Nehemiya 10

1Wakasaanguna kulemba ngu Nehemiya mweendelezi mwanaa Hakaliya. Kumane ngu Zedekiya kuzwa waawo kwakalemba bapaizi aaba: 2Selaiya, Azaliya, Jelemiya, 3Pasyihu, Amaliya, Malikija, 4Hatusyi, Syebaniya, Maluki, 5Halimu, Melemoti, Obadiya, 6Daniyele, Ginetoni, Baluki, 7Mesyulamu, Abija, Mijamini, 8Maaziya, Biligayi, a Syemaiya.

9Balevi bakalemba mbaa: Jesyuwa mwana wa Azaniya, Binuyi, mwanaa Henadadi, Kadimiyeli, 10abeenzinyina aaba: Syebaniya, Hodiya, Kelita, Pelaiya, Hanani, 11Mika, Lehobu, Hasyabiya, 12Zaku, Syelebiya, Syebaniya, 13Hodiya, Bani, a Beninu.

14Basololi babantu bakalemba mbaa: Palosyi, Pahatimowabu, Elamu, Zatu, Bani, 15Buni, Azigali, Bebayi, 16Adonija, Bigivayi, Adini, 17Ata, Hezekiya, Azuu, 18Hodiya, Hasyumu, Bezaiyi, 19Halifu, Anatoti, Nebayi, 20Magipiyasyi, Mesyulamu, Hezii, 21Mesyezabeli, Zadoki, Jaduwa, 22Pelatiya, Hanani, Anaiya, 23Hosyeya, Hananiya, Hasyubu, 24Halohesyi, Pila, Syobeki, 25Lehumu, Hasyabina, Maaseiya, 26Ahiya, Hanani, Anani, 27Maluki, Halimu, a Baana.

Zyacizuminano

28Swebo to Baisilayeli, bapaizi, Balevi, balindizi bakuŋanda ya Leza, baimbi bakuŋanda ya Leza, babelesi bakuŋanda ya Leza alimwi abaabo boonse, mukutobela mulawo, bakalizandula kuli bamasi bakkala munyika yesu, swebo antoomwe abakaintu besu alimwi abana besu bakonzya kumvwisya zintu, 29twazuminana abakwesu abasololi besu, alimwi twasyomezya cakukonka kuti tulatobela milawo eeyo Leza njaakapa Mozesi mubelesi wakwe. Tulatobela akucita zyoonse zyaamba Mulawo wa Mwami Leza wesu. Tuyoobamba milawo amalailile aakwe oonse. Naa tutakaciti oobo tukasinganyizigwe.

30Twasyomezya kuti tatunookwatani abamasi bakkala munyika yesu.

31Naa bamasi baleta maila niciba cimwi cakuuzya mu buzuba bwakulyookezya bwa Sabata nibuba bumwi bulibedelede tatukauli.

Mwaka amwaka waciloba tatunoolimi, alimwi tuyoolekelela zikwelete kuli batukolotelede.

32Mumwaka amwaka tunoopa, umwi aumwi wesu, kapaanzi komwe katatu kasyekeli kakuyoobelesya kuŋanda ya Leza.

33Tuyoopa zyakubelesya eezi mukukomba kuŋanda ya Leza, cinkwa cisalala, maila aapegwa buzuba abuzuba, banyama batentwa acipaililo buzuba abuzuba, zituuzyo zisalala zyamasabata, zyamapobwe zya mwezi mupya, zyamapobwe aamwi, zyamulumbo zisalala zimwi, zituuzyo zyakukombelezezya zinyonyoono zya Baisilayeli, azimwi zyoonse ziyandika kuŋanda ya Leza.

34Swebo, bantu, bapaizi, a Balevi tonoouma cisolo mwaka amwaka cakutubonya kuti nciinga cili ciyooleta nkuni zyakutentezya zipaizyo zipegwa kuŋanda ya Leza kweendelana abwaamba mulawo.

35Mwaka amwaka tunootola kuŋanda ya Leza zituuzyo zyamaila mataanzi ngotutebula, alimwi amicelo yesu iisaanguna kubizwa.

36Umwi aumwi wesu uyootola mwanaakwe mulombe wakusaanguna kubapaizi aabo babeleka kuŋanda ya Leza, ooko, mbubonya mbuli bwaamba mulawo tuyoobapa kuli Leza. Alimwi tuyoopa moombe wakusomona uuzyalwa kuŋombe zyesu. Tuyoopa akabelele kakusomona kumbelele naa mpongo zyesu.

37Tuyoopa kubapaizi mulwi wakakandwa wabusu bwamaila aakasaanguna kutebulwa, alimwi azituuzyo zimwi zyawaini, zyamafuta aaoliva, alimwi amisyobo iindene-indene yamicelo.

Tuyoozitola ku Balevi aabo batola zyakkumi kuzwa muminzi yesu nkotulima, alimwi azyakkumi zyamicelo iikomena munyika yesu. 38Lino bapaizi balunyungu lwa Aloni mbabanooli aa Balevi ciindi libwezwa kwakkumi. Balevi aabo baleelede kutola kwakkumi kwazeezi kuziyobwedo zili muŋanda ya Leza. 39Lino Baisilayeli a Balevi baleelede kutola maila, waini, amafuta aaoliva aapegwa kuziyobwedo ooko kubikkwa zibelesyo zyakuŋanda ya Leza. Kwalo ooko nkokuli maanda aabapaizi bali aabulizi, balindizi bakuŋanda ya Leza abaimbi bakuŋanda ya Leza. Tatukooyooisiya buyo ŋanda ya Leza.

Currently Selected:

Nehemiya 10: Tonga96

Highlight

Copy

Compare