Tusimpi 2

Bubotu bwabusongo

1Mwanaangu, naa waswiilila majwi aangu, ulabamba malailile aangu mumoyo wako. 2Uteye kutwi kwako kubusongo alimwi ubikke moyo wako kukumvwisya zintu. 3Woongolwede maanu, ulilile kumvwisya zintu, 4uziyandaule mbuli nsiliva, uzilangaule mbuli lubono lusisidwe, 5ndendilyo noyoomvwisya ncocaamba kulemeka Mwami Leza. Uyoojana kuti kuziba Leza ncibotu buti. 6Mwami Leza nguupa busongo, mulinguwe momuzwa luzibo akumvwisya. 7Ulayobweda baluleme busongo bwini-bwini, nentobo yabaabo batapilingene. 8Nkaambo ulabamba micito yabaluleme akukwabilila nzila yabasalali bakwe.

9Eelyo yebo ulaziba ziluleme zyoonse zyeelede munzila mbotu iili yoonse. 10Nkaambo busongo bulanjila mumoyo wako, luzibo lulakutangazya. 11Maanu alakukwabilila, kumvwisya zintu kulakusinkilizya. 12Busongo bulakubula kuzwa kunzila zyabantu babi, bantu baamba zitaluleme. 13Aabo basiya nzila ziluleme kuti beendele muli zyamudima, 14aabo babotelwa mukucita zibi, batangala mukupilingana kwazintu, 15bantu bali aanzila zipilingene, bantu banyongene munzila zyabo.

16Alimwi busongo buyookuvuna kuzwa kumukaintu simamambe, kuzwa kumukaintu uutaluleme waamba majwi aaongelezya, 17ooyo wakasiya mulumi wakwe wabukubusi bwakwe, wakavoolozya cizuminano eeco ncaakapanga kumbele lya Leza wakwe. 18Ŋanda yakwe itola kulufu, nzila zyakwe zitola kucikkalilo cabafu. 19Taakwe naba omwe uuya kulinguwe uuboola, nikuba kupilukila kunzila zyabuumi pe. 20Yebo ulakonzya kweenda munzila zyabantu bali kabotu, akutobela nzila zyabantu baluleme. 21Baluleme bayookkala munyika, batakwe kampenda bayoosyaala mulinjiyo, 22pele basizibi bayoonyonyoonwa munyika, batasyomeki bayoogwisigwa.

Currently Selected:

Tusimpi 2: Tonga96

Highlight

Copy