Nehemiya 9
9
Bantu mbobakalyaamba zinyonyoono zyabo
1Mubuzuba bwamakumi obilo aane bwamwezi nguwenya Baisilayeli bakabungana baliimya kulya, basama masaka, balibikka vu kumitwe. 2Bakali lyaandaanyizizye kale kuzwa kuli bamasi. Bakaima mumasena aabo akulyaamba zinyonyoono zyabo abubi bwabasikale babo. 3Bakabalilwa kuzwa mubbuku lyamulawo lya Mwami Leza wabo kwamaoola otatwe, bamane kwamaoola aambi otatwe bakalyaamba zinyonyoono akukomba Mwami Leza wabo.
4Kwakali ciimino ca Balevi aawo aakaimvwi Jesyuwa, Bani, Kadimiyeli, Syabaniya, Buni, Syelebiya, Bani, a Kenani. Bakakomba cakupozomoka ku Mwami Leza wabo.
5Balevi aaba: Jesyuwa, Kadimiyeli, Bani, Hasyabineya, Syelebiya, Hodiya, Syebaniya, a Petahiya bakati,
“Amwiime mutembaule Mwami Leza wanu,
amumutembaule kwalyoonse alyoonse.
Alitembaulwe zina lyako lyabulemu
eelyo bantu ndyobatakonzyi kutembaula bweelede.”
Kukomba kwakulyaamba zinyonyoono
6Yebo olikke O Mwami Leza nduwe Mwami,
nduwe wakalenga majulu nyenyezi a zili mumo.
Nduwe wakalenga nyika, lwizi azyoonse zili mumo,
nduwe oopa buumi kuli zyoonse,
zyoonse zyakujulu zilaakukomba.
7Yebo, O Mwami Leza, nduwe ookasala Abulamu,
nduwe wakamusolweda kuzwa mu munzi uuli mucisi ca Bakalodiya.
Nduwe wakasandula zina lyakwe kuba Abulahamu.
8Wakabona kuti ulasyomeka kulinduwe,
nkaako wakapanga cizuminano anguwe.
Wakamusyomezya kuyoomupa nyika ya Bakenani,
Bahiti Baamoli, Bapelezi, Bajebusi, a Bagigasyi,
kuti iyooba nyika yabalunyungu lwakwe.
Wakabamba cisyomezyo cako nkaambo ulasyomeka.
9Wakabona kupenga kwabasikale besu mu Ijipiti,
wakabamvwa nibakali kulila ku Lwizi Lusalala.
10Wakacita maleele azyuumo zyakupenzya Falo,
zyakupenzya balupati-pati abantu banyika yakwe,
nkaambo wakalizi mbuli mbubakali kudyaminina bantu bako.
Nkaako mpuwo yazina lyako yakaduma mbuli mbokubede.
11Wakaandaanya lwizi akaambo kabantu bako,
wakabasolweda anyika njumu.
Aabo bakali kubatandaanya bakaloba mumaanzi malamfu.
Bakadumpukila mbuli bbwe mumaanzi aafwipi-fwipi.
12Sikati wakabasolweda amusumpuululu wakkumbi,
masiku wakabasolweda amusumpuululu wamulilo.
13Kucilundu ca Sinayi wakaseluka kuzwa kujulu
waambaula abantu bako ooko,
wakabapa malailile aaluleme, milawo iini-ini,
njiisyo mbotu, alimwi amajwi aabusongo.
14Wakabaiisya kubamba buzuba bwako busalala,
buzuba bwakulyookezya bwa Sabata.
Kumane wakabapa malailile, mbeta,
amilawo kwiindila mumubelesi wako Mozesi.
15Nibakafwa nzala wakabapa cinkwa cizwa kujulu,
wakabapa maanzi kuzwa mubbwe nibakafwa nyota.
Wakabaambila kuti beendelezye nyika,
nyika njookasyomezya kuzoobapa.
16Pele basikale besu bakalisumpula baba basicinguni,
bakakaka kuswiilila malailile aako.
17Bakakaka kukuswiilila,
bakaluba zyoonse nzyookabacitila,
bakaaluba maleele ngookacita.
Mukulisumpula kwabo bakalisalila musololi,
musololi wakubabweedezya mubuzike Kuijipiti.
Pele yebo uli Leza uulekelela,
ulisiluse siluyando, uutafwambaani kunyema.
Lweengelelo lwako ndupati,
nkaako tookabafutatila pe.
18Bakabumba mutuni wamoombe bakaamba kuti,
“Ooyu ngoleza wesu wakatugwisya mu Ijipiti!”
Akaka, bakakusampaula O Mwami Leza!
19Nikubaboobo tookabalekelezya munkanda,
nkaambo lweengelelo lwako ndupati.
