Nehemiya 6

Mbubakabukila Nehemiya

1Lino Sanibalati, Tobiya, a Gesyemu Mualabu abamwi basinkondoma bakamvwa kuti twamana kuyakulula bwaanda, akuti kwakacinyina myaako yakasyeede mulimbubo pe. Nikuba kuti tiitwakanabikka zitendele kumilyango. 2Aboobo Sanibalati a Gesyemu bakanditumina makani aakuti ndikaswaangane ambabo muli umwi waminzi iili mucibanda ca Ono. Pele eeyi yakali nzila yakuti bakandicise. 3Pele mebo ndakatuma bantu basikuyoobaambila kuti, “Mebo ndicita mulimo mupati, aboobo nsikooyooinka ooko pe. Ino inga ndasiya buti mulimo kuti nzoobonane andinywe.”

4Bakanditumizya majwi aayo ngoonya kwaziindi zyone, nkabela amebo ndakali kubaingula mbubonya buyo.

5Kumane Sanibalati wakanditumina majwi lwasanu, wakaatumina mulugwalo lwatakajedwe pe. 6Lugwalo oolo lwakali kuti, “Gesyemu wandaambila kuti kuli maŋunu-ŋunu aamvwidwe abantu batuzingulukide aakuti yebo alimwi a Bajudanyoko muyanda kuzanga ncenciceeco ncomuyakulula bwaanda. Alimwi wakati uyanda kulipa bwami. 7Akuti wakabamba kale basinsimi basikuyooambilizya mumunzi wa Jelusalemu kuti uli mwami wacisi ca Juda. Ndizi kuti muleli mupati uyoozimvwa eezi. Nkaako ndali kuyeeya kuti tuswaangane tukanane makani aaya.”

8Mebo ndakamwiingula kuti, “Zyoonse nzyoamba tazili zyamasimpe. Nzyakuliyeeyela buyo yebo omwini.”

9Bakali kuyanda kuti batukonge tuleke kuyaka. “Ndakakomba kuli Leza kuti, O Leza, ndipe nguzu.”

10Bumwi buzuba ndakainka kuŋanda ya Syemaiya mwanaa Delaiya mwanaa Mehetabeli, watakali kukonzya kuzwa muŋanda. Nkabela wakandaambila kuti, “Webo andime tweelede kuunka kuŋanda ya Leza kuti tukalijalile mukati, nkaambo bantu balaba nobaboola kuzookujaya, balaboola masiku kuzookujaya.”

11Lino mebo ndakamvwiila kuti, “Mebo nsili muntu uukonzya kutija. Sena ndime uukonzya kuyoolivunina muŋanda ya Leza. Tandikooinka pe.”

12Ndakaziba kuti Leza talinguwe wamutuma, pele kuti wakasinsima boobu zyandime nkaambo Tobiya a Sanibalati bakalimuulide. 13Bakamuulide kuti andikonge cakuti ndibisye mukucita ceeci, bamana balo bandibisizye zina akunditola aansi.

14Ndakakomba kuti, “O Leza wangu, koyeeya nzyacita Tobiya a Sanibalati, ubasubule. Koyeeya mukaintu musinsimi Noadiya abasinsimi bamwi aabo bakali kusola kundikonga.”

Kumanizya mulimo wakuyaka

15Nikwakainda mazuba aali makumi osanwe aabili mulimo wakuyakulula bwaanda boonse wakamana mubuzuba bwamakumi obilo aasanu bwamwezi wa Eluli. 16Lino basinkondoma bamuzisi zyakatuzingulukide nibakamvwa makani aaya, bakaziba kuti balo basampuka nkaambo bantu boonse bakalizi kuti mulimo ooyu wakacitwa mukugwasigwa a Leza.

17Kwaciindi eeci coonse basololi ba Bajuda bakali kulembelana magwalo a Tobiya. 18Bantu banji bamucisi ca Juda bakali kulubazu lwakwe nkaambo kakuti wakali mukwe wa Mujudanyina Syekaniya mwana wa Ala. Kuzwa waawo awalo mwanaakwe wakali kutegwa Jehohanani wakakwata mwana musimbi wa Mesyulamu mwanaa Belekiya. 19Bantu bakali kulumbaizya Tobiya akaambo ka zeezyo nzyaakacita mukaanzambwene. Bamane bakali kumwaambila zeezyo nzindakali kwaamba. Aboobo Tobiya wakacili kunditumina magwalo akundikonga.

Currently Selected:

Nehemiya 6: Tonga96

Highlight

Copy

Compare