Tusimpi 10
10
Tusimpi twa Solomoni
1Ntootu tusimpi twa Solomoni,
mwana musongo ulatangazya wisi,
pele mwana mufuba-fuba ujazya banyina nsoni.
2Lubono lujanwa munzila mbi talugwasyi,
pele bululami bulavuna kuzwa kulufu.
3Mwami Leza talekelezyi uululeme kuti afwe nzala,
Pele tapi muntu mubi eezyo nzyasukamina.
4Maanza aatontola acita kuti muntu abe mucete,
pele maanza mayumu alavubya.
5Mwana uucela micelo cilimo musongo,
pele mwana woona ciindi cakutebula ujazya nsoni.
6Zileleko zivumba mutwe wabululami,
pele muntu mubi waamba zyalutuzi.
7Kuyeeyegwa kwamuntu uululeme ncileleko,
pele zina lyamuntu sizibi liyoobola.
8Moyo wamuntu uucenjede ulaswiilila malailile,
pele mufuba-fuba sikubweka ulanyonyooka.
9Muntu weenda cakululama uleenda cakuliiba,
pele ooyo weenda munzila zipilingene uyoozibwa.
10Ooyo uufunyina ulaleta mapenzi,
awalo mufuba-fuba sikubweka ulanyonyooka.
11Mulomo wamuntu uululeme nkasensa kabuumi,
pele mumulomo wamuntu mubi muli lutuzi.
12Kuzonda kuleta kuzwangana,
pele luyando lulavumba milandu yoonse.
13Busongo buzwa mumilomo yamuntu uumvwisya zintu,
pele musako lyoonse ulauma kusule lyamuntu uutakwe maanu.
14Bantu basongo balayobola luzibo,
pele mulomo wamufuba-fuba ulaita lunyonyooko.
15Lubono lwamuvubi ndolukwakwa lwakwe,
pele bucete nkunyonyooka kwabapusyi.
16Milimo yabaluzi ibaletela buumi,
pele mpindu yabantu basizibi ncisubulo.
17Muntu uulaika uleenda munzila yabuumi,
pele ooyo uukaka kululamikwa ulasweeka.
18Ooyo uubikkilila nguubeja,
ooyo waambilizya zyakutamikizya mufuba-fuba.
19Mukuvuzya majwi aakwaamba,
takubuli kubisya, pele ooyo uulijata mmusongo.
20Mulaka wamuntu uululeme uli mbuli nsiliva mbotu iini-ini,
pele moyo wamuntu sizibi ngwabuyo.
21Milomo yamuntu uululeme ilasanina bantu banji,
pele bafuba-fuba balafwa akaambo kakubula maanu.
22Cileleko cizwa ku Mwami Leza cilaletela buvubi,
alimwi taleti mapenzi kulincico.
23Kumufuba-fuba ncisobano kucita zintu zibi,
pele muntu uumvwisya zintu ulabotelwa mubusongo.
24Eeco sizibi ncayoowa nciconya nceciyoomusikila,
pele eeco muntu uululeme ncayanda, ncencico ncayoopegwa.
25Ciindi guwo nolyuungisya basizibi balatolwa,
pele baluleme balaima nji lyoonse alyoonse.
26Mbuli bubede ndulwe mukanwa,
ambuli bubede busi mumeso,
mbwabede muntu mutolo kuli baabo bamutuma.
27Kulemeka Mwami Leza kuloongozya,
pele myaka yabasizibi ilatwentanyizigwa.
28Lulangilo lwabaluleme lulabaletela kukondwa,
pele lulangilo lwabasizibi kunyina nkolubatola.
29Nzila ya Mwami Leza ncikwabilizyo kuli baabo baluleme,
pele kuli baabo bacita zibi ndunyonyooko.
30Muntu uululeme takazyulwi,
pele sizibi takakkalilili munyika.
31Mulomo wamuntu uululeme ulaamba zyabusongo,
pele mulaka waamba zibi uyookosolwa.
32Mulomo wamuntu uululeme ulizi cintu citambulika,
mulomo wasizibi uzi kwaamba zitaluleme.
Currently Selected:
Tusimpi 10: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
