Tusimpi 7

Kucenjezegwa azyamuvuule

1Mwanaangu, bamba majwi aangu, uyobole malailile aangu mumoyo wako. 2Bamba malailile aangu, ndendilyo noyoopona. Ubambisye njiisyo zyangu mbuli mbobamba mboni yaliso lyako. 3Kozyaanga aminwe yako, kozilemba mumoyo wako. 4Koambila busongo kuti, “Uli mucizi wangu,” koita kumvwisya zintu kuti musazinyoko. 5Niziyookuvuna kuzwa kumukaintu mwaamu, kuzwa kumukaintu waamba majwi aaongelezya.

6Kandiimvwi ampulungwido yaŋanda yangu, ndakasondela, 7akati kabantu bafuba-fuba, akati kabalombe, ndakabona mukubusi umwi watakajisi maanu. 8Wakali kweenda mumugwagwa mpuulaacooko kumbali aaŋanda yamukaintu, wakagama ooko kwakali ŋanda yakwe, 9ciindi nolisalazya, kumabbililo, kulubundu-bundu. 10Mpawo mukaintu ooyo wakaza bazooswaangana, kasamide akulangika mbuli muvuule kalibambilide kumoongelezya. 11Mukaintu ooyu ulaambaulisya akutalisenda, mumpelenge takkali aŋanda, ngulumana milyango. 12Ulajana ngooyu mumugwagwa, ngooyu muzisambalilo, nkwiide kwiima-ima muzyooko. 13Wakamujata, wamumyonta, wamulangisya kumeso wati, 14“Nindajisi zipaizyo zyalumvwano kuŋanda, sunu nindazuzikizya zikonke zyangu. 15Aboobo ndaboola kuzookucingauzya, ndalikukuyandaula, ono ndakujana. 16Bulo bwangu ndabuvumba kale amasani aandeketela amyeengo-myeengo aazwaku Ijipiti. 17Ndabuumpilizya kale atununkilizyo twamala, twaalosi atwasinamoni. 18Boola tucite zyaluyando mane tucimwe kusikila buce, atulibotezye tusobane. 19Mulumi wangu tawo. Wainka mulweendo lulamfu. 20Watoleela ankomo yamali manji, uyooboola kumamanino aamwezi.” 21Amajwi aakwe aakumuca wakamusowa, wakamoongelezya amajwi aakwe mauba. 22Mpoonya aawo wakamutobela mbuli musune uuya kukujaigwa. Mbuli mbaambi iinjide mukakulila, 23mane kusikila muvwi wayasa muni wayo. Mbuli muyuni uufuumukila mukakole katazi kuti kayanda buumi bwakwe.

24Lino nobana bangu amundiswiilile, amuswiilile ncendimwaambila. 25Myoyo yanu itatobeli nzila zyakwe nikuba kweenda mumikondo yakwe. 26Bantu mbaakawisya mbanji kapati, bantu mbajaide tababaliki. 27Ŋanda yakwe mmugwagwa uutola kucuumbwe, nguutola kutwaanda twalufu.

Currently Selected:

Tusimpi 7: Tonga96

Highlight

Copy