Myeelwe 30
30
Malailile azikonke
1Lino Mozesi wakaambila basololi bamisyobo ya Baisilayeli kuti, “Ngaaya makani Mwami Leza ngaalailila. 2Kuti naa muntu wakonkezya ku Mwami Leza kuti uyoocita cili boobu naa kutacicita, teelede kwaamba buyo pele acite zyoonse nzyaasyomezya.
3“Naba musimbi uucikkala muŋanda yawisi kuti wakonkezya ku Mwami Leza kuti uyoocita cili boobu naa kutacicita, 4alimwi kuti wisi wamvwa cikonke cakwe, amana waumuna buyo, cikonke eeco uleelede kucibamba. 5Pele kuti naa wisi wamukasya, nkokuti cikonke eeco camana. Mwami Leza ulamwaangununa, nkaambo wisi wamukasya.
6“Kuti naa musimbi wakwatwa kali wakakonkezya kuti uyoocita cili boobu naa kutacicita, kunyina makani naa ulizi naa katazi. 7Kuti mulumaakwe wamvwa cikonke, amana waumuna buyo, cikonke eeco uleelede kucibamba. 8Pele kuti naa mulumaakwe wamukasya, nkokuti cikonke eeco camana. Mwami Leza ulamwaangununa.
9“Kuti naa mukamufu naa mukaintu wakalekwa wakonkezya kuti uyoocita boobu naa kutacicita, abambe cikonke cakwe.
10“Kuti naa mukaintu uukwetwe wakonkezya kuti uyoocita cili boobu naa kutacicita, 11alimwi kuti mulumaakwe wamvwa cikonke cakwe, amana waumuna buyo, cikonke eeco uleelede kucibamba. 12Pele kuti naa mulumaakwe wamukasya, nkokuti cikonke eeco camana. Mwami Leza ulamwaangununa, nkaambo mulumaakwe wamukasya. 13Mulumi ulakonzya kuzumina naa kukaka cikonke camukaintu wakwe. 14Pele kuti naa mulumi waumuna buyo, nkokuti wazumina cikonke eeco. Wazumina mukutaamba cimwi cintu acikonke eeco. 15Pele kuti mulumi wamukasya kwainda ciindi kali wamvwide kale, ooyo mulumi nguutibe aamulandu.”
16Aaya ngamalailile Mwami Leza ngaakapa Mozesi aajatikizya mwaalumi amukaintu wakwe, naa wisi amwanaakwe musimbi uukkala aawe.
Currently Selected:
Myeelwe 30: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
