Tusimpi 26
26
1Mbubonya mbuli caanda ciindi camainza niiba mvula ciindi cakutebula,
mbombuboobu mufuba-fuba mbwateelede bulemu.
2Mbuli katiiti kababama, naa mbuli kamembya kapembelela,
mbubonya oobo kusinganya kakunyina akaambo takucisi.
3Nswepu njakuumya bbiza, nsimbi nzyakubikka mukanwa lyambongolo,
awalo musako ngwakuumya mufuba-fuba.
4Utainguli mufuba-fuba mbuli kubuyanga bwakwe, inga waba noba mbuli nguwe.
5Ingula mufuba-fuba mbuli bweelede buyanga bwakwe, inga waba nalisongwaazya mwini.
6Mbuli kulikosola cituta, naa kunywa manyongwe mbokubede kutumya makani abafuba-fuba.
7Mbuli kulengelela kwamaulu aalemene, mbokabede kasimpi mumilomo yabafuba-fuba.
8Mbuli kubikka bbwe munkwibba, mbwabede uupa mufuba-fuba bulemu.
9Mbuli mamvwa mujanza lyamukolwi,
mbokabede kasimpi mumilomo yabafuba-fuba.
10Mbuli sibuta uucita ciyase-yase,
mbwabede ooyo uubelesya mufuba-fuba naba mweendanzila.
11Mbuli mubwa uupilukila malusi aakwe,
mbwabede mufuba-fuba ooyo uucita zyabuyanga lyoonse.
12Sena ulabona muntu uulicenjezya mumeso aakwe?
Mufuba-fuba ulasyomeka kwiinda nguwe.
13Mutolo ulaamba kuti, “Kuli syuumbwa mumugwagwa,
syuumbwa wabutambo uleendeenda mutuzila!”
14Mbuli buzumbaana citendele amulyango,
mbwabede mutolo abulo bwakwe.
15Bamwi bantu mbatolo cakuti nabbizya janza lyakwe
mumutiba wamana ulalengaana kulisisya kumulomo wakwe.
16Mutolo uliyeeya kuti musongo kwiinda bantu bali
ciloba bazi kwiingula kabotu.
17Ooyo mweendanzila uunjilila kuzwangana kutali kwakwe,
uli mbuli muntu uujata matwi aamubwa.
18Mbuli muntu uusondokede,
sizibi ulafusa zilwanyo zyamulilo niiba mimvwi mibi.
19Mbwabede oobo muntu uucenga mweenzinyina kwamana waamba kuti,
“Ndalikusobana buyo!”
20Kuti kakunyina nkuni, mulilo ulazima,
naa taakwe uuvwiya kuzwangana kulamana.
21Mbuli makala aanyeka, ambuli nkuni kumulilo,
mbwabede simazwanga nabusya nkondo.
22Majwi aamuntu uuvwiya ali mbuli zilyo zinono,
alanjila mukati mwini lyamuntu.
23Mbuli cibelesyo cizilulwidwe kabotu,
mboibede milomo iinongosola iijisi moyo mubi.
24Muntu waluciso ulaupaupa amilomo yakwe,
pele mumoyo wakwe ulasisa lucengo.
25Nikuba kuti ulaamba cabuuya, utamusyomi,
nkaambo zisesemyo zili ciloba zili mumoyo wakwe.
26Luciso lwakwe lulakonzya kusiswa alucengo,
pele bubi bwakwe buyooyubununwa mumbungano.
27Kuti naa muntu wasya cilindi, uyoowida mulincico mwini,
kuti naa muntu ukunkulisya bbwe, lilamulimba.
28Mulaka uubeja ulasulaika aabo mboucisa,
mulomo muuba ulaleta lunyonyooko.
Currently Selected:
Tusimpi 26: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
