Tusimpi 1

Zyatusimpi

1Ntootu tusimpi twa Solomoni mwanaa Devedi, mwami wa Isilayeli. 2Ntwakuti bantu bazibe busongo alulayo, kuti bamvwisye majwi aaluzibo. 3Kuti batambule lulayo lwakucita zintu mubusongo, mubuluzi bweelede. 4Kuti bantu babe aamaanu. Kuti bakubusi bajane luzibo akumvwisya. 5Kuti muntu musongo awalo aswiilile ayungizizye lwiiyo, asimaanu ajane lulayo. 6Kuti bantu bamvwisye tusimpi azikozyanyo, bamvwisye twaambyo atulabi twabasongo.

7Kulemeka Mwami Leza ngamatalikilo aaluzibo, pele bafuba-fuba balasampaula lulayo.

Kucenjezegwa kwabakubusi

8Mwanaangu, koswiilila zikulaya uso, utaubausyi zikulaya banyoko. 9Kwiisya kwazyo kuyookuletela bukkale bubotu mbuli musini akawenge kazyo mbozibotya uuzisamide.

10Mwanaangu, naa basizibi bakoongelezya utabazuminini. 11Naa baamba kuti, “Boola tuyubilile bantu tubacise. Boola tulindilile bantu banyina mulandu, 12Tubamene buumbulu, tubavumbe mbuli cuumbwe, mbubonya mbuli bazikkwa. 13Twamana tujane zintu zyoonse ziyandika. Tuzuzye maanda eesu azisaalwa, 14Twauma cisolo anduwe twaabane ncotuyoobba.”

15Mwanaangu, utainki ambabo, utakasoli kweenda munzila zyabo pe. 16Nkaambo bazuzila zibi, balafwambaana kutila bulowa. 17Tacigwasyi kuteya kakole bayuni kababwene. 18Bantu aaba balindilila bulowa bwabo beni, balaliyubilila beni. 19Mbwaabede mamanino aabantu boonse bayandaula buvubi munzila mbi eeyi. Bulajaya mbabonya aabo babujana.

Busongo bucenjezya babubula

20Busongo bulaliitila mumigwagwa, bulapozomoka muzisambalilo, 21bulaliitila atala aabwaanda bwa munzi, mumilyango yamunzi lulaamba kuti,

22“Nywebo nobafuba-fuba, ino muyooleka lili kuyandisya nzila zyanu zyabufuba-fuba? Anywe nomusampaula muyooleka lili kubotelwa mukusampaula? Nywebo nobafuba-fuba muyooleka lili kusulaika luzibo? 23Nimwaliswiilile kutapata kwangu nindamwaambila zili mumoyo wangu akumwaambila mizeezo yangu. 24Mukuti ndamwiita pele nywebo mwakaka kumvwa, ndatandabika janza lyangu, taakwe naba omwe waswiilila. 25Mukuti mwaubausya kulaya kwangu tamubikki myoyo mukucenjezya kwangu 26ambebo njoomuseka mwaakunjila mumapenzi, mwaakuyoowa njoomusampaula. 27Buyoofu buyoomusikila mbuli guwo, mapenzi ayoomukukula mbuli kambizi, mause amakatazyo ayoomusikila. 28Lino bayoondiita, pele nsikooyoovuwa, bayoondiyandaula pele tabakooyoondijana. 29Mukuti bakasulaika luzibo tiibakasala kulemeka Mwami Leza, 30bakakaka kuswiilila lulayo lwangu bakasampaula kucenjezya kwangu, 31nkaako bayoolya micelo yamilimo yabo bayookkuta micelo yamakanze aabo. 32Nkaambo bafuba-fuba balajaigwa munzila zyabo, kuliiba kwabafuba-fuba kulabanyonyoona. 33Pele ooyo uundiswiilila uyookkala kabotu, uyoolikkalila, kakunyina ncayoowa kuti ciyoomucisa.”

Currently Selected:

Tusimpi 1: Tonga96

Highlight

Copy