Myeelwe 34
34
Minyinza yanyika
1Lino Mwami Leza wakalailila Mozesi kuti 2aambile bantu ba Baisilayeli kuti, “Mwaakunjila mu Kenani nyika njeyoomupa, minyinza yayo inookkede boobu. 3Munyinza wakumusanza uyoozwida kunkanda ya Zini mane do kumunyinza wa Edomu. Kujwe uyoozwida kugolela Lwizi Lwamunyo. 4Ngooyo mane waakusika kumusanza aakazila ka Akulabimu, waindila mane ku Zini akuyoosika kumusanza wa Kadesyibeniya. Kuzwa waawo uyooya ku Hazaadaa mane kusikila ku Azimoni, 5ooko nkuyoonjila ku mulonga wa Ijipiti waakugolela mu Lwizi Lupati.
6“Munyinza wakumbo ndwizi Lupati.
7“Wakunyika uyootalikila ku Lwizi Lupati kuyoosika kucilundu ca Hoo. 8Kuzwa ooko ngooyo mane kuyoosika ku Hamati. Wamana uyooya ku Zedadi 9ngooyo waakusika ku Zifuloni waakugolela ku Hazaenani. Ooyu ngomunyinza wakunyika.
10“Munyinza ooyu uyootalikila ku Hazaenani kusikila ku Syefamu. 11Kuzwa ooko ngooyo mane ku Libula kulubazu lwakujwe lya Ayini. Wamana uyoongenyuka kutobelezya lwizi lwa Kineleti, 12ngooyo watobelezya mulonga wa Jolodani waakugolela ku Lwizi Lwamunyo. Eeyo njenyika yanu aminyinza mwiigolela.”
13Mpawo Mozesi wakaambila Baisilayeli kuti, “Eyi njenyika njemuyooabana kwiindila mukuuma cisolo. Mwami Leza wakalailila kuti ikapegwe kumisyobo iili fuka acisela. 14Nkaambo kakuti misyobo ya Lubeni a Gadi, acisela cimwi caba Manase ili kujwe. Batambula kale caabilo cabo. 15Eeyi misyobo yobilo acisela yatambula kale caabilo cabo kujwe lya Jolodani kulangana a Jeliko kumapaswido aazuba.”
Basololi basalidwe kwaabanya nyika
16Lino Mwami Leza wakaambila Mozesi kuti, 17“Aaba mbabasololi batikaabanye nyika, Eliyazaa mupaizi, Josyuwa mwanaa Nuni. 18Alimwi usale musololi omwe kuzwa kumusyobo omwe-omwe uyoobagwasya. 19Mazina aabo ngaaya: Kuzwa kumusyobo wa Juda ngu Kelebi mwanaa Jefune, 20kuzwa kumusyobo wa Simiyoni ngu Syimuweli mwana wa Amihudi.” 21Kuzwa kumusyobo wa Benjamini ngu Elidadi mwanaa Kisiloni. 22Kuzwa kumusyobo wa Dani ngu Buku mwanaa Jogili. 23Kuzwa kumusyobo wa Manase mwanaa Josefa ngu Haniyeli mwana wa Efodi. 24Kuzwa kumusyobo wa Efulemu mwanaa Josefa ngu Kemuweli mwanaa Syifutani. 25Kuzwa kumusyobo wa Zebuluni ngu Elizafani mwanaa Panaki. 26Kuzwa kumusyobo wa Isakaa ngu Palitiyeli mwana wa Azani. 27Kuzwa kumusyobo wa Asyee ngu Ahihudi mwanaa Syeloni, 28Kuzwa kumusyobo wa Nafutali ngu Pedaheli mwana wa Amihudi.
29Aaba mbabaalumi Mwami Leza mbaakalailila kwaabanya zisi ku Baisilayeli kuti lube lukono lwabo mu Kenani.
Currently Selected:
Myeelwe 34: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
