Myeelwe 13
13
Zyabasikutwela
(Ciibalusyo 1.19-33)
1Lino Mwami Leza wakaambila Mozesi kuti, 2“Kosala musololi omwe-omwe kuzwa kumisyobo iili kkumi aibili, nkabatume bakatwele akubona nyika ya Kenani njeyoomupa Nobaisilayeli.”
3Nkaako Mozesi wakatuma bantu aaba kuzwa kunkanda ya Palani mbubonya mbuli Mwami Leza mbwaakalailila. Baalumi boonse aabo bakali basololi ba Baisilayeli. 4Ngaaya mazina aabo, kuzwa kumusyobo wa Lubeni wakali Syamuwa mwanaa Zakku. 5Kuzwa kumusyobo wa Simiyoni wakali Syafati mwanaa Holi. 6Kuzwa kumusyobo wa Juda wakali Kalebi mwanaa Jefune. 7Kuzwa kumusyobo wa Isakaa wakali Igali mwanaa Josefa. 8Kuzwa kumusyobo wa Efulemu wakali Hosyeya mwanaa Nuni. 9Kuzwa kumusyobo wa Benjamini wakali Paliti mwanaa Lafu. 10Kuzwa kumusyobo wa Zebuluni wakali Gadiyeli mwanaa Sodi. 11Kuzwa kumusyobo wa Josefa, nkokuti kuzwa kumukowa wa Manase, wakali Gadi mwanaa Susi. 12Kuzwa kumusyobo wa Dani wakali Amiyeli mwanaa Gemali. 13Kuzwa kumusyobo wa Asya wakali Setu mwanaa Mikayeli. 14Kuzwa kumusyobo wa Nafutali wakali Naabi mwanaa Vofusi. 15Kuzwa kumusyobo wa Gadi wakali Geyuweli mwanaa Maki.
16Aaba mbabasikutwela Mozesi mbaakatuma kuyoobona nyika. Nkabela Mozesi wakaulika Hosyeya mwanaa Nuni kuti Josyuwa.
17Lino Mozesi naakabatuma kuyootwela cisi ca Kenani wakati kulimbabo, “Amugame kunyika, mukazwide nkocili kumusanza, alimwi mukasike kucisi catulundu-lundu. 18Amukatwele mukabone naa cisi cili buti, abantu bakkala ooko naa mbanji naa mbace alimwi naa mbayumu naa mbatete. 19Alimwi mukalangisye naa nyika nimbotu naa nimbi, bantu bakkala muminzi iilaantangalala buyo, naa iliyakilidwe. 20Alimwi mukalangisye naa bulongo bwayo mbubotu naa mbubi, na ilijisi masamu naa pe. Amukakosoole akuletelela micelo yayo.” Eeci cakali ciindi cibizwa nsaansa.
21Mpawo baalumi baya bakainka kukutwela nyika kuzwa kunkanda ya Zini kumusanza mane kuyoosika ku Lehobu kufwiifwi amanjililo aamunzi wa Hamati. 22Bakanjila nkwiili kumusanza baakusika ku Hebuloni ooko kwakali Baahimani, Basyesyai, a Batalimayi baciinga ca Anaki nkobakakkede, Hebuloni yakayakwa myaka iili ciloba, kakutanayakwa Zowani mu Ijipiti.
23Eelyo bakasika kukkuti lya Esyikolo, lino ooko nkukonya bakakwezula mutabi wakajisi cikama cansaansa nkabela wakali kulema cakuti bantu bobilo bakali kutemba. Alimwi bakaletelezya ankuyu amapomegileneti. 24Lino busena oobo bwakaitwa kuti kkuti lya Esyikolo, mukuti nkubakakwezula mutabi wacikama cansaansa Baisilayeli.
25Eelyo nibakamana kutwela cisi kwamazuba aali makumi one, 26bakaboola kuli Mozesi a Aloni akubantu boonse Baisilayeli kubusena bwa Kadesyi munkanda ya Palani. Bakabakananina makani azeezyo nzibakaakubona akubatondezya micelo yanyika eeyo njibakaletelezya. 27Bakaambila Mozesi kuti, “Twakatwela cisi ncookatutuma, ncisi cikunka mukupa abuci, amubone micelo yaco njotwaleta. 28Pele bantu bakkala nkuko mbaasinguzu, alimwi minzi yabo mipati iliyakilidwe ankwakwa. 29Alimwi kunze aaboobo twakaakubona, Bahiti, Bajebusi, a Baamoli mbabali mutulundu-lundu, nkabela Bakenani bali kumbali a Lwizi lupati akutobelezya mulonga wa Jolodani.”
30Lino Kalebi wakaumuzya bantu bakali kumbele lya Mozesi akuti, “Atukabasaale lino, nkaambo inga twabazunda.”
31Pele baalumi mbaakainkide aabo bakati, “Peepe, tatukonzyi kuyoobazunda bantu aabo pe, nkaambo mbaasinguzu kwiinda ndiswe.” 32Aboobo bakaambila Baisilayeli makani mabi acisi eeco, bakati, “Nyika eeyo imena bantu buyo, alimwi boonse mbitwakabona mmantu. 33Twakabona Baanaki, mmantu aayo, nkabela swebo twakalibona mbuli nsozi, abalo mbubakatubona oobo.”
Currently Selected:
Myeelwe 13: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
