Myeelwe 12
12
Miliyamu mbwaakasubulwa
1Lino Miliyamu a Aloni bakatalika kutongookela Mozesi akaambo kamukaintu ngwaakakwete wakali Mukusyi. 2Bakati, “Sena Mwami Leza waambaula buyo kwiindila muli Mozesi? Tee kayi ulaamba amulindiswe?” Lino Mwami Leza wakamvwa makani ngebakaamba. 3Pele Mozesi wakali muntu mubombe moyo kwiinda bantu boonse baansi.
4Mpoonya Mwami Leza wakaambila Mozesi a Aloni a Miliyamu kuti, “Amuboole nywebo nyoonse nyotatwe kuno kutente lyakuswaanganina.” Nkaako bakainka. 5Mpawo Mwami Leza wakaza mumusumpuululu wakkumbi lyakazooima amulyango watente, amane waita Aloni a Miliyamu. Mpoonya boonse bobilo bakeenda kuya kumbele.
6Leza wakati kulimbabo, “Amuswiilile! Kwaba musinsimi akati kanu, mebo ndilalitondezya kulinguwe muzilengaano amuziloto. 7Pele teesi mbocibede kuli Mozesi mubelesi wangu. Ndakamupa nguzu zyakweendelezya Baisilayeli boonse. 8Ndaambaula anguwe busyu abusyu cakusalazya kutali mumasendelela pe, awalo ulabona bulemu bwangu. Ino nkaambo nzi ncomutayoowi kutongookela mubelesi wangu Mozesi?” 9Mpoonya Mwami Leza wakabakalalila, amane wabasiya.
10Lino kkumbi nilyakazwa aawo Miliyamu wakatuba buu, waba aacinsenda. Aloni naakaceba wakabona kuti Miliyamu ulaacinsenda. 11Mpawo Aloni wakaambila Mozesi kuti, “Akaka simalelo wangu, utatusubuli akaambo kabufuba-fuba akubisya kwesu. 12Akaka atabi mbuli cisowe ciyupulukide nicazwa mwida.”
13Lino Mozesi naakamvwa boobo wakakomba ku Mwami Leza wati, “O Leza muponye ndakukumbila.”
14Mpoonya Mwami Leza wakaingula kuti, “Kuti naa wisi wamuswida mate kubusyu, sena takoonoouside kwamazuba aali ciloba? Aboobo amumuleke azwe muzivuka kwamazuba aali ciloba, kwamana mazuba aayo uyooletwa mukati.” 15Mpoonya Miliyamu wakagwisigwa muzivuka kwamazuba aali ciloba, abalo bantu tiibakalonga kusikila naakaletwa.
16Kumane bakalonga kuzwa ku Hazeloti akuyooyakila munkanda ya Palani.
Currently Selected:
Myeelwe 12: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
