Myeelwe 14
14
Bantu mbubakatongooka
1Lino masiku oonse bantu bakalila cabuusu. 2Bakatongookela Mozesi a Aloni bakati, “Nitwakafwida buyo mu Ijipiti, naa muno munkanda! 3Nkaambo nzi Mwami Leza ncaatutolela mucisi eeco kuti tukajaigwe munkondo? Ooko bana abakaintu besu bayootolwa mubuzike. Ino mbuti kuti twabweeda buyo ku Ijipiti?” 4Nkaako bakaambilana kuti, “Atusale musololi uumbi atupilusye ku Ijipiti!”
5Mozesi a Aloni bamvwe boobo bakavuntama kumbele lya Baisilayeli. 6Aawo Josyuwa mwanaa Nuni, a Kalebi mwanaa Jefune, basikutwela bobilo, bakazapaula zyakusama zyabo. 7Bakaambila bantu boonse kuti, “Cisi ncotwakaakutwela ncibotu kapati. 8Kuti naa Mwami Leza kaboteledwe andiswe, walo ulatusolweda, akuyootupa cisi eeco cikunka mukupa abuci. 9Mutazangili Mwami Leza pe. Mutabayoowi bantu bakkala mucisi ciya nkaambo tuyoobazunda. Mwami Leza ulaandiswe, tamweelede kuyoowa pe.”
10Pele bantu bakayanda kuti babaume mabwe akubajaya. Mpoonya-mpoonya bulemu bwa Mwami Leza bwakamweka kutente lyakuswaanganina.
Mozesi mbwaakakombela bantu
11Lino Mwami Leza wakaambila Mozesi kuti, “Ino bantu aaba balaleka lili kundisampaula? Nkaambo nzi ncobatandisyomi nikuba kuti ndacita maleele manji akati kabo? 12Ndiyootuma cuumo akubanyonyoona, pele yebo uyooba ntalisyo yamusyobo mupati kwiinda mbabo!”
13Pele Mozesi wakaambila Mwami Leza kuti, “Tee kayi nduwe wakabagwisya kuzwa mu Ijipiti anguzu zyako? Ino Baijipiti baakumvwa bayooti nzi? 14Tee bayooambila bantu bamomuno makani aayo? Bantu aaba balizi kale kuti yebo O Mwami Leza ulaandiswe alimwi akuti uleenda andiswe antangalala mumusumpuululu wakkumbi ciindi casikati amumusumpuululu wamulilo ciindi camasiku. 15Lino kuti naa wajaya bantu bako boonse, bantu bamisyobo imwi baakumvwa, 16bayooti, ‘Mwami Leza wakakacilwa kunjizya bantu bakwe munyika njaakabasyomezya, nkaako wabajaila munkanda.’ 17Lino akaka Mwami Leza ndakukomba, tutondezye nguzu zyako akucita mbubonya mbookasyomezya ciindi nookati, 18‘Ime ndi Mwami Leza, nsifwambi kunyema. Ndilatondezya luyando lupati abusyomeki nelekelela zinyonyoono abuzangi. Nikuba boobo nsikooyooleka kusubula bana abazyukulu kuyoosikila zyalani lyatatu alyane akaambo kazinyonyoono zyamawisi.’
19“Akaka O Mwami Leza, ndakukumbila, lekelela zinyonyoono zyabantu aaba kweendelana aluyando lwako lupati lutamani, mbubonya mbuli mbookali kubalekelela kuzwa ciindi ncibakazwa mu Ijipiti.”
