Tusimpi 6

Kucenjezya kumbi

1Mwanaangu, kuti wakonkezya kuti uyoobbadelela umwi akusyomezya kucitila mweenzinyoko oobo, 2sena wajatwa akaambo kamajwi aako, akwaangwa akaambo kanzyookasyomezya? 3Mboobu mboelede kucita mwanaangu, kuti ulivune. Nkaambo kakuti wawida mumaanza aamweenzinyoko, Koya ukalibombye, ukalikombelezye kumweenzinyoko. 4Toelede koona nikuba kuguna, 5kolivuna mbuli mbaambi kuzwa kumuvwimi, mbuli muyuni kuzwa kuli sikuteya.

6Koiya kutuuka yebo omutolo, langisisya mpotuponena wiiye. 7Tatujisi silutwe, mweendelezi naba muleli, 8nikuba boobo tulabamba zyakulya mainza, akuyobola zyakulya ciindi cakutebula. 9Ulaleka lili koona yebo omutolo? Ulasinsimuka lili muŋonzi zyako? 10Nkecoonoona, ndicili atuŋonzi, nkendicili kumbete, ndyookezye! 11Ma! bucete bulakusikila mbuli mubbi, kubula kulakujana mbuli silumamba!

12Muntu uutalijaili kaputa, uutakwe nkwaya, uleendeenda akwaamba zitabujuli. 13Ulafunyina, ulalyata kuzituta, ulatondeka aminwe, 14moyo wakwe uzwide miyeeyo mibi yakuunina. Lyoonse ngwamazwanga. 15Nkaako mapenzi alamusikila cakufwambaana, ulanyonyoonwa cakuti kuyoobula uumusilika.

16Kuli zintu zili cisambomwe Mwami Leza nzyaasulaika, kapati zili ciloba zimusesemya, 17balanga cakulisumpula, babeja, batila bulowa bwabatakwe mulandu, 18bakanza zintu zibi, bazuzaanina kububi, 19bakamboni baamba zyakubeja, amuntu uuleta mazwanga akati kabeenzinyina.

Kucenjezya zyabumambe

20Mwanaangu, jatisya malailile aauso alimwi utaleki kwiisya kwabanyoko. 21Kokubikka kumoyo wako lyoonse-alyoonse, ukusame munsingo yako. 22Waakweenda, kuyookusolweda, waakoona kuyookulindilila, waakubuka, kuyookanana anduwe. 23Nkaambo malailile aaya ndilambe, kwiisya ooku mumuni, kutapatila kwakulaya nenzila yabuumi. 24Kulakuvuna kuzwa kumukaintu sizibi, kuzwa kumukaintu uujisi mulaka woongelezya. 25Utanyomeneni bweebesi bwakwe, meso aakwe atakutoleli moyo. 26Nkaambo muvuule ulakonzya kuulwa cinkwa. Mukaintu walupwa uvwima buumi bwako.

27Sena muntu ulakonzya kufukata mulilo kwamana zisani zyakwe tazipyi? 28Sena muntu ulakonzya kweenda amakala aamulilo kwamana zituta zyakwe tazipyi? 29Mbwabede muntu uuya kuli mukamweenzinyina kufumbwa uumuguna ulapegwa mulandu. 30Bantu tabasampauli mubbi kuti naa wabbida kuti ufwide nzala. 31Nikuba boobo kuti naa wajatwa, ulabbadela ziindi zili ciloba. Ulabbadela lubono loonse luli muŋanda yakwe. 32Mwaalumi uulalika tajisi maanu, kufumbwa uucita boobo ulalinyonyoona mwini. 33Ulajana macise akufwa nsoni, nkabela masampu aakwe taakamani. 34Kayi bufwi mbobukalazya mwaalumi, teengeleli ciindi napilusya bubi. 35Tazumini kulungilwa pe, uyookaka nkazika camba nozivula buti.

Currently Selected:

Tusimpi 6: Tonga96

Highlight

Copy