Tusimpi 25
25
Tusimpi tumwi twa Solomoni
1Ntootu atumwi tusimpi twa Solomoni ntubakalembulula bantu ba Hezekiya mwami wacisi ca Juda.
2Bulemu bwa Leza nkusisa makani, pele bulemu bwabamami nkuvuntauzya kaambo kali koonse kabotu-kabotu.
3Mbubonya mbuli kujulu mbokuli kule, ambuli nyika mboili ansi eeni,
mbubonya oobo myoyo yabami mbwiitazibwi.
4Wagwisya matombe munsiliva, mulazwa cibelesyo camufuzi wayo.
5Wagwisya muntu sizibi kumbele lyamwami,
cuuno cakwe abwami cilakkalilila mubululami.
6Utalisumpuli kumbele lyamwami, nikuba kwiima munsi aazyuuno zyabantu balemenede.
7Nkaambo ncibotu kuti walo akwaambile kuti,
“Koboola kuno” kwiinda kuti akufwisye nsoni kumbele lyamweendelezi.
Eeco ncoobona ameso aako
8utafwambaani kucileta kunkuta,
kayi ino uyoocita buti kuti naa mweenzinyoko wakuusya nsoni?
9Amoobozyanye amweenzinyoko,
utayubununi makani aaumwi,
10ambweni umwi uuswiilide makani aayo uyookuusya nsoni,
nkabela mpuwo yako mbi tiikooyoomana pe.
11Majwi mabotu ali mbuli zikoto zyangolida akati kansiliva.
12Kutapata kwamuntu musongo kuli mbuli kankwinta-nkwinta kangolida,
naa mbuli kalisakatizyo kangolida iini-ini kumuntu uumvwa.
13Mutumwa uusyomeka uli mbuli caanda citontozya ciindi cakutebula kuli baabo bamutuma,
ulakkazika myoyo yabasimalelo bakwe.
14Muntu uulikankaizya kupa zipego nzyatapi uli mbuli makumbi aluuwo lutaleti mvula.
15Kwiindila mukubomba moyo muleli inga woongelezegwa,
mulaka mutete ulakonzya kutyola mafuwa.
16Kuti naa wajana buci,
ulye bweelede, naa ubulisye ulaluka.
17Utanoocuculikili kuŋanda yamweenzinyoko ulaba nakucimwa akukusula.
18Muntu uubejelezya mweenzinyina uli mbuli nkoli, naa panga nuuba muvwi uubosya.
19Kusyoma muntu uutasyomeki muciindi camapenzi kuli mbuli lino licisa nikuba kuulu kulemene.
20Mbuli uusamununa cibaki mubuzuba bwampeyo, naa kutila ndulwe iinyenga acilonda,
mbwabede ooyo wiimbila muntu uuuside.
21Kuti naa sinkondonyoko wafwa nzala, mupe cakulya,
kuti naa wafwa nyota mupe maanzi aakunywa.
22Nkaambo naa wacita boobo walo ulalemwa kumakosi,
eelyo Mwami Leza uyookulumbula.
23Mbuli luuwo lwakunyika mboluleta mvula,
amulaka uubeja ulaleta kulangana kubi.
24Ncibotu kukkala acooko caatala aciluli kwiinda kukkala muŋanda yomwe amukaintu silubweko.
25Makani mabotu aazwa kucisi cakulaale ali mbuli maanzi aatontozya muntu uukatede.
26Muntu uululeme uuzuminina sizibi uli mbuli kasensa kali aantimba naa mbuli mukalo wasimbila.
27Tacili cibotu kulya buci bunji, nkaako amucenjele amajwi aakulumba.
28Muntu uutakonzyi kulijata uli mbuli uuli abwaanda bumwaikide.
Currently Selected:
Tusimpi 25: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