Taakwe nookagwisya kkumbi nuuba mulilo,
eezyo zyakabasolweda nzila sikati amasiku.
20Wakabapa Muuya mubotu, wakabaambila nzibakeelede kucita,
wakabasanina mana akubapa maanzi aakunywa.
21Kwamyaka iili makumi one munkanda
wakali kubapa zyoonse nzibakali kubula zisani zyabo tiizyakamana.
Maulu aabo taakacisa nikuba kuzimba.
22Wakabazundya bamasi amami mumanyika aakali muminyinza yabo.
Bakazunda nyika ya Hesyiboni ooko kwakali kulela Sihoni,
Bakazunda anyika ya Basyani ooko kwakali kulela Ogi.
23Alimwi wakabapa bana banji mbuli nyenyezi,
wakacitya kuti bazunde akukkala munyika
eeyo njookasyomezya kuyoopa basikale babo.
24Bakazunda nyika ya Kenani,
nduwe wakabazundila bantu bakali kukkala mumo.
Wakapa bantu bako nguzu zyakucita mbuli mbobayanda
kubantu abami bamu Kenani.
25Bantu bako bakazunda minzi iikwabilidwe,
bakatola nyika yambolezi, amaanda aazwide lubono,
ziteelekezyo zyakasidwe kale,
mioliva, misamu iizyala micelo,
amyuunda yansaansa. Bakali kulya cakulilekela, limwi baneneya,
akaka bakalidomenena zintu zibotu zyoonse nzyookabapa.
26Kumane bantu bako bakakuzangila akutakuswiilila,
bakafutatila milawo yako.
Bakajaya basinsimi aabo bakali kubacenjezya,
aabo bakali kubaambila kuti bajokele kulinduwe.
Bakali kukusampaula ciindi aciindi.
27Nkaako wakalekela basinkondonyina kuti babazunde akubalela,
mumapenzi aabo bakakulilila, wakabavuwa kuzwa kujulu.
Mulweengelelo lwako lupati wakabatumina basololi,
aabo bakabavuna kuzwa kuli basinkondonyina.
28Nibakaliiba bakabisya alimwi,
ayebo mbuuli limwi wakalekela basinkondonyina kuti babazunde.
Pele nibakeempa akukulomba kuti ubafutule
wakavuwa kuzwa kujulu ciindi aciindi
wakabavuna mulweengelelo lwako lupati.
29Wakabacenjezya kuti kabaswiilila njiisyo zyako,
pele mukulisumpula kwabo bakakaka milawo yako,
nikuba kuti kubamba mulawo wako njenzila yabuumi.
Mukuyuma mitwe, acinguni cabo bakakaka kukuswiilila.
30Mwaka amwaka wakali kubeetelela, wakali kubacenjezya
a Muuya wako kwiindila mubasinsimi.
Bakaba bankwaambila bbwe cakacitya
kuti ulekele misyobo imwi kubazunda.
31Nikubaboobo nkaambo kalweengelelo lwako lupati
tookabalekezya nikuba kubanyonyweeda limwi.
Ulisiluse Leza walweengelelo.
32Yebo Leza, Leza wesu, uli mupati kapati!
Ulayoosya alimwi uli singuzu mupati!
Ulabamba zizuminano zyako cakusyomeka.
Kuzwa ciindi bami baku Asiliya nibakali
kutudyaminina kuzoosika sunu twapenga kapati.
Bami besu, basololi besu, bapaizi besu abasinsimi besu,
basikale besu, abantu buyo boonse bapenga.
Koyeeya mbutwapenga.
33Walulamika kutusubula,
ulasyomeka pele swebo tulabisya.
34Basikale besu, bami besu, basololi besu,
abapaizi tiibakabamba mulawo wako.
Tiibakaswiilila malailile ancenjezyo zyako.
35Ciindi nibakali kulilela beni,
akutambula zibotu kuzwa kulinduwe
munyika mpati yambolezi njookabapa,
tiibakali kukubelekela alimwi tiibakasiya zibi zyabo.
36Lino twaba bazike munyika njookatupa,
nyika eeyi yambolezi iitupa zilyo.
37Bulotwe bwanyika eeyi buya kubami
oobo mbookacita kuti kabatweendelezya nkaambo twakabisya.
Balacita mbuli mbobayanda kulindiswe akuŋombe zyesu,
nkaako tuli mumapenzi mapati!
Bantu mbubakalemba cizuminano
38Lino akaambo kazeezi twakabamba cizuminano cisinizizye mukulemba, basololi besu, Balevi, alimwi abapaizi bacisimba cizuminano eeci.
Currently Selected:
Nehemiya 9: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
