Tusimpi 3

Kucenjezegwa kwabakubusi

1Mwanaangu, utalubi kwiisya kwangu, bambisya malailile aangu mumoyo wako. 2Wacita oobo uyooongola alimwi uyoozwidilila. 3Luyando akusyomeka zibe mbuli kalungu kaansingo, zikkalilile mumoyo. 4Nkaako Leza abantu bayoobotelwa mulinduwe, eelyo uyooba aazina bbotu.

5Syoma Mwami Leza amoyo wako woonse utaccilili maanu aako omwini, 6koyeeya Mwami Leza mumilimo yako yoonse eelyo uyookululamikila nzila zyako. 7Utalipi kasongo-songo lwako omwini lemeka Mwami Leza, uleke zibi. 8Wacita boobo unoopona kabotu, mubili wako unoolimvwide. 9Lemeka Mwami Leza abuvubi bwako, amicelo mitaanzi kubizwa yanzyolima, 10nkabela matala aako ayoozula mwa, matalo aako ayoofwasuka waini fwasuu!

11Mwanaangu, utasampauli Mwami Leza nakulaya, utanookaki kulailila kwakwe. 12Nkaambo Mwami Leza uloolola aabo mbayanda, mbubonya mbuli bucita wisi kumwana ngwayandisya. 13Ulilelekedwe muntu ooyo uujana busongo, ooyo uukonzya kumvwisya zintu. 14Nkaambo busongo bulaleta mpindu kwiinda nsiliva, bulaboozezya kwiinda ngolida. 15Mbubotu kwiinda tubwe tudula, akati kazintu zyoonse nzyoyandisya, taakwe ceelene ambubo.

16Busongo buloongozya, bulavuzya akuletela bulemu. 17Nzila zyabo ninzila zibotezya, moonse mobwiinda nenzila yaluumuno. 18Busongo musamu wabuumi kuli boonse aabo babubamba. Balilelekedwe boonse aabo babukakatila. 19Mwami Leza kwiindila mubusongo bwakwe wakabikka ntalisyo zyanyika, kwiindila mumaanu aakwe wakabikka majulu, 20kwiindila muluzibo lwakwe maanzi malamfu akaandaana, makumbi alalosya mume.

21Mwanaangu, zibisya zintu eezi uzimvwisye, weelede kuzilangisisya, 22ziyoba mbobuumi bwako, ziyoosakatizya nsingo yako. 23Wacita boobo uyooenda munzila yako kotayoowi cintu nociba buti, nkabela taakwe notikawe. 24Waakulala tokayoowi pe, nkaako uyoolyoonena. 25Utakayoowi mapenzi ayookusikila cakufwambaana, naaba mapenzi aasikila basizibi, 26kayi yebo usyoma mu Mwami Leza, uyookwabilila kuulu kwako kuti kutacegwi.

27Utaleki kucita bubotu kuli baabo beelede kucitilwa boobo, koli yebo ulakonzya kubacitila oobo. 28Toelede kwaambila mweenzinyoko kuti, “Koya ukaboole juunza alimwi, ndizookupa,” kakuli cintu eeco ncayanda ulicijisi. 29Utaciti cibi kumweenzinyoko, ooyo ngomubambene limwi uusyomeka. 30Utatamikizyi muntu uunyina kaambo, uutana kukubisizya. 31Utanyonokeli muntu silunya nikuba kutobela nzila zyakwe, 32nkaambo Mwami Leza ulasesemwa muntu uupilingene, pele baluleme ulabayanda. 33Mwami Leza ulasinganya mukwasyi wabasizibi, pele ulaleleka mukwasyi wabaluleme. 34Basikami-kami balisumpula ulabasampaula, pele babombe ulababeda aaluse. 35Basongo balakona bulemu, pele bafuba-fuba ulabausya nsoni.

Currently Selected:

Tusimpi 3: Tonga96

Highlight

Copy