Tusimpi 28
28
1Basizibi balatija nikuba kuti kunyina uubatandaanya,
pele baluleme balaima nji mbuli syuumbwa.
2Cisi cizanga cilijisi baleli banji,
pele muntu uumvwisya zintu, waluzibo ulacikkazika kabotu.
3Muntu mucete uupenzya mucetenyina uli mbuli mvula yamucobo-cobo iikukulula zisyango.
4Aabo basotoka mulawo mbabalumbaizya basizibi,
pele aabo babamba mulawo balabakazya.
5Bantu babi tabamvwisyi zyabululami,
pele aabo bayandaula Mwami Leza balabumvwisya.
6Muntu mucete weenda cakubula kampenda,
mubotu kwiinda muvubi ulaanzila zipilingene.
7Ooyo uubamba mulawo mwana musongo,
pele uumvwana abasindya ulausya wisi nsoni.
8Ooyo uujana buvubi kwiindila mukuyungizya mpindu yazikwelete, uyoobweda buyo,
uuyoofwida bacete luzyalo.
9Kuti naa muntu taswiilili zyaamba mulawo,
nikuba kukomba kwakwe kulasesemya.
10Ooyo uusolweda baluleme munzila mbi uyoocegwa mukakole kakwe mwini,
pele batakwe tumpenda bayootambula cakukona cibotu.
11Muntu muvubi ulibona kucenjela, pele mucete musongo ulamuziba mbwabede.
12Kuti baluleme bazunda, kulaba kusekelela kupati,
pele kuti basizibi baba mbabalela, bantu balayuba.
13Ooyo uusisa zinyonyoono zyakwe takwe coolwe pe,
pele ooyo uulyaambilila akuzileka uleengelelwa.
14Ulilelekedwe muntu ooyo uulemeka Mwami Leza lyoonse,
pele sicinguni ulajana mapenzi.
15Muntu mubi uulela bacete uli mbuli syuumbwa uuvuluma naa mbuli munyama wabutambo uulwana.
16Muleli uutakwe maanu walunya ulapenzya kapati,
pele ooyo uusulaika kujana lubono munzila mbi uloongola.
17Muntu uupenga akaambo kamulandu wabujayi uyootija mane kusikila
kulufu lwakwe. Kutabi naba omwe uumugwasya.
18Ooyo weenda cakubula kampenda ulafutuka,
pele ooyo weenda munzila zipilingene uyoowa cakufwambaana.
19Ooyo uulima nyika yakwe ulajana cakulya cinji,
pele ooyo uutobela zintu zyabuyo uyoozula bucete.
20Muntu uusyomeka uyoolelekwa kapati,
pele ooyo uulivubya cakufwambaana uyoosubulwa.
21Tacili cibotu kusalulula, pele muntu ulakonzya kubisya mukuti ajane kakulya.
22Muunyu kulubono uyandaula buyo bubi, katazi kuti uyoocetaala.
23Ooyo uukalalila muntu kumamanino ulayandwa, kwiinda yooyo uuli aamilomo yuupaika.
24Ooyo uubbida wisi nobaba banyina, kwamana waamba kuti,
“Kunyina ambocibede,” mulongwe wamuntu uunyonyoona.
25Syaacivulemwangu ulabusya nkondo,
pele ooyo uusyoma mu Mwami Leza ulazwidilila.
26Muntu ooyo uulisyoma mmufuba-fuba,
pele ooyo weenda cabusongo ulavunwa.
27Ooyo waabila bacete takoyoobula cintu,
pele ooyo uuvululata ababona, uyoosinganyizigwa kapati.
28Kuti naa kwalela basizibi bantu balayuba,
pele ciindi basizibi baloba, baluleme balavula.
Currently Selected:
Tusimpi 28: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
