleendeenda amababa aluuwo.
4Muuwo nguwaba batumwa bako, mulilo uuvwilima ngosimilimo wako.
5Nduwe ookabikka nyika antalisyo zyayo, kuti kiitazungaani.
6Wakaivumbya maanzi aba ncecisani cayo, maanzi akaliimvwi avumba zilundu.
7Pele nookaatapatila akatija, naakamvwa kuzuma kwako akaunguka kufwambaana.
8Maanzi aakali kusika atala aazilundu, akayosa, aya mumakkuti,
aungukila mumasena ngookaabambila.
9Wakaabikkila munyinza ngwaateelede kusotoka, taakavumbi limbi nyika.
10Nduwe oocita kuti tusena katukunkila mutulonga,
katwiinda akati kazilundu.
11Tulonga ooto ntotunywisya banyama bamusokwe,
ntotumana bacibize nyota.
12Bayuni bamuluuwo balayaka ziteente zyabo,
ziteente zyabo munsi aatulonga, balaimba mumitabi.
13Ulatilila zilundu kuzwa kumaanda aako aakujulu,
nyika izwide zileleko zyako.
14Nduwe uucita kuti bwizu bwaŋombe bumene,
nduwe oocita kuti zisyango zigwasya bantu zimene,
nduwe oocita kuti bantu bajane cakulya muvu.
15Ucita kuti muntu ajane waini wakulisansa,
ajane mafuta aakunana kuti asyuuke, ulamupa cilyo cikonzya kumupa nguzu.
16Atilailwa kabotu masamu aa Mwami Leza, itilailwa kabotu milombe yaku Lebanoni njaakasyanga.
17Mobayaka ziteente bayuni mulinjiyo, toongola lyoonena kumikamba eeyo.
18Malundu malamfu ngaakkala njeleele, mpako nzyampangala ngamayubilo aabacibila.
19Mwezi ulizi ziindi zyawo, alyalo zuba lilizi ciindi ncolyeelede kubbila.
20Kuti abe masiku, uleta mudima, aawo banyama boonse bamusokwe baleendeenda.
21Basyuumbwa inga balavuluma nibaweza, bayandaula zilyo zyabo zizwa kuli Leza.
22Lyapasula buyo zuba, balabweeda balala mumalalo aabo.
23Aawo muntu ulakonzya kuunka kumilimo yakwe,
ulabeleka ooko mane kusikila kumangolezya.
24Tiilivulili milimo yako, O Mwami Leza,
zyoonse wakazicita mubusongo bwako, nyika izwide zilenge zyako.
25Bona kulilwizi, ndupati luliyabeene,
lunyawita zilenge zinji zitabaliki, zilenge zipona zipati aziniini.
26Ooko mato alainka akuboola,
cimpangaliko camumaanzi ciya ncookalenga cisobanina mukati.
27Zyoonse eezi zilangila kuli nduwe,
nduwe oozipa zilyo zyazyo muciindi ceelede.
28Zilabungika kufumbwa ncoozipa,
zikkuta zintu zibotu eezyo zyozisanina ajanza lyako.
29Naa wazilekelezya zilapenga, wagwisya muuya wako mulinzizyo zilafwa.
Zipilukila kubulongo.
30Wazitumina muuya wako zilaima nji, nyika ibaabuumi bupya alimwi.
31Bulemu bwa Leza abukkalilile lyoonse, aasekelele Mwami Leza mumilimo yakwe.
32Wiilanga nsi, ilakankama, wazyaampa zilundu zisuka busi.
33Njooimbila Mwami Leza mubuumi bwangu boonse, necipona njootembaula Leza wangu.
34Akubotele Mwami Leza kukomba kwangu, nkaambo mulinguwe mwenkondwa.
35Basizinyonyoono bazimaane ansi, bataluleme batakabonwi limbi.
Tembaula Mwami Leza, omuuya wangu, mutembaule Mwami Leza.
Currently Selected:
Intembauzyo 104: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
