Tusimpi 19
19
1Muntu mucete kanyina kampenda mmubotu kwiinda mufuba-fuba uuli aamilomo yaamba zipilinganya.
2Tacili cibotu kumuntu kusungwaala kanyina luzibo nikuba kubindaana akusweeka.
3Ciindi bufuba-fuba bwamuntu nobumutola kukunyonyooka,
moyo wakwe uzonda Mwami Leza.
4Lubono lujanya balongwe banji,
pele mucete naba mweenzinyina ulamusiya.
5Kamboni uubeja uyoosubulwa,
ooyo waamba zyakubeja takalekwi buyo.
6Bantu bayanda muntu uubafwida luzyalo
bayandisya muntu uubapa zipego.
7Muntu mucete balamusulaika babunyina,
abalo beenzinyina balatantamuka,
nikuba kuti ulabatobela cakulikombelezya,
balamusiya akabajane kuli!
8Ooyo uujana busongo ulaliyanda mwini,
ooyo uukondwa mukumvwisya zintu ulazwidilila.
9Kamboni uubeja uyoosubulwa,
ooyo waamba zyakubeja uyoonyonyoonwa.
10Taciboti kuti mufuba-fuba ulakkala cakulikwaya,
awalo muzike teelede kweendelezya bana babami.
11Muntu ulaamaanu ulamuka kufwambaana kunyema,
bantu balamulemeka nkaambo ulalekelela milandu.
12Bukali bwamwami buli mbuli kutimba kwa syuumbwa,
pele kukondwa kwakwe kuli mbuli mume uuli abwizu.
13Mwana mufuba-fuba ulanyonyoozya wisi,
mukaintu walubweko uli mbuli mvula yalunywaanywa.
14Muntu ulakonzya kukona maanda alubono kuzwa kubazyali,
pele mukaintu wamaanu uzwa ku Mwami Leza.
15Butolo bupa koonesya,
muntu uutalikwenzyi lyoonse unoofwa nzala.
16Ooyo uuswiilila malailile ulabamba buumi bwakwe,
pele ooyo uusampaula nzila zyakwe ulafwa.
17Ooyo uufwida bacete luzyalo ukweletesya Mwami Leza,
nkabela Leza uyoomulumbula akaambo kaceeco ncacita.
18Laya mwanaako nacikonzeka,
utamulekeli kuti akanyonyooke pe.
19Muntu mukali uleelede kuti acibone,
kuti naa wamuvuna, uciyoomuvuna alimwi.
20Koswiilila kulaigwa,
utobele malailile,
eelyo kumamanino uyooba musongo.
21Muntu ulijisi mizeezo minji mumoyo wakwe,
pele Mwami Leza nguucita kuti cibe mbuli mbwayanda mwini.
22Cintu ciyandika kumuntu nkusyomeka,
ncibotu kuba mucete kwiinda kuba mubeji.
23Kulemeka Mwami Leza kutola kubuumi,
uuli boobo ukkedwe camba tasikilwi mapenzi.
24Bamwi bantu mbatolo cakuti nabbizya janza lyakwe
mumutiba takonzyi kulinyamuna kuti alilisye pe.
25Kuti sikasampu-sampu mwamuuma,
mufuba-fuba inga wacenjelela mpawo.
Kalalila muntu uumvwisya zintu eelyo ulayungizya luzibo lwakwe.
26Ooyo uubbida wisi akutanda banyina,
mmwana uuusya nsoni ujazya bweeme.
27Kuti uleke kuswiilila malailile mwanaangu,
ulaleya kumajwi aaluzibo.
28Kamboni mubi ulasampaula mbeta,
mulomo wasizibi ulalya bubi.
29Basikasampu-sampu balibambilidwe zisubulo,
abafuba-fuba kuumwa kumusana.
Currently Selected:
Tusimpi 19: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
