Intembauzyo 103
103
Lwiimbo lwa Devedi
1Omoyo wangu kotembaula Mwami Leza, zyoonse zizo zyangu azitembaule zina lyakwe lisalala.
2Omoyo wangu, kotembaula Mwami Leza, utalubi bulumbu boonse mbwapa.
3Ulalekelela zinyonyoono zyangu zyoonse, ulandiponya kumalwazi aangu oonse.
4Nguundivuna kuzwa kwacivumwe, nguundisamika musini,
musini waluyando lutazungaani alweetelelo.
5Nguundipa zintu zibotu nzyesukamina, nguundibukulusya akundipa nguzu mbuli sikwaze.
6Mwami Leza, nguundicitila ziluleme, nguubacitila zyeelede aabo badyamininwa.
7Nguwakazibya Mozesi nzila zyakwe, nguwakabonya milimo yakwe kuba Isilayeli.
8Mwami Leza ngusilweetelelo, ngusiluse, ngusiluyando lutazungaani, lunji.
9Tayandi kupa mulandu lyoonse, takweeki kukabe akutamani pe.
10Tatupi cisubulo mbuli ceelede zinyonyoono zyesu,
tatutundululi mbuli bweelede zibi zyesu pe.
11Mbuli julu mbolili kule kuzwa ansi,
mbolusika luyando lwakwe oobo kuli baabo bamulemeka.
12Mbuli kujwe mbokuli kulaale kuzwa kumbo,
mbombuboobu mbwaakasowa zinyonyoono zyesu.
13Mbuli wisi mbweetelela bana bakwe bamulemeka,
mbubonya oobo Mwami mbweetelela baabo bamuyoowa.
14Nguuzi mbobubede buntu bwesu, utuyeeya kuti tuli bulongo buyo.
15Pele mazuba aamuntu ali mbuli bwizu, ulafwefwema mbuli dubaluba lyamusokwe.
16Luuwo lulaunga, mpoonya lyakunkumuka, lyaloka, talipilukili limbi mpulyabede pe.
17Kuzwa lili alili Mwami Leza ulabayanda,
ulabayanda aluyando lutazungaani aabo bamulemeka,
ulatondezya bululami bwakwe akubana aabana babo.
18Kulibaabo babamba cizuminano cakwe,
aabo bamuswiilila akubamba malailile aakwe Mwami ulabayanda.
19Mwami wakabikka cuuno cakwe cabwami mujulu, nguulela koonse-koonse.
20Amutembaule Mwami Leza, nywebo nobangelo bakwe,
nywebo nomucita mbwaamba, nomuswiilila malailile aakwe.
21Amutembaule Mwami Leza, nomakamu aakwe aakujulu nyoonse,
nywebo nobabelesi bakwe bacita nzyayanda.
22Amutembaule Mwami nywebo nozilenge zyakwe zyoonse,
zilenge eezyo zili mwalela. Kotembaula Mwami Leza, omuuya wangu.
Currently Selected:
Intembauzyo 103: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
