Tusimpi 20
20
1Waini ulasampuzya,
cikola cilapilinganya kufumbwa uleesegwa anzizyo tali musongo.
2Bukali bwamwami buli mbuli kutimba kwa syuumbwa,
ooyo uumukalazya ulasweekelwa buumi bwakwe.
3Mbulemu kumuntu kutayanda kulwana,
pele bafuba-fuba boonse balayanda kupampana.
4Mutolo talimi muciindi ceelede,
nkaako ciindi cakutebula ulainka kuyoolingula,
pele taakwe ncajana.
5Makanze aamoyo wamuntu ali mbuli maanzi malamfu,
pele muntu uumvwisya zintu ulaateka.
6Bantu banji balalyaamba mbobasyomeka,
pele ino nguni uukonzya kujana muntu uusyomeka?
7Muntu uululeme uleenda kakunyina kampenda,
balilelekedwe abana bazyalani lyakwe.
8Ciindi mwami nakkala acuuno cakwe kuti abeteke,
ulapupulula bubi boonse abubona ameso aakwe.
9Nguni uukonzya kwaamba kuti,
“Ndalibamba, moyo wangu ulilondokede,
ndasalala ndinyina zibi?”
10Zipimyo azyeelesyo ziteelede zilasesemya ku Mwami Leza.
11Naba mwana ulazibwa kwiindila mumicito yakwe,
naa ncacita cilasalala akululama.
12Matwi aakumvwisya, ameso aakubonya,
zyoonse zyobilo Mwami Leza nguwakazilenga.
13Utanooyandisyi bulo, inga waba noba mucete,
kopakamene ndendilyo noyooba aazilyo zinji.
14Muntu uuula ulati, “Ncibi, ncibi,
pele ainka ulalikankaizya acintu eeco ncaaula.”
15Kuli ngolida alimwi atubwe tuyandisi tunji-tunji,
pele mulomo waamba zyabwini ulayandika kwiinda nzinzyo.
16Tola cibaki camuntu wasyomezya kubbadelela mweenzu,
cibe cijatilizyo mbubonya mbuli wasyomezya kubbadelela mukaintu nanyenda.
17Cilyo cijanwa munzila mbi cili aamucanka kumuntu,
pele kumamanino mulomo wakwe ulazula vu lyalo.
18Kuti naa kuli noyanda kulwana nkondo usaangune kulaililwa,
usaangune kubuzya-buzya.
19Muntu uumvwisya uyubununa maseseke,
nkaako utamvwani amuntu waambaulisya.
20Kuti umwi wasinganya wisi nobaba banyina,
lambe lyabuumi bwakwe liyoozimina mumudima uusiya mbi.
21Lubono lufumininwa kujanwa kumamanino talulelekwi.
22Utaambi kuti, “Ndapilusya bubi,
nkaambo kacibi eeci.” Lindila, Mwami Leza uyookubambila.
23Mwami Leza ulasesemwa zyeelesyo ziteelede,
akwalo kupima cakutasyomeka takumuboteli pe.
24Mwami Leza nguuenzya ntaamo zyamuntu,
ino mbuti muntu mbwakonzya kumvwisya nzila yakwe?
25Nkakole kumuntu kufwambaana kusyomezya kupa
cimwi kuli Leza nkaambo inga ambweni
wasandula mizeezo yakwe kali wakonkezya kale.
26Mwami mubotu ulapupulula kugwisya basizibi,
ulabasyonda amavwili aacuuno cakwe.
27Muuya wamuntu uli mbuli lambe lya Mwami Leza,
ulamulingula mukati mwini.
28Luzyalo akusyomeka zicita kuti mwami akkale kabotu,
kwiindila mukululama kwakwe cuuno cakwe cabwami cilakkalilila.
29Bulemu bwabakubusi ninguzu zyabo,
pele kweebeka kwabamadaala nimvwi zyabo.
30Zyuumo zicisa nzezigwisya bubi,
mibunda ilasalazya mukati mwini.
Currently Selected:
Tusimpi 20: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
