Myeelwe 15
15
Malailile aakupaizya
1Lino Mwami Leza wakapa Mozesi 2malailile aaya ku Baisilayeli aakuti, “Mwaakunjila munyika njeyoomupa kuti ibe yanu, 3mwaakutalika kupa zipaizyo zyakutenta kuzwa kubutanga bubotelezya ku Mwami Leza, naa zipaizyo zyacikonke, naa zyakuliyandila buyo, naa zyapobwe, 4ooyo uuleta uleelede kupa cituuzyo cakatumba kabusu bunante buvweledwe amafuta aaoliva. 5Antoomwe akabelele kacipaizyo cakutenta ape akafulu kawaini cibe cituuzyo cacakunywa. 6Antoomwe amugutu ape cituuzyo cantumba yabusu bunante buvweledwe ansazi yamafuta 7alufulu lwa waini, Zibe mbuli bweema bubotelezya ku Mwami Leza. 8Ciindi napaizya kapoho ku Mwami Leza mbuli cikonke naa cipaizyo calumvwano 9ape acisuwo cabusu bunante buvweledwe akabiya kamafuta, 10akabiya kawaini, cibe cituuzyo cacakunywa. Cibe cipaizyo citentwa cibotelezya ku Mwami Leza. 11Oobo mbokweelede kupaizya poho, mugutu, mbelele, naa mpongo. 12Comwe-comwe cazeezi mboceelede kubambwa oobu.
13“Muisilayeli oonse mbweelede kucita oobu naleta cipaizyo cakutenta mbuli mbweema bubotelezya ku Mwami Leza. 14Kwamazyalani aaciza muzwamasi naa umwi uuli akati kanu uuyanda kupa cipaizyo cakutenta, mbuli bweema bubotelezya ku Mwami Leza, mbweelede kucita oobo. 15Malailile aaya ngaanu antoomwe abazwakule bali akati kanu. Mweelene buyo ku Mwami Leza. 16Milazyo amalailile aaya kamwaacita nywebo abazwakule bali akati kanu.”
17Lino Mwami Leza wakakananina Mozesi kuti 18aambile Baisilayeli kuti, “Mwaakusika kunyika eeyi nkwendimutola, 19ciindi mwaakutebula zyanyika eeyo, mukalete cipaanzi ku Mwami Leza. 20Mukange kkekke kubusu butaanzi, cibe cituuzyo cazwa kucuumino. 21Kwamazyalani oonse aaciza kamunoopa cituuzyo cazwa kucuumino. Kwamazyalani oonse aaciza kamunoopa cituuzyo eeci. 22Lino naa mwacita cibi kamutazi akutabamba malailile oonse Mwami Leza ngaakapa Mozesi, 23kufumbwa nzyaakamulailila kwiindila mulinguwe, kuzwa mubuzuba oobo mbwaakamupa kusikila kumazyalani aaciza, 24naa zyakacitwa mukutaziba kwabantu, bantu boonse bapaizye kapoho kakutenta, mbuli bweema bubotelezya ku Mwami Leza, antoomwe azituuzyo zyamaila acacakunywa. Balapaizya asijembwe abe cipaizyo cacinyonyoono.
25“Mbombuboobu mupaizi mbwayookombelezezya Baisilayeli boonse cinyonyoono, nkabela bayoolelekwa ncobeni. Kayi tiibakazi, aboobo baleta cipaizyo citentwa cacinyonyoono ku Mwami Leza nkaambo kakubisya kwabo. 26Baisilayeli boonse abazwakule bali akati kabo bayoolekelelwa, nkaambo boonse bakalilubizizye.
27“Pele kuti kali omwe buyo wabisya cakutaziba, uleelede kupa kapongo kapwizi kamwaka omwe, kabe cipaizyo cacinyonyoono. 28Mupaizi ulakombelezezya ooyo wakabisya katazi ku Mwami Leza, lino wakombelezelwa uyoolekelelwa ncobeni. 29Malailile aaya ajatikizya boonse babisya nibaba Baisilayeli naa bazwakule. 30Pele kufumbwa muntu uucita cinyonyoono acaali naa Muisilayeli naa muzwakule, ooyo wasampaula Mwami Leza, nkaako uleelede kujaigwa. 31Nkaambo wanyansya majwi aa Mwami Leza akutyola malailile aakwe, muntu ooyo uleelede kujaigwa ncobeni. Mulandu wakwe unooli alinguwe.”
Muntu wakasotoka mulawo wabuzuba bwa Sabata
32Cimwi ciindi Baisilayeli kabacili munkanda, bakajana muntu wakali kutebba nkuni mubuzuba bwa Sabata. 33Lino aabo bakamujana katebba nkuni bakamuleta kuli Mozesi a Aloni akubantu boonse. 34Aabo bakamubikka muntolongo, nkaambo tiibakanaziba ncobakeelede kumucita.
35Eelyo Mwami Leza wakaambila Mozesi kuti, “Muntu ooyo uleelede kujaigwa. Bantu boonse bamuume mabwe, bakamujaile kunze lyazivuka.”
36Mpawo bantu bakamugwisya kunze lyazivuka akumuuma mabwe kusikila wafwa mbuli Mwami Leza mbwaakalailila Mozesi.
Malailile amaaya
37Lino Mwami Leza wakakananina Mozesi kuti 38aambile Baisilayeli kuti, “Kwamazyalani aanu oonse muleelede kusuminina maaya muzyooko zyajansi. Kaaya komwe-komwe kakajisi katambo kacijulu-julu.
39“Maaya aaya anoomwiibalusya zyamilawo yoonse ya Mwami Leza kuti mwiitobele. Mutatobeli zisusi ziyanda myoyo ameso aanu.
40“Aboobo kamuyeeya kutobela milawo yangu yoonse nomutibe bantu bangu.
41“Ndime Mwami Leza wanu, wakamugwisya munyika ya Ijipiti kuti ndibe Leza wanu. Ndendime Mwami Leza wanu.”
Currently Selected:
Myeelwe 15: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
