Tusimpi 21
21
1Moyo wamwami uli mbuli kalonga kamaanzi mujanza lya Mwami Leza,
nkanyona mokeelede kwiinda.
2Muntu ubona mbuli kuti nzila zyakwe zyoonse zililuleme kulinguwe,
pele Mwami Leza nguupima moyo.
3Kucita ciluzi ciluleme cilatambulika kapati
ku Mwami Leza kwiinda cipaizyo.
4Meso aakatwango-twango, amoyo wakulisumpula,
lambe lyabasizibi, nzinyonyoono.
5Mizeezo yamuntu munkutwe ilamujanya zyakulaya zinji,
pele uuli woonse uufwamvwaanya zintu ulaba mucete.
6Lubono lujanwa kwiindila mukubelesya kubeja luli
mbuli ciya camaanzi cuuntumuka alimwi nkakole kalufu.
7Lutuzi lwabasizibi lulabakwelelezya,
nkaako balakaka kucita ziluleme.
8Nzila yasimulandu njakuzetauka-zetauka,
pele bukkale bwamuntu uunyina kaambo buliluzi.
9Ncibotu kukkala mucooko aatali aciluli,
kwiinda kukkala muŋanda yomwe amukaintu sikubweka.
10Moyo wamuntu sizibi uyandisya bubi,
takonzyi kweengelela mweenzinyina.
11Ciindi sikasampu-sampu nasubulwa,
mufuba-fuba ulacenjela,
ciindi musongo nalaililwa awalo ulajana luzibo.
12Muntu uululeme ulalangilila ŋanda yabasizibi,
ulanyonyoona basizibi akaambo kabubi bwabo.
13Kuti naa muntu wasinka matwi aakwe kuti atamvwi kulila kwabacete,
awalo uyoolila, kwamana taakwe uutikamuvuwe.
14Cipego cipegwa mukusisikizya cilesya kunyema,
asinkamulomo lisisikizigwa mucibaki lilatondezya bukali.
15Ciindi libetekwa bweelede, baluleme balakkomana,
pele cilayoosya kuli baabo bacita zibi.
16Muntu uuleya kuzwa munzila yakumvwisya zintu, ulindila lufu.
17Ooyo uuyandisya kusobana uyooba mucete,
kufumbwa uuyandisya waini abudodoodo takavubi.
18Sizibi ncinunuzyo camululami,
uutasyomeki ncinunuzyo camuntu uuluzi.
19Ncibotu kukkala munkanda kwiinda kukkala amukaintu sikubweka mukali.
20Muŋanda yamusongo muli ziyobwedo zyazilyo zinono amafuta,
pele mufuba-fuba ulida limwi nzyajisi zyoonse.
21Ooyo uutobela zyabululami aluzyalo ulajana buumi, bululami abulemu.
22Muntu musongo ulalwana munzi wabasinguzu,
akumwaya nkwakwa nzyobasyoma.
23Ooyo uubamba mulomo amulaka wakwe ulalikwabilila kumapenzi.
24Muntu uulisumpula walutuzi ulizizilwe azina lyakuti ngu “Sikasampu-sampu,”
ulitondezya bukali cakulisumpula.
25Cisusi camutolo cilamujaya,
nkaambo tayandi kubelesya maanza aakwe.
26Buzuba boonse ulasukamina zintu zinji,
pele uululeme ulapa cakumaninina.
27Cipaizyo camuntu sizibi cilasesemya,
ino mbuti eeco ncaleta amoyo mubi!
28Kamboni mubeji uyoonyonyoonwa,
pele majwi aamuntu uuswiilila ayookkalilila mane kukabe kutamani.
29Muntu sizibi ngusikazumanana,
pele muntu uululeme ulayeeyesya nzila zyakwe.
30Taakwe busongo, taakwe luzibo,
taakwe muzeezo uukonzya kuzwidilila mukulwana Mwami Leza.
31Bbiza lilibambilidwe buzuba bwankondo,
pele Mwami Leza nguupa kuzunda.
Currently Selected:
Tusimpi 21: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
