Tusimpi 29
29
1Muntu uunga ngusicinguni nikuba kuti wacenjezegwa,
uyoofwambaana kunyonyooka, taakwe uyookonzya kumuponya.
2Ciindi baluleme nobalela mbabo bantu balasekelela,
ciindi nokulela basizibi bantu balatongooka.
3Muntu uuyandisya busongo ulabotezya kuli wisi,
pele uumvwana abavuule ulasangaula lubono lwakwe.
4Kwiindila mubululami Mwami ulaimika cisi cakwe,
pele ooyo uuyandisya masinkamulomo ulacimwaya.
5Ooyo uuupaika mweenzinyina ulaliteya kumaulu mwini.
6Muntu mubi ulacegwa acinyonyoono cakwe mwini,
pele uululeme ulaima cakukondwa.
7Muntu uululeme ulizi bacete mbobeelede kucitilwa,
pele basizibi tabakwe makani azeezi pe.
8Basikasampu-sampu balabusya nkondo mumunzi,
pele bantu basongo balalesya bukali.
9Kuti musongo amufuba-fuba batolana kunkuta,
mufuba-fuba ulakalauka akusampaula, kunyina lumvwano pe.
10Bantu batila bulowa balasulaika muntu uululeme,
alimwi basizibi balayanda kumujaya,
11Mufuba-fuba ulatondezya bukali bwakwe,
pele muntu musongo ulalijata.
12Kuti naa muleli kaswiilila twaambo twakubeja,
balupati-pati bakwe boonse balabija.
13Mucete asikudyaminina bapedwe cintu comwe.
Mwami Leza nguubapa mboni zyameso boonse bobilo.
14Kuti mwami kabeteka bacete cakutasalulula,
unoolikkalilide lyoonse acuuno cakwe cabwami.
15Musako wakoolozya bana nguubaletela busongo,
pele mwana uulendekezegwa ulausya banyina nsoni.
16Kuti basizibi bavula acalo cibi mbubonya,
pele uululeme uyoobona kunyonyooka kwabo.
17Sansaula mwanaako, natileke kukukatazya,
moyo wako uyootangala akaambo kakwe.
18Kuti kakutakwe kusolwedwa a Leza,
bantu tabaleki kucita zitondwa,
pele ulilelekedwe ooyo uubamba mulawo.
19Majwi aalo taakonzyi kululamika mubelesi pe,
nikuba kuti kumvwa ulamvwa,
pele takonzyi kubikka moyo wakwe pe.
20Sena ulabona muntu uunongosola kwaamba?
Mufuba-fuba ulasyomeka kwiinda nguwe.
21Kuti muntu walendekezya mubelesi wakwe mukumupa zyoonse nzyayanda kumamanino uyoomunyanga kufumbwa ncajisi.
22Muntu mukali ulabusya nkondo,
muntu uutalyatwi ulabisya zinji.
23Kulisumpula kwamuntu kulamuleta ansi,
pele muntu mutete moyo ulalemekwa.
24Muntu uugwasyanya amubbi ulalijazya lwakwe mwini,
uyoosubulwa aamba cabwini,
pele ataamba Leza ulamusinganya.
25Kuyoowa kwamuntu kuba mbuli kakole,
pele ooyo uusyoma mu Mwami Leza ulakwabililwa.
26Bantu banji balayanda kufwidwa luzyalo amuleli,
pele lubeta lubotu luzwa ku Mwami Leza.
27Muntu uululeme ulasesemwa uutasyomeki,
awalo sizibi ulasesemwa uululeme.
Currently Selected:
Tusimpi 29: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
