Tusimpi 27
27
1Utalikankaizyi bwajunza, nkaambo tozi ziyoocitika mubuzuba oobu.
2Muntu uumbi nguuelede kukulumbaizya
kutali lwako omwini pe,
simweendanzila kutali milomo yako pe.
3Ibbwe lilalema awalo musenga mmukuli wini,
pele kunyema kwamufuba-fuba kulainda zyoonse zyobilo eezi.
4Kunyema nkokuletela lunya, bukali bulakatazya,
pele ino nguni uukonzya kuyumina munyono?
5Kukalalila kwakaanzambwene nkubotu kwiinda luyando lusisidwe.
6Uukuyanda nakucisa ulasyomeka,
pele kumyonta kwasinkondonyoko nkwaluuni.
7Kufumbwa muntu uukkusi ulakaka kulya buci,
pele ooyo uufwide nzala cintu nocilula walo cilalweela.
8Muntu wasweekede kuzwa kumunzi wakwe uli mbuli kayuni kaluba citeente cako.
9Tufuta atununkilizyo zilabotezya moyo wamuntu,
mbokubede akulaigwa kumweenzinyoko uukuyanda.
10Utalekelezyi mweenzinyoko amulongwe wauso,
alimwi mubuzuba bwamapenzi utakatijaanini kuŋanda yamunyoko,
nkaambo ncibotu kuba aasimunzinyoko uulaafwiifwi kwiinda munyoko uuli kulaale.
11Koba musongo, mwanaangu kuti moyo wangu utangale,
ndendilyo neyookonzya kwiingula uundisampaula.
12Muntu musongo abona mapenzi ulayuba,
pele mufuba-fuba ulaya nkukonya ooko, kwamana waakupenga.
13Tola cibaki camuntu wasyomezya kubbadelela mweenzu,
cibe cijatilizyo mbubonya mbuli ncosyomezya kubbadelela mukaintu nanyenda.
14Kuti naa muntu wafuma kujuzya mweenzinyina cakupozomoka,
kujuzya kwakwe kukonzyenye akusinganya.
15Mukaintu walubweko uli mbuli mvula yalunywaanywa buzuba bwamuyoba.
16Kumulesya kuli mbuli kusinkila luuwo,
naa mbuli kufumbatila mafuta mujanza.
17Mbubonya mbuli cibulo mbocikwenga cibulonyina,
mbubonya oobo awalo muntu mbwafula maanu mweenzinyina.
18Ooyo uulimina-limina mukuyu uyoolya micelo yawo,
ayooyo uubombela simalelo wakwe uyoopegwa bulemu.
19Mbubonya mbuli busyu mbobuboneka mumaanzi walanga,
mbubonya oobo awalo moyo wamuntu mbuumubonesya.
20Lufu alunyonyooko tazikkuti, mbwaabede mbubonya oobo aalo meso aamuntu.
21Cuumpilo ncansiliva, ceengelo ncangolida,
pele muntu ulasunkwa akulumbaizigwa kwakwe.
22Nikuba kuti mufuba-fuba wamusyangila maanu, wamutwida tokonzyi kumugwisya bufuba-fuba bwakwe.
23Weelede kuzibisya mbelele zyako mbozibede, akubikka moyo wako kumatanga aako.
24Nkaambo lubono talukkalilili kwalyoonse alyoonse, musini tuukabi kumazyalani oonse.
25Bwizu bwajugwa bwakusanizya banyama, mweemvwe ulasyuuka,
bwizu bwamutulundu-lundu bwajugwa,
26tubelele twasaninwa tuyookupa zyakusama, azyalo mpongo ziyookuulila muunda.
27Uyoojana mukupa munji kuzwa kumpongo yebo abamukwasyi wako
ngomuyoonywa, akusanina babelesi bako basimbi.
Currently Selected:
Tusimpi 27: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
