Myeelwe 18

Milimo yabapaizi a Balevi

1Lino Mwami Leza wakaambila Aloni kuti, “Yebo abana bako abaciinga causo muyooba aamulandu kuti umwi akabisye mubusena busalalisya naa kubisizya bapaizi. 2Leta Balevinyoko kuzwa kuciinga canu kuti bakugwasye ciindi yebo abana bako nomubelekela kutente lyacizuminano. 3Mbabanookugwasya akucita milimo yoonse kutente, pele batasweni munsi aazibelesyo zyabusena busalalisya nikuba kucipaililo. Naa bacita oobo balafwa ncobeni. 4Baleelede kumugwasya mukubamba tente lyakuswaanganina amulimo woonse uuli buti. Taakwe muntu uumbi weelede kumuvula aafwiifwi pe. 5Ndinywe nomunoobamba busena busalalisya acipaililo kuti bukali bwangu butakabukili Baisilayeli alimwi pe. 6Mebo lwangu ndime ndakasala Balevinyoko kuzwa ku Baisilayeli bamwi kuti bapegwe kulindinywe. Balasalala kuti bakacite milimo mutente. 7Pele yebo abana bako balo ndinywe nimuyoocita milimo yabupaizi eeyo iicitilwa kucipaililo mubusena busalalisya. Ndakupa mulimo ooyu wabupaizi mbuli cipo. Pele kufumbwa muntu buyo uuswena munsi abusena busalalisya uleelede kujaigwa.”

Caabilo cabapaizi Balevi

8Lino Mwami Leza wakaambila Aloni kuti, “Mebo lwangu ndakupa kuti konoolanga zipaizyo ziletwa kulindime. Zipaizyo zyoonse zisalala zileta Baisilayeli kulindime zibe caabilo cabana bako lyoonse. 9Muyoopegwa cipaanzi cisalalisya cacipaizyo citatentwi, nkokuti camaila, naa cacinyonyoono, naa camilandu. 10Baalumi baleelede kucilida mubusena busalalisya, cilasalalisya kulindinywe.

11“Alimwi kufumbwa cipaanzi cilibedelede cakuzumbaanya ncicanu. Ciyooba caabilo cako abana balombe abasimbi. Nkabela woonse waciinga cako weelede mumulawo ulakonzya kulya.

12“Mafuta oonse aanjelema aaoliva alimwi awaini mubotu kwiindilila amaila aabutebuzi aapegwa ku Mwami Leza, nzizyanu zyoonse. 13Micelo yoonse iisaanguna kubizwa njobaletela Mwami Leza iyooba yanu.

14“Zintu zyoonse zili mu Isilayeli zipegwa ku Mwami Leza nzizyanu. 15Bana boonse bakusomona bapegwa ku Mwami Leza, naa mbabantu naa babanyama mbibanu, pele bana bakusaanguna babantu baleelede kunununwa, abana bakusomona babanyama batapaizigwi baleelede kunununwa. 16Baba aamwezi omwe banununwe amweelwe weelede awakuŋanda ya Leza, uuli masyekeli osanwe aansiliva nkokuti uulema magela aali makumi obilo. 17Pele tamweelede kununuzya mwana wakusomona waŋombe, mbelele naa wampongo. Nkaambo balasalala. Baleelede kupaizigwa, nkabela bulowa bwabo busansailwe acipaililo. Mukatente mafuta aabo kuti cibe cipaizyo cibotelezya ku Mwami Leza. 18Nyama yasyaala njiyanu mbuli kaango kakuzumbaanya acibelo calulyo mbozili zyako. 19Zintu zyoonse zisalala nzyobaleta Baisilayeli kulindime ndazipa kulinduwe akubana bako kumazyalani oonse aciboola. Ncaabilo canu lyoonse ngomulawo walyoonse. Eeci ncizuminano citamani cilibedelede kulinduwe akulunyungu lwako.”

20Lino Mwami Leza wakaambila Aloni kuti, “Tojisi caabilo munyika eeyo, taakwe ncoyookona ambabo pe. Ndime caabilo cako alukono lwako akati ka Baisilayeli.”

Ceelelo ca Balevi

21“Ndakapa ku Balevi cimanya kkumi cacoonse Baisilayeli ncobaleta nkaambo kamilimo njobacita kutente lyakuswaanganina. 22Kuzwa lino Baisilayeli tabeelede kuswena aafwiifwi atente lyakuswaanganina nkaambo kuti bacita oobo baliletela mulandu walufu. 23Balevi mbabanoobelekela kutente eeli alimwi mbabayooba aamulandu wacinyonyoono cacitika ooko. Oobu mbocinoobede kumazyalani aaciboola. Balevi tabakwe lukono aakati ka Baisilayeli. 24Pele ndapa cimanya kkumi cileta Baisilayeli kuti cibe lukono lwabo. Ncenciceeco ncindaambila kuti, ‘Tabajisi lukono akati ka Baisilayeli.’”

Cimanya kkumi ca Balevi

25Lino Mwami Leza wakalailila Mozesi kuti 26ambila Balevi kuti, “Ciindi nimutambula cimanya kkumi ciletwa a Baisilayeli ku Mwami Leza ciyooba canu, pele andinywe lwanu muleelede kupa ku Mwami Leza cimanya kkumi caceeco ncimwapegwa. 27Eeco cituuzyo ciyoolangwa mbuli maila naa waini wapegwa abantu ku Mwami Leza. 28Munzila eeyi anywebo munoopa ku Mwami Leza kuzwa kuzimanya kkumi zyoonse nzyomutambula ku Baisilayeli. Eezi zipegwa ku Mwami Leza ziyooba zya Aloni mupaizi. 29Cipo ca Mwami Leza cibe zeezyo zibotu kwiindilila zyazeezyo nzimwatambula.

30“Aboobo mwaakupa cibeela cibotu kwiindila ciyoolangwa mbuli maila naa waini wapegwa abantu ku Mwami Leza. 31Nywebo abamikwasyi yanu inga mulakonzya kulida kulikoonse, nkaambo nkokubbadelwa kwamilimo njomucita kutente lyakuswaanganina. 32Mukupa zibotu kwiindilila tamukooyoosampula zipego zisalala zya Baisilayeli, nkaako tamukooyoba aamulandu akufwa pe.”

Currently Selected:

Myeelwe 18: Tonga96

Highlight

Copy

Compare