20Lino Mwami Leza wakaingula kuti, “Ndabalekelela mbubonya mbuli mbookumbila. 21Pele ndakonka kuti mbuli mbwendi muumi alimwi anyika mbwiizwide bulemu bwangu, 22taakwe naba omwe wabantu aaba uyoonjila munyika eeyi. Bakabona bulemu bwangu azigambya nzindakabacita mu Ijipiti amunkanda. Nikubaboobo balanditalika ciindi aciindi nobatandiswiilili. 23Nkaako tabakooyoonjila munyika njindakasyomezya kumawisi. Taakwe naba omwe uyoonjila akati kabaabo bakandikaka pe. 24Pele mubelesi wangu Kalebi wasiyana abamwi mukuti ulandilemeka amoyo woonse, nkaako ndiyoomunjizya munyika eeyo njaakaakutwela alimwi abalunyungu lwakwe bayooikona. 25Mumakkuti aanyika eeyo mukkede Baameleki a Bakenani. Lino juunza muzoobweede munkanda kulubazu lwa Lwizi Lusalala.”
Mwami Leza mbwaakaambilizya cisubulo
26Lino Mwami Leza wakaambila Mozesi a Aloni kuti, 27“Ino bantu aaba babi bayooleka lili kunditongooka? Ndaamvwa matongoosi aabo. 28Nkaako amubaambile kuti, ‘Ncobeni mebo nde Mwami Leza mbuli mbwendi muumi, ndakonka kuti njoomucitila eezyo nzimwakaamba.’ 29Lino muyoofwa nkabela mitumba yanu iyoosyaala omuno munkanda. Nkaambo mwanditongooka, taakwe naba omwe wanu ulaamyaka iiindilila makumi obilo uutikanjile munyika eeyo. 30Ndakamusyomezezye kuti muyookkala ooko, pele taakwe naba omwe wanu uyoonjila kuleka Kalebi mwanaa Jefune a Josyuwa mwanaa Nuni. 31Bana banu mbumwakali kuti bayootolwa mubuzike, ndiyoobatola munyika njemwakakaka, nkabela iyooba yabo. 32Pele nywebo lwanu muyoofwida munkanda muno. 33Bana banu bayooba beembezi munkanda kwamyaka iili makumi one, kabapenga akaambo kakutasyomeka kwanu, mane mukamane do. 34Kweelanyika amazuba aayo ngumwakaakutwela cisi eeco, muyoosubulwa mwaka uuzwide kubuzuba bomwe, nkokuti myaka iili makumi one. Mbombuboobu nomutizibe mbokubede kukazyanya andime. 35Masimpe ndiyoocicita ncobeni eeci kubantu basicinguni aaba bamvwana zyakundizangila. Omuno mumonya munkanda nyoonse muyoomaninina do. Ndime Mwami Leza nendaamba.”
36Eelyo baalumi mbaakatumide Mozesi kuti bakatwele nyika, aabo bakaleta makani aakubeja aakacitya kuti bantu batongooke Mozesi, 37Mwami Leza wakabaletela cuumo, bakafwa. 38Pele muli basikutwela bali kkumi ababili, kwakafutuka buyo Kalebi a Josyuwa balikke.
Lweendo lutaanzi lwakusaala nyika
39Lino Mozesi naakamana kwaambila Baisilayeli makani oonse Leza ngaakamwaambila, bakalila kapati. 40Buce buyo bakafuma kabaya kucisi catulundu-lundu bati, “Ono tulaya kucisi eeco Mwami Leza ncaakatusyomezya. Twazumina kuti twakabisya.”
41Pele Mozesi wakaamba kuti, “Ino nkaambo nzi ncomusotoka malailile aa Mwami Leza? Tamukazundi pe. 42Mutainki, kayi Mwami Leza tacili aandinywe. Muyoozundwa. 43Baameleki a Bakenani bayoomulwana akumujaya. Mwami Leza takooyooba aandinywe, nkaambo mwakaka kumutobela.”
44Pele bakainka ooko kucisi catulundu-lundu, nikuba kuti bbokesi lyacizuminano ca Mwami Leza naba Mozesi taakainka ambabo. 45Lino Baameleki a Bakenani bakali kukkala ooko bakazunda Baisilayeli akubatandaanya mane kuyoosika ku Hooma.
Currently Selected:
Myeelwe 14: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
