Tusimpi 11
11
1Zipimyo zyalucengo zilasesemya ku Mwami Leza,
pele zipimyo zyeelede zilamubotezya.
2Kwaza kulisumpula,
azyalo nsoni zilaboola,
pele kulibombya nkokuleta busongo.
3Bulondosi bwabantu baluleme bulabasolweda,
pele batasyomeki balanyonyoonwa akutasyomeka kwabo.
4Lubono talugwasyi mubuzuba bwabukali,
pele bululami bulavuna kulufu.
5Bululami bwabatakwe kampenda mbobucita kuti nzila yabo kailuzi,
pele basizibi balawisigwa abubi bwabo beni.
6Bulondosi bwabantu baluleme mbobubavuna,
pele batasyomeki balacegwa azisusi zyabo beni.
7Muntu sizibi naa wafwa,
lulangilo lwakwe lulamana,
zyoonse eezyo nzyaakali kulangila kuyoocita zilamana.
8Muntu uululeme ulavuna kumapenzi,
kwamana mapenzi aayo ngoonya alaboolela sizibi.
9Muntu uutezi Leza ulanyonyoona mweenzinyina amulomo wakwe,
pele mululami kwiindila muluzibo lwakwe ulafutuka.
10Kuti baluleme bazwidilila,
munzi ulasekelela,
kuti basizibi banyonyooka kulaba kutangala.
11Kwiindila mukulelekwa kwabaluleme munzi ulasumpuka,
pele milomo yabasizibi ilaunyonyoona.
12Muntu uutakwe maanu ulasampaula mweenzinyina,
pele muntu uumvwisya zintu uumuna buyo.
13Muntu uuvwiya-vwiya ulayubununa maseseke,
pele uusyomeka ulasisa maseseke.
14Kuti kwabula busololi, cisi cilawa,
pele kuti kwavula balailili kulaba kuzunda ncobeni.
15Ooyo uulibikka kuti abe cijatilizyo mubusena bwaumwi uyoopenzegwa,
pele ooyo uukaka kucita boobo unooli kabotu.
16Mukaintu siluzyalo ulalemekwa,
pele mukaintu uutalilemeki ujazya nsoni.
Batolo tabajani lubono,
pele bankutwe balavuba.
17Mwaalumi siluzyalo ulaligwasya mwini,
pele mwaalumi silunya ulalicisa mwini.
18Muntu sizibi uvola zyalucengo,
pele ooyo uucita ziluleme ulalumbulwa.
19Muntu wiimvwi nji mubululami ulajana buumi,
pele ooyo uutobela bubi ulitola kulufu mwini.
20Mwami Leza ulasesemwa bantu bapilingene mumoyo,
pele ulabotelwa munzila zyabaabo beenda cakubula kampenda.
21Nceeci ncoelede kuziba.
Muntu sizibi uyoosubulwa pele aabo baluleme bayoolelekwa.
22Mbubuli kasengele kangolida mumpemo yangulube,
mbobubede bubotu bwamukaintu sikumulomo.
23Kusukama kwamululami kutola kububotu,
pele lulangilo lwamuntu sizibi ndwakubukali buyo.
24Muntu umwi ulapa mbwayanda,
kwamana ujana kunji,
ooyu umwi tapi kwamana ulacetaala.
25Muntu waabila bamwi uyoozwidilila,
ayooyo uusanina bamwi uyoosaninwa.
26Bantu balasinganya muntu uukasya maila naajisi,
pele ooyo uuulisya maila balamuleleka.
27Ooyo uuyandaula zibotu ulajana coolwe,
pele ooyo uuyandaula bubi ulabujana.
28Kufumbwa ooyo uusyoma buvubi bwakwe,
ulawa, pele muntu uululeme ulasyuuka mbuli tutete.
29Ooyo uupenzya mukwasyi wakwe,
takwe ncayoojana ulanjila mumapenzi
abalo bafuba-fuba nkulya kwabasongo.
30Mucelo wamuntu uululeme mmusamu wabuumi,
kutyola milawo nkokuletela lunyonyooko.
31Kuti naa baluleme kabalumbulwa ansi aano mbubonya
mbuli bweelede milimo yabo,
ino ciyooba buti kubantu batazi Leza abasizibi!
Currently Selected:
Tusimpi 11: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
