Myeelwe 19
19
Itwe lyaŋombe iisalala pyu
1Lino Mwami Leza wakalailila Mozesi a Aloni kuti, 2“Bape Baisilayeli mulawo ooyu wakuti balete ŋombe iisalala pyu iitakwe kampenda alimwi iitanapopedwe. 3Nkabela mwiipe kuli Eliyazaa mupaizi, kwamana itolwe kunze lyazivuka ijaigwe kalangilila. 4Ndendilyo Eliyazaa nayoonjizya munwe mubulowa akusansaila ziindi zili ciloba kumbele lyatente lyakuswaanganina. 5Kwamana ŋombe eeyo yuumpwe kalangilila, ŋombe yoonse, nyama, cikutu, bulowa, abufumba. 6Mpawo abweze nkuni zyamulombe ansinsa yakatabi kahisopo akatali kasalala pyu, aziwaale mumulilo uutenta ŋombe eeyo. 7Aakumana kucita boobo, akasanzye zisani zyakwe nkabela akulitila maanzi. Ndendilyo nayookonzya kunjila kuzivuka, pele unoocisofweede kusikila kumangolezya. 8Awalo muntu ooyo watenta ŋombe uleelede kusanzya zisani zyakwe, akusamba amubili, nikuba boobo unoocisofweede kusikila kumangolezya. 9Mwaalumi uusalala mumulawo nguuyooyola twe lyaŋombe eeyo alisowele mubusena busalala anze lyazivuka. Ooko nkoliyoobambwa akubelesegwa a Baisilayeli mumaanzi aakusalazya kugwisya zinyonyoono. 10Ooyu muntu uuyola twe uleelede kusanzya zisani zyakwe, pele nikuba boobo unoocisofweede kusikila kumangolezya. Mulawo ooyu ulajatikizya Baisilayeli abamasi bakkala akati kabo.
Kuguma mutumba
11“Kufumbwa muntu uuguma mutumba ulasofwaala kwamazuba aali ciloba. 12Muntu ooyo uleelede kulisalazya amaanzi aasalazya aayo mubuzuba bwatatu amubuzuba bwaciloba. Kuti naa wacita oobo inga wasalala, pele kuti taciti oobo mubuzuba bwatatu naa bwaciloba, taakwe nayoosalala limbi. 13Kufumbwa muntu uuguma mutumba akutalisalazya amaanzi aakusalazya ulisofweede. Ulakonzya kusofwaazya tente lya Mwami Leza, nkaako uyoogwisigwa ku Baisilayelinyina, eelyo busofwaazi bwakwe bulamukkalilila.
14“Kwaamba zyamuntu uufwide mutente, kufumbwa muntu uunjila naa uuli mutente eelyo uyoosofwaala kwamazuba aali ciloba. 15Alimwi cibiya cili buti citavunikidwe, cilasofwaala. 16Ncintu comwe akuti naa muntu wajaigwa apanga nikuba kufwa lufuŋanda anze, alimwi kufumbwa waguma zifuwa zyamuntu niciba cuumbwe ulasofwaala kwamazuba aali ciloba.
17“Lino mukusalazya busofwaazi bwamuntu, batile twe lyacipaizyo caŋombe iisalala pyu mucibiya, bamana batile maanzi mabotu. 18Eelyo umwi muntu uusalala mumulawo abweze nsinsa ya hisopo, anyike mumaanzi aayo akusansaila atente azintu zyoonse zili mumo kubikkilizya abantu. Mbubonya buyo akuli yooyo wakaguma cifuwa naa mutumba wayooyo wakajaigwa naa kufwa lufuŋanda niciba cuumbwe. 19Nkabela mubuzuba bwatatu abwaciloba muntu ooyo uusalala mumulawo akasansaile maanzi aayo amuntu ooyo alimwi, mubuzuba bwaciloba amusalazye. Walo ooyu wasalazigwa asanzye zisani zyakwe akusamba amubili, eelyo mangolezya aayo ngoonya ulasalala.
20“Kufumbwa muntu uusofweede watalisalazya, ulagwisigwa mumbungano. Wasofwaazya busena busalala bwa Mwami Leza nkaambo kakuti maanzi aakusalazya taatilwa amubili wakwe. 21Nkabela mulawo ooyu unooli walyoonse. Awalo muntu uusansaila maanzi aasalazya uleelede kusanzya zisani zyakwe. Kufumbwa uuguma maanzi aakusalazya unoosofweede kusikila kumangolezya. 22Kufumbwa ncaaguma uutasalali acalo cilasofwaala, eelyo uuciguma eeco ulasofwaala kusikila kumangolezya.”
Currently Selected:
Myeelwe 19: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